ការធ្លាយបំពង់បង្ហូរហ្គាសពីរុស្ស៊ីទៅអឺរ៉ុបក្នុងសមុទ្របាល់ទិក ដោយមិនដឹងមូលហេតុ ទាំង Nord Stream 1 និង Nord Stream 2 កំពុងបង្កជាការព្រួយបារម្ភយ៉ាងខ្លាំង ពីផលប៉ះពាល់លើប្រព័ន្ធអេកូឡូស៊ី និងអាកាសធាតុ ដែលទន្ទឹមនឹងវិបត្តិថាមពលនៅប្លុកអឺរ៉ុប។
យោងតាមអាជ្ញាធរថាមពលដាណឺម៉ាក ការលេចធ្លាយចំនួន ២ ត្រូវបានរកឃើញ នៅលើបំពង់បង្ហូរ Nord Stream 1 និង ១ កន្លែងទៀតនៅលើបំពង់ Nord Stream 2 ក្បែរកោះ Bornholm របស់ដាណឺម៉ាក កាលពីថ្ងៃអង្គារ ទី ២៧ ខែកញ្ញា។ ទោះបីជាបំពង់បង្ហូរទាំង ២ មិនដំណើរការក្ដី ប៉ុន្តែមានផ្ទុកហ្គាស ដែលផ្សំឡើងដោយឧស្ម័នមេតាន ជាប្រភេទឧស្ម័នផ្ទះកញ្ចក់ដ៏ធំបន្ទាប់ពីឧស្ម័នកាបូនឌីអុកស៊ីត ដែលរួមចំណែក ក្នុងការប៉ះពាល់ដល់បរិស្ថាន និងការប្រែប្រួលអាកាសធាតុ។
តាមធម្មតានៅពេលមានការលេចធ្លាយបំពង់បង្ហូរហ្គាស ដែលដាក់នៅបាតសមុទ្រ ហ្គាសនឹងផុសចេញជាពពុះឡើងទៅលើផ្ទៃសមុទ្រ ហើយមេតានដែលនៅក្នុងនោះនឹងភាយចេញទៅក្នុងបរិយាកាសផែនដី។ ប៉ុន្តែនេះ មិនមានន័យថា វានឹងគ្មានផលប៉ះពាល់នោះទេ ប្រសិនបើការលេចធ្លាយមិនកើតឡើង ព្រោះនៅទីបំផុត មនុស្សនៅតែយកហ្គាសទៅប្រើ ដែលបំភាយឧស្ម័នផ្ទះកញ្ចក់ទៅបរិយាកាសដដែល។
យ៉ាងណាក្ដី អ្នកនាំពាក្យក្រសួងបរិស្ថានអាល្លឺម៉ង់ បានឱ្យដឹងនៅក្នុងសេចក្តីថ្លែងការណ៍ថា ពពុះហ្គាសនាពេលនេះ មិនបង្កជាការគំរាមកំហែងដល់បរិស្ថានសមុទ្រ នៅសមុទ្របាល់ទិកនោះទេ។ អ្នកនាំពាក្យដដែលក៏កត់សម្គាល់ផងដែរថា មេតានដែលមាននៅក្នុងហ្គាសមិនរលាយជាមួយទឹកនោះទេ នេះមានន័យថា មេតានមិនបង្កជាការបំពុលទឹកនោះឡើយ។
តែទោះជាយ៉ាងណាក៏ដោយ ការលេចធ្លាយបំពង់បង្ហូរ Nord Stream ទាំង ២ នេះ នៅតែអាចបង្កផលប៉ះពាល់ជីវចម្រុះ ក្នុងសមុទ្របាល់ទិកភ្លាមៗ ហើយអ្នកជំនាញខាងបរិស្ថានពន្យល់ថា សមាសធាតុសំខាន់ណាមួយនៃហ្គាស នឹងរលាយក្លាយជាជាតិពុល ក្នុងទឹក ដែលប៉ះពាល់ដល់ត្រី សត្វមានសម្បក (ខ្យង ងាវ ក្ដាម) និងជីវិតសត្វសមុទ្រដទៃទៀត ក្នុងតំបន់ ជាពិសេសជីវិតណា ដែលមិនអាចគេចខ្លួនឱ្យទាន់ពេល ក្នុងខណៈដែលពពុះហ្គាសផុលឡើង។
បន្ថែមលើពីនេះទៀត ការផុលចេញពីទឹករបស់ហ្គាសទៅក្នុងបរិយាកាស គឺជាការព្រួយបារម្ភ ក្នុងរូបភាពធំ ដោយសារវាបំភាយមេតាន ខណៈដែលអ្នកវិទ្យាសាស្ត្រនិយាយថា ការកាត់បន្ថយការបញ្ចេញឧស្ម័នផ្ទះកញ្ចក់ប្រភេទនេះ ក្នុងរយៈពេលប៉ុន្មានឆ្នាំខាងមុខ នឹងក្លាយជាគន្លឹះដ៏សំខាន់ ក្នុងការទប់ស្កាត់ការប្រែប្រួលអាកាសធាតុ។
សហការិនីស្រាវជ្រាវ នៅវិទ្យាស្ថាន Sustainable Gas នៃសាកលវិទ្យាល័យ Imperial College London លោកស្រី Jasmin Cooper បានគូសបញ្ជាក់ប្រាប់ទីភ្នាក់ងារព័ត៌មានរ៉យទ័រថា វាពិបាកក្នុងការកំណត់បរិមាណឱ្យបានច្បាស់ថា តើបរិមាណហ្គាសប៉ុន្មានរួចហើយ ដែលបំភាយទៅដល់បរិយាកាស ចេញពីកន្លែង ដែលលេចធ្លាយ។
លោកស្រីលើកឡើងថា ក្រុមហ៊ុនថាមពលរុស្ស៊ី Gazprom ដែលជាម្ចាស់បំពង់បង្ហូរទាំង ២ ប្រហែលជាមានការប៉ាន់ប្រមាណដោយផ្អែកលើការបញ្ចេញហ្គាស ប៉ុន្តែបើនិយាយពីចំនួនហ្គាស/មេតាន ដែលបញ្ចេញទៅក្នុងបរិយាកាសរួចហើយនោះ គេត្រូវការក្រុមមួយ ដើម្បីវាស់វែង។
អនុប្រធានផ្នែកវាស់វែងនៅក្រុមហ៊ុនផ្កាយរណប សម្រាប់ការវាស់វែងមេតាន GHGSat លោក Jean-Francois Gauthier បានអះអាងថា បើតាមការប៉ាន់ប្រមាណបែបចាស់ ដោយផ្អែកលើទិន្នន័យ ដែលមាន កន្លែងដែលលេចធ្លាយទាំង៣ នៃបំពង់បង្ហូរ Nord Stream អាចបញ្ចេញមេតានយ៉ាងហោចណាស់ ៥០០ តោន ក្នុង ១ ម៉ោង នៅពេលបំពង់បែកដំបូងៗ ហើយអត្រានេះថយចុះតាមពេលវេលារហូត។
ខណៈដែលគេមិនដឹងច្បាស់ពីបរិមាណ ដែលមានក្នុងបំពង់បង្ហូរ Nord Stream 1 អ្នកនាំពាក្យរបស់បំពង់ Nord Stream 2 បានឱ្យដឹងថា បំពង់បង្ហូរនេះមានផ្ទុកហ្គាស ៣០០ លានម៉ែត្រគុប។ អ្នកជំនាញថា ប្រសិនបើបរិមាណនេះ ត្រូវបំភាយទៅក្នុងបរិយាកាសទាំងអស់នោះ ឧស្ម័នមេតាន ២០០ ០០០ តោន នឹងត្រូវបំភាយចេញ ឬស្មើនឹង ៦ លានតោននៃកាបូនឌីអុកស៊ីត។ នេះបើតាមការគណនារបស់រ៉យទ័រ ដែលថា ចំនួននេះស្មើនឹងចំនួនកាបូនឌីអុកស៊ីត ដែលក្រុងអូហៃយ៉ូ (អាមេរិក) ឬក្រុងហេលស៊ិនស្គី (ហ្វាំងឡង់) ឬក្រុងហាវ៉ាណា (គុយបា) បំភាយក្នុង ១ ឆ្នាំ។
សហភាពអឺរ៉ុប ស្ថិតក្នុងចំណោមប្រទេសជាង ១០០ រួមទាំងសហរដ្ឋអាមេរិក ប្រេស៊ីល ប៉ាគីស្ថាន និងម៉ិកស៊ិក ដែលសន្យាកាលពីឆ្នាំមុនថា នឹងកាត់បន្ថយការបំភាយឧស្ម័នមេតានរួមគ្នា ឱ្យបាន ៣០% ត្រឹមឆ្នាំ ២០៣០ ក្នុងគោលបំណង ដើម្បីជួយទប់ទល់នឹងកម្រិតមហន្តរាយនៃការប្រែប្រួលអាកាសធាតុ។
ជុំវិញបញ្ហាចុងក្រោយនេះ លោក Stefano Grassi ប្រធានគណៈរដ្ឋមន្ត្រីនៃស្នងការថាមពលសហភាពអឺរ៉ុប បាននិយាយកាលពីថ្ងៃអង្គារថា វាប្រថុយនឹងការក្លាយទៅជា «គ្រោះមហន្តរាយអាកាសធាតុ និងអេកូឡូស៊ី»។ លោកសរសេរនៅលើបណ្ដាញសង្គមធ្វីធើរថា៖ «យើងកំពុងទាក់ទងជាមួយ [រដ្ឋជាសមាជិកសហភាពអឺរ៉ុប] ដើម្បីរកមើលអ្វី ដែលកើតឡើង និងស្វែងរកមធ្យោបាយឱ្យបានលឿនបំផុត ដើម្បីបញ្ឈប់ការលេចធ្លាយ និងចៀសវាងការខូចខាតកាន់តែអាក្រក់»។
មកទល់ពេលនេះ គេមិនទាន់មានភាពប្រាកដប្រជាទេថា នរណាជាអ្នកទទួលខុសត្រូវលើការលេចធ្លាយ ប៉ុន្តែមន្ត្រីរបស់ប្រទេសអឺរ៉ុបជាច្រើន បានចោទប្រកាន់រុស្ស៊ីថា ធ្វើសកម្មភាពបំផ្លិចបំផ្លាញ ដើម្បីផលប្រយោជន៍នយោបាយ ចំពេលមានវិបត្តិថាមពលរុស្ស៊ី-អឺរ៉ុប ក្រោយសង្គ្រាម នៅអ៊ុយក្រែន ផ្ទុះឡើង។ យ៉ាងណាក្ដី អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានអះអាងថា ការលេចធ្លាយ ដែលមិនធ្លាប់កើតមានពីមុនមកនេះ មិនទាន់អាចយកអ្វីមកសំអាងថា រុស្ស៊ីជាអ្នកបំផ្លិចបំផ្លាញនោះឡើយ ខណៈរុស្ស៊ីមានការបារម្ភយ៉ាងខ្លាំងលើបញ្ហានេះ៕