អគ្គនាយិកាអង្គការពាណិជ្ជកម្មពិភពលោក (WTO) លោកស្រី Ngozi Okonjo-Iweala បានព្រមានកាលពីថ្ងៃអង្គារថា ពិភពលោក កំពុងឆ្ពោះទៅរកវិបត្តិសេដ្ឋកិច្ចសកល ដោយសារតែជម្លោះ និងវិបត្តិផ្សេងៗជាច្រើន និងបានអំពាវនាវឱ្យមានគោលនយោបាយ ដើម្បីស្តារកំណើនសេដ្ឋកិច្ចឡើងវិញ។
លោកស្រី Okonjo-Iweala អះអាងថា សង្គ្រាមនៅអ៊ុយក្រែន វិបត្តិដែលបណ្ដាលមកពីអាកាសធាតុ តម្លៃស្បៀងអាហារ និងវិបត្តិថាមពល បូករួមនឹងផលវិបាកនៃជំងឺរាតត្បាតកូវីដ ១៩ កំពុងបង្កើតលក្ខខណ្ឌដែលធ្វើឱ្យពិភពលោកធ្លាក់ទៅក្នុងវិបត្តិសេដ្ឋកិច្ច។
លោកស្រីថ្លែងក្នុងវេទិកាសាធារណៈប្រចាំឆ្នាំរបស់ WTO នៅទីក្រុងហ្សឺណែវថា៖ «ឥឡូវនេះ យើងត្រូវដោះស្រាយវិបត្តិសេដ្ឋកិច្ចដែលនឹងមកដល់។ ខ្ញុំគិតថា យើងកំពុងឈានទៅរកវិបត្តិសេដ្ឋកិច្ចសកល។ ប៉ុន្តែស្របពេលជាមួយគ្នានេះ យើងត្រូវចាប់ផ្តើមគិតអំពីការងើប និងការស្តារកំណើនសេដ្ឋកិច្ចឡើងវិញ»។
អតីតរដ្ឋមន្ត្រីហិរញ្ញវត្ថុ និងការបរទេសនីហ្សេរីយ៉ាដដែល បានកត់សម្គាល់ថា ធនាគារពិភពលោក និងមូលនិធិរូបិយវត្ថុអន្តរជាតិ បានបន្ទាបការព្យាករណ៍កំណើនសេដ្ឋកិច្ចពិភពលោក ខណៈពេលដែលសូចនាករស្តីពីលេខពាណិជ្ជកម្មស្ថិតនៅក្នុងលក្ខខណ្ឌមិនល្អ ដោយសារតែបញ្ហាផ្សេងៗជុំវិញពិភពលោក នាពេលបច្ចុប្បន្ននេះ។
លោកស្រី Okonjo-Iweala គូសបញ្ជាក់ទៀតថាធនាគារកណ្តាលរបស់ប្រទេសផ្សេងៗលើពិភពលោក មិនមានជម្រើសច្រើនពេកទេ ក្រៅពីការរឹតបន្តឹង និងបង្កើនអត្រាការប្រាក់ ប៉ុន្តែផលប៉ះពាល់លើទីផ្សារ និងប្រទេសកំពុងអភិវឌ្ឍន៍ ក៏មានភាពធ្ងន់ធ្ងរខ្លាំងទៅតាមហ្នឹងដែរ។
អគ្គនាយិកាដដែលសង្កត់ធ្ងន់លើតម្រូវការពីធនាគារកណ្តាល ដើម្បីកំណត់ថាតើអតិផរណាត្រូវបានបង្កឡើងដោយតម្រូវការខ្លាំង ឬក៏វាមកពីការកើនឡើងនៃតម្លៃ ដែលផ្សារភ្ជាប់ទៅនឹងបញ្ហារចនាសម្ព័ន្ធនៅលើផ្នែកផ្គត់ផ្គង់។
មិនថាយ៉ាងណាក៏ដោយ លោកស្រី Okonjo-Iweala អះអាងថា កង្វល់ចម្បងរបស់លោកស្រី គឺទាក់ទងនឹងការធានាសន្តិសុខស្បៀង ហើយបន្ទាប់មក គឺការផ្គត់ផ្គង់ថាមពល៕