ទំនិញនាំចេញពីតំបន់ស៊ីនជាំងប្រទេសចិន ទៅសហភាពអឺរ៉ុបបានកើនឡើងលើសទ្វេដង នៅក្នុងខែសីហា បើទោះបីជាមានក្តីព្រួយបារម្ភខ្លាំង ពីការប្រើប្រាស់កម្លាំងពលកម្មរបស់ជនជាតិភាគតិចអ៊ុយហ្គួរដោយបង្ខំក៏ដោយ។
ការនាំចេញដោយផ្ទាល់ពីស៊ីនជាំង ទៅកាន់សមាជិកទាំង ២៧ ប្រទេសរបស់សហភាពអឺរ៉ុប បានកើនឡើង ១៣៦,២% ស្មើនឹងទំហំទឹកប្រាក់ ១៣៦,៧ លានដុល្លារក្នុងខែសីហា ឆ្នាំ ២០២២ បើធៀបនឹងឆ្នាំមុន។ នេះបើយោងតាមការគណនាដោយផ្អែកលើទិន្នន័យគយចិន។
ការនាំចេញថ្ម លីចូមអ៊ីយ៉ុង បានកើនឡើង ៦០០% ខណៈដែលការនាំចេញផលិតផលផ្ទាំងសូឡា បានបង្ហាញខ្លួននៅក្នុងទិន្នន័យជាលើកដំបូងរាប់ចាប់ពីឆ្នាំ ២០១៧ មក។
ការស៊ើបអង្កេតរបស់ប្រព័ន្ធផ្សព្វផ្សាយ និងរបាយការណ៍សិក្សាជាច្រើន បានភ្ជាប់ថ្ម លីចូមអ៊ីយ៉ុង និងផ្ទាំងសូឡា ថាជាផលិតផលដែលកើតចេញពីការប្រើកម្លាំងពលកម្មដោយបង្ខំនៅតំបន់ស៊ីនជាំង។ ស៊ីនជាំង ដែលរដ្ឋអំណាចចិនបានជាប់ចោទពីបទចាប់ឃុំខ្លួនជនជាតិអ៊ុយហ្គួរយ៉ាងហោច ១ លាននាក់ និងជនជាតិភាគតិចកាន់សាសនាអ៊ីស្លាមផ្សេងទៀតក្នុងជំរំលត់ដំជាច្រើនកន្លែងនៅស៊ីនជាំង។
ទីក្រុងប៉េកាំង តែងបដិសេធចំពោះការចោទប្រកាន់ និងថាជំរំទាំងនោះ គឺជាមណ្ឌលអប់រំបង្កើតឡើងដើម្បីបណ្តុះបណ្តាលជំនាញដល់ជនជាតិអ៊ុយហ្គួរ និងដើម្បីទប់ស្កាត់កុំឱ្យមានជនជ្រុលនិយមតែប៉ុណ្ណោះ។ ក្រសួងការបរទេសចិន បានលើកឡើងថា មិនដែលមានសោះឡើយការចាប់បង្ខំមនុស្សឱ្យធ្វើការនៅស៊ីនជាំង។
គួរជ្រាបថា បែលហ្ស៊ិក គឺជាអ្នកទិញទំនិញដ៏ធំបំផុតពីស៊ីនជាំង ដោយការនាំចូល បានកើនឡើងដល់ ៤១០,៣% ឬស្មើនឹង ៣៤,៨ លានដុល្លារ។ បន្ទាប់មកគឺអាល្លឺម៉ង់ កើនឡើង ៦៨% ហូឡង់ កើនឡើង ១៦៣,៨ ភាគរយ អ៊ីតាលី កើនឡើង ៧១% ប៉ូឡូញ កើនឡើង ១២៤% និងប្រទេសបារាំងដែលការនាំចេញពីស៊ីនជាំងបានកើនឡើងយ៉ាងខ្លាំងរហូតដល់ទៅ ១ ០៣៣ ភាគរយ ស្មើនឹង ៦,៨ លានដុល្លារកាលពីខែមុន។
ទិន្នន័យកាលពីខែសីហា បង្ហាញថាក្រុមហ៊ុនអឺរ៉ុប នៅតែបន្តទិញទំនិញពីស៊ីនជាំង បើទោះបីជាគណៈកម្មការអឺរ៉ុប កំពុងរៀបចំច្បាប់ហាមឃាត់ការនាំចូលមកក្នុងទីផ្សារអឺរ៉ុប នូវផលិតផលដែលប្រើកម្លាំងពលកម្មដោយបង្ខំក៏ដោយ៕