ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី កាលពីថ្ងៃពុធ ទី ២៨ ខែកញ្ញា បានរំឭកឡើងវិញថា លោកនឹងមិនចរចាជាមួយលោក វ្ល៉ាឌីមៀរ ពូទីន ជាដាច់ខាត បើរុស្ស៊ីកាត់បញ្ចូលទឹកដីរបស់អ៊ុយក្រែនជារបស់ខ្លួន ដោយពឹងផ្អែកលើលទ្ធផលនៃការធ្វើប្រជាមតិ ដែលមិនស្របច្បាប់ ហើយសុំឱ្យសហគមន៍អន្តរជាតិជួយការពារ និងគាំទ្រអ៊ុយក្រែន។ នេះជាការលើកឡើងពីមេដឹកនាំអ៊ុយក្រែន ពេលចូលរួមកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UNSC) តាមរយៈវីដេអូខន់ហ្វឺរឹនស៍។
មេដឹកនាំអ៊ុយក្រែនរូបនេះ បានសង្កត់ធ្ងន់ថា ការរួមចំណែកពីប្រទេសសម្ព័ន្ធមិត្ត ក្នុងសហគមន៍អន្តរជាតិដែលជួយដល់អ៊ុយក្រែន ទាំងខាងផ្នែកហិរញ្ញវត្ថុ និងយោធា បានដើរតួនាទីយ៉ាងសំខាន់ ក្នុងការប្រយុទ្ធប្រឆាំងនឹងរុស្ស៊ី និងកងទ័ពឈ្លានពានរបស់ពួកគេ ដែលបានធ្វើសង្គ្រាមជាមួយអ៊ុយក្រែនអស់រយៈពេលជាង ៧ ខែហើយ។
ការគាំទ្រដល់ការធ្វើប្រជាមតិ នៅតំបន់ Donetsk, Luhansk, Zaporizhia និង Kherson ដើម្បីទទួលបានឯករាជ្យពីអ៊ុយក្រែន និងត្រួសត្រាយផ្លូវ ឱ្យមានសមាហរណកម្មជាមួយរុស្ស៊ី។ រឿងនេះបានកើតឡើងដូចគ្នាទៅនឹងករណី នៅតំបន់គ្រីមា (Crimea) ក្នុងឆ្នាំ ២០១៤។
លោកហ្សេលេនស្គី ក៏បានទាំងអំពាវនាវដល់សហគមន៍អន្តរជាតិឱ្យអនុវត្តទណ្ឌកម្មកាន់តែធ្ងន់ធ្ងរថែមទៀត ដើម្បីឱ្យរុស្ស៊ីឯកោទាំងស្រុងតែម្ដង ខណៈដែលរដ្ឋាភិបាលជាច្រើន បានថ្កោលទោស ចំពោះទង្វើនេះ និងបានបង្ហាញពីជំហររបស់ខ្លួនប្រឆាំងនឹងការទទួលយកលទ្ធផលនៃការធ្វើប្រជាមតិ និងការបញ្ចូលទឹកដី ដែលរំលោភលើអធិបតេយ្យភាពនៃរដ្ឋណាមួយ។
គេរំពឹងថា រុស្ស៊ីនឹងប្រកាសជាផ្លូវការនូវការបញ្ចូលទឹកដីទាំង ៤ នេះ នៅថ្ងៃទី ៣០ ខែកញ្ញា ក្រោយការធ្វើប្រជាមតិនេះ៕
វីដេអូ៖