.jpg)
នាយករដ្ឋមន្ត្រីថ្មីអង់គ្លេស លោកស្រី លីហ្ស ទ្រូស្ស។ រូបថត AFP
មន្ត្រីអាមេរិកកំពុងជួបបញ្ហាកាន់តែខ្លាំងឡើង ចំពោះសំណើរបស់អង់គ្លេសក្នុងការកាត់ពន្ធ អំឡុងពេលដែលប្រទេសនេះ ទប់ស្កាត់អត្រាអតិផរណា។ ផែនការរបស់អង់គ្លេស បានបញ្ឆេះភាពចលាចលនៅក្នុងទីផ្សារហិរញ្ញវត្ថុ។
ផែនការកាត់ពន្ធរបស់នាយករដ្ឋមន្ត្រីអង់គ្លេស លោកស្រី លីហ្ស ទ្រូស្ស (Liz Truss) បានទាក់ទាញការរិះគន់ពីអ្នកសេដ្ឋកិច្ច និងអ្នកវិនិយោគ ហើយបានជំរុញឱ្យធនាគារអង់គ្លេស ចេញវិធានការទប់ទីផ្សារដែលមិនមានលំនឹងតាមរយៈកិច្ចអន្តរាគមន៍បន្ទាន់មួយកាលពីថ្ងៃពុធ ទី២៨ ខែកញ្ញា។
រដ្ឋបាលរបស់លោកប្រធានាធិបតីអាមេរិក បៃដិន ដែលរួមមានទាំងនាយកដ្ឋានរតនាគារជាតិ បានបង្ហាញការព្រួយបារម្ភចំពោះផែនការកាត់បន្ថយពន្ធរបស់អង់គ្លេស។ នេះបើតាមមន្ត្រីរដ្ឋបាលអាមេរិកម្នាក់ ដែលតាមដានរឿងខាងលើនេះ ប្រាប់សារព័ត៌មានអាមេរិក CNN កាលពីថ្ងៃព្រហស្បតិ៍ ទី ២៩ ខែកញ្ញា។ ហានិភ័យសម្រាប់សហរដ្ឋអាមេរិក គឺថាបញ្ហាណាមួយដែលកើតឡើងនៅម្ខាងទៀតនៃមហាសមុទ្រអាត្លង់ទិក អាចរីករាលដាលដល់ប្រព័ន្ធហិរញ្ញវត្ថុពិភពលោក និងសេដ្ឋកិច្ចពិភពលោកទាំងមូល។
រដ្ឋមន្ត្រីក្រសួងពាណិជ្ជកម្មអាមេរិក លោកស្រី Gina Raimondo បានរិះគន់ផែនការរបស់នាយករដ្ឋមន្ត្រីអង់គ្លេស កាលពីថ្ងៃពុធ។ រដ្ឋមន្ត្រីក្រសួងពាណិជ្ជកម្មអាមេរិករូបនេះ បានចង្អុលបង្ហាញថា ប្រាក់ផោនរបស់អង់គ្លេសបាន "ធ្លាក់ចុះ" ចាប់តាំងពីសំណើនេះត្រូវបានបង្ហាញជាសាធារណៈ។
លោកស្រី Raimondo បានលើកឡើងថា៖ "គោលនយោបាយនៃការកាត់ពន្ធ និងការបង្កើនចំណាយក្នុងពេលដំណាលគ្នា មិនមែនជាអ្វីដែលអាចប្រយុទ្ធប្រឆាំងនឹងអតិផរណាក្នុងរយៈពេលខ្លី ឬធ្វើឱ្យមានស្ថានភាពល្អ សម្រាប់កំណើនសេដ្ឋកិច្ចរយៈពេលវែងនោះទេ"។
លោកស្រី Raimondo បានព្យាយាមលើកយកវិធីសាស្ត្រផ្ទុយគ្នាពីអង់គ្លេស ដោយលើកឡើងពីវិធីសាស្ត្រមួយ ក្រោមការគ្រប់គ្រងរបស់រដ្ឋបាលលោកបៃដិន។ “យើងកំពុងបន្តយុទ្ធសាស្ត្រផ្សេង… យើងចាត់ទុកបញ្ហាអតិផរ ណាជាបញ្ហាមិនអាចមើលស្រាលបាន ដោយអនុញ្ញាតឱ្យធនាគារកណ្តាលអាមេរិកធ្វើការងាររបស់ខ្លួន តាមដានឱនភាពចំណាយ”។ លោកស្រីបន្តថា “វិនិយោគិន អ្នកជំនួញចង់ឃើញមេដឹកនាំពិភពលោកចាត់វិធានចំពោះបញ្ហាអតិផរណាយ៉ាងខ្លាំង”។
មន្ត្រីនៃរដ្ឋបាលលោក បៃដិន បានបង្ហាញពីការព្រួយបារម្ភរបស់ពួកគេអំពីផែនការរបស់អង់គ្លេសតាមរយៈមូលនិធិរូបិយវត្ថុអន្តរជាតិ IMF។ នេះបើយោងតាមសារព័ត៌មាន Bloomberg ដែលរាយការណ៍ពីក្តីបារម្ភរបស់មន្ត្រីអាមេរិកចំពោះរឿងនេះ។
សហរដ្ឋអាមេរិកគឺជាម្ចាស់ភាគហ៊ុនធំជាងគេនៅក្នុងមូលនិធិរូបិយវត្ថុអន្តរជាតិ IMF ដែលបានបង្ហាញការរិះគន់ដ៏កម្រចំពោះផែនការអង់គ្លេសក្នុងសប្តាហ៍នេះ។ អាមេរិកតាមរយៈ IMF ក៏បានជំរុញឱ្យមន្ត្រីរបស់ប្រទេសអង់គ្លេស "វាយតម្លៃឡើងវិញ" នូវការកាត់ពន្ធ។
លោកស្រីទ្រូស្ស បានការពារផែនការពន្ធរបស់លោកស្រី ដោយប្រាប់សារព័ត៌មាន CNN កាលពីសប្តាហ៍មុនថា រដ្ឋាភិបាលរបស់លោកស្រីកំពុងជំរុញអាជីវកម្មឱ្យវិនិយោគ និងជួយប្រជាជនសាមញ្ញតាមរយៈអត្រាពន្ធរបស់ពួកគេ។
មន្ត្រីអាមេរិកមួយចំនួនបានបង្ហាញការប្រុងប្រយ័ត្នរបស់ពួកគេ ដោយមិនហ៊ានរិះគន់ចំទៅសមភាគីអង់គ្លេសទេ។ រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen កាលពីថ្ងៃអង្គារ ទី ២៧ ខែកញ្ញា បានបដិសេធមិនធ្វើអត្ថាធិប្បាយដោយផ្ទាល់លើផែនការសេដ្ឋកិច្ចរបស់ចក្រភពអង់គ្លេសនោះទេ៕
