.jpg)
លោកនាយករដ្ឋមន្ត្រីថៃ ប្រាយុទ្ធ ចាន់អូចា។
តុលាការធម្មនុញ្ញថៃនៅថ្ងៃសុក្រ ទី ៣០ ខែកញ្ញាម្សិលមិញបានប្រកាសថា លោក ប្រាយុទ្ធ ចាន់អូចា អាចបន្តតំណែងជានាយករដ្ឋមន្ដ្រីបន្តទៀតបាន។ សមាជិកតុលាការធម្មនុញ្ញថៃចំនួន ៩ នាក់បានបោះឆ្នោតក្នុងសំឡេង ៦ ទល់នឹង ៣ សម្រេចថា ការបន្តតំណែងជានាយករដ្ឋមន្ដ្រីរបស់លោក ប្រាយុទ្ធ មិនបំពានទៅលើមាត្រាចែងក្នុងរដ្ឋធម្មនុញ្ញ ដែលកំណត់អាណត្តិនាយករដ្ឋមន្ដ្រីត្រឹម ២ អាណត្តិ ឬស្មើនឹងរយៈពេល ៨ ឆ្នាំនោះឡើយ។
ការប្រកាសរបស់តុលាការធម្មនុញ្ញថៃដូច្នេះ ធ្វើឡើងជាងមួយខែ បន្ទាប់ពីលោក ប្រាយុទ្ធ ត្រូវព្យួរតំណែងជាបណ្ដោះអាសន្ន តាមបណ្ដឹងរបស់ក្រុមសមាជិកសភាបក្សប្រឆាំង។ ជាបណ្ដឹងដែលចោទប្រកាន់លោក ប្រាយុទ្ធ ថា រំលោភរដ្ឋធម្មនុញ្ញឆ្នាំ ២០១៧ ដោយបានកាន់តំណែងជានាយករដ្ឋមន្ដ្រីលើសរយៈពេល ៨ ឆ្នាំ បើរាប់ពីពេលលោកក្លាយជានាយករដ្ឋមន្ដ្រី ក្រោយធ្វើរដ្ឋប្រហារយោធាក្នុងឆ្នាំ ២០១៤។
លោក ប្រាយុទ្ធ ចាន់អូចា ឡើងកាន់តំណែងជានាយករដ្ឋមន្ដ្រីនៅខែកញ្ញា ឆ្នាំ ២០១៤ ក្រោយពេលធ្វើរដ្ឋប្រហារយោធា ទម្លាក់រដ្ឋាភិបាលស្របច្បាប់របស់លោកស្រី យីងឡាក់។ លោកបានឈ្នះការបោះឆ្នោតនៅឆ្នាំ ២០១៩ និងបានបន្តតំណែងជានាយករដ្ឋមន្ដ្រីរហូតមកទល់ខែកញ្ញា ឆ្នាំ ២០២២ នៅពេលដែលតុលាការធម្មនុញ្ញថៃសម្រេចព្យួរតំណែងលោកជាបណ្ដោះអាសន្នតាមបណ្ដឹងរបស់សមាជិកសភាបក្សប្រឆាំង។
សម្រាប់អ្នកគាំទ្រលោក ប្រាយុទ្ធ ចាន់អូចា ការកាន់តំណែងផ្លូវការជានាយករដ្ឋមន្ដ្រីរបស់លោក ត្រូវរាប់ចាប់ពីពេលរដ្ឋធម្មនុញ្ញថ្មីរបស់ថៃចូលជាធរមាននៅក្នុងខែមេសា ឆ្នាំ ២០១៧។ នេះមានន័យថា លោក ប្រាយុទ្ធ ចាន់អូចា អាចកាន់តំណែងជានាយករដ្ឋមន្ដ្រីបន្តទៀតបានរហូតដល់ឆ្នាំ ២០២៥ ប្រសិនបើលោកឈ្នះការបោះឆ្នោតជាតិ ដែលគ្រោងរៀបចំធ្វើនៅថ្ងៃទី ០៧ ខែឧសភា ឆ្នាំ ២០២៣។
បើទោះបីជាតុលាការធម្មនុញ្ញថៃបានសម្រេចដូច្នេះក៏ដោយ ក៏គេមិនទាន់អាចធានាបានទាំងស្រុងថា លោកនឹងអាចឈ្នះការបោះឆ្នោតនៅឆ្នាំក្រោយបាននោះទេ ព្រោះសព្វថ្ងៃនេះ ប្រជាប្រិយភាពរបស់លោកធ្លាក់ចុះយ៉ាងគំហុក ក្រោមការរិះគន់ជុំទិសអំពីការគ្រប់គ្រងសេដ្ឋកិច្ចមិនបានល្អ ក្នុងអំឡុងពេលដែលប្រទេសថៃ និយាយដោយឡែក និងពិភពលោកទាំងមូល និយាយជារួម រងគ្រោះដោយសារវិបត្តិជំងឺឆ្លងសកលកូវីដ ១៩ នាពេលកន្លងមក។
អ្នកវិភាគនយោបាយថៃមួយចំនួនទៀតដែលមាននិន្នាការប្រឆាំងនឹងរដ្ឋាភិបាលយោធារបស់លោក ប្រាយុទ្ធ បានថ្លែងបែបចម្អកថា មួយខែកន្លងមកនេះ នៅពេលដែលលោក ប្រាយុទ្ធ ត្រូវព្យួរតំណែង ប្រទេសថៃនៅតែអាចដំណើរការបានជាធម្មតា។ ពួកគេលើកឡើងថា៖ «ប្រទេសថៃ គ្មាន ប្រាយុទ្ធ គ្មានបញ្ហា»។
ដោយឡែក ក្រុមអ្នកគាំទ្រប្រជាធិបតេយ្យវិញបានព្រមានចុះផ្លូវធ្វើបាតុកម្ម ប្រឆាំងនឹងសេចក្ដីសម្រេចរបស់តុលាការធម្មនុញ្ញថៃ។ នៅតាមបណ្ដាញសង្គម ទាំង Facebook និង Twitter ក្រុមគាំទ្រប្រជាធិបតេយ្យឈ្មោះ «រ៉ាតសាដន ឬ ប្រជារាស្ត្រ» ប្រកូកប្រកាសឱ្យគ្នីគ្នារបស់ខ្លួនស្លៀកពាក់ខ្មៅនៅសប្ដាហ៍ក្រោយ ដើម្បី «កាន់ទុក្ខចំពោះមរណភាពនៃអនាគតរបស់ប្រទេសថៃ»៕
