ចំនួនមនុស្សស្លាប់កើនឡើងដល់ជិត ២០០នាក់ដោយសារការថប់ដង្ហើមក្នុងឧបទ្ទវហេតុរត់ជាន់គ្នានៅព្រឹត្តិការណ៍ប្រកួតបាល់ទាត់នៅទីក្រុង Malaang ក្នុងខេត្ត East Java ប្រទេសឥណ្ឌនេស៊ីរវាងក្រុមបាល់ទាត់ Arema FC និង Persebaya Surabaya កាលពីយប់ថ្ងៃសៅរ៍។
យោងតាមការផ្សាយរបស់ BBC នៅរសៀលថ្ងៃអាទិត្យនេះ អ្នកស្លាប់បានកើនដល់ប្រហែល១៧៤នាក់ ខណៈពេលដែលការប្រកាសពីដំបូងការស្លាប់មានចំនួន ១៣០នាក់ រីឯអ្នករងរបួសប្រមាណ ១៨០នាក់។
លោក Nico Afinta ស្នងការនគរបាលខេត្ត East Java បាននិយាយនៅក្នុងសន្និសីទសារព័ត៌មានមួយថា ភាពចលា ចលនេះ បានជំរុញឱ្យប៉ូលិសបាញ់ឧស្ម័នបង្ហូរទឹកភ្នែកដែលបណ្តាលឱ្យមានការភ័យស្លន់ស្លោ។ តួលេខអ្នកស្លាប់ហាក់មានការភ័ន្តច្រឡំ ដោយគណៈកម្មាធិការសិទ្ធិមនុស្សជាតិគាំទ្រដោយរដ្ឋាភិបាល បាននិយាយថា មនុស្ស ១៥៣នាក់បានស្លាប់ ខណៈដែលក្លិបបាល់ទាត់Arema បានដាក់ចំនួន១៨២នាក់។ នេះបើយោងតាមការចេញផ្សាយរបស់ New York Times។
ប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) នៅថ្ងៃអាទិត្យនេះ បានបញ្ជាឱ្យបញ្ឈប់ការប្រកួតបាត់ទាត់ក្រមខ័ណ្ឌបាល់ទាត់កំពូល ( Liga 1) ដែលជាផ្នែកបាល់ទាត់អាជីពកំពូលរបស់ប្រទេសឥណ្ឌូនេស៊ី បន្ទាប់ពីព្រឹត្តិ ការណ៍រត់ជាន់គ្នាបណ្តាលឱ្យមនុស្សបាត់បង់ជីវិត និងរងរបួសរហូតដល់ជាង ៣០០នាក់ កាលថ្ងៃសៅរ៍ ដោយលោកបានហៅព្រឹត្តិការណ៍នេះជា «សោកនាដកម្មបាល់ទាត់ចុងក្រោយនៅក្នុងប្រទេស»។
នៅក្នុងសេចក្តីថ្លែងការណ៍តាមទូរទស្សន៍កាលពីថ្ងៃអាទិត្យ ប្រធានាធិបតីដែលនឹងអាណត្តិនៅដើមឆ្នាំ២០២៤ លោក ចូកូ វីដូដូ បានបញ្ជាឱ្យអាជ្ញាធរវាយតម្លៃឡើងវិញយ៉ាងហ្មត់ចត់នូវសុវត្ថិភាព នៅក្នុងការប្រកួតបាល់ទាត់ ខណៈពេលដែលមន្ត្រីសន្តិសុខឥណ្ឌូនេស៊ី បានអះអាងថា ចំនួនមនុស្សចូលទស្សនា បានលើសសមត្ថភាពផ្ទុករបស់ទីលានកីឡដ្ឋាននោះ។
លោក Mahfud MD ប្រធានរដ្ឋមន្ត្រីសន្តិសុខរបស់ប្រទេសឥណ្ឌូនេស៊ី បាននិយាយកាលពីថ្ងៃអាទិត្យថា ចំនួនអ្នកទស្សនាលើសពីសមត្ថភាពរបស់កីឡដ្ឋាន។ នៅក្នុងការ បង្ហោះ Instagram លោកបាននិយាយថាសំបុត្រចូលរួមទស្សនាត្រូវបានលក់អស់ចំនួន ៤២ ០០០ សម្រាប់កីឡដ្ឋានដែលមានសមត្ថភាពផ្ទុកមនុស្សបាន ៣៨ ០០០ប៉ុណ្ណោះ។
យោងតាម New York Times តួលេខស្លាប់ និងរបួសនឹងធ្វើឱ្យការប្រកួតនៅថ្ងៃសៅរ៍ ក្នុងចំណោមវគ្គដែលមានអ្នកស្លាប់ច្រើនបំផុតក្នុងប្រវត្តិសាស្ត្របាល់ទាត់។
នៅឆ្នាំ១៩៦៤ មនុស្សយ៉ាងតិច ៣០០នាក់ បានស្លាប់នៅក្នុងប្រទេសប៉េរូ បន្ទាប់ពីការសម្រេចចិត្តដែលមិនពេញនិយមដោយអាជ្ញាកណ្តាលនៅក្នុងការប្រកួតបាល់ទាត់មួយបានធ្វើឱ្យមានការបះបោរនៅពហុកីឡដ្ឋានជាតិរបស់ប្រទេសនេះ៕