.jpg)
រថយន្ត១គ្រឿងឆេះនៅលើផ្លូវ១នៅក្បែរទីក្រុង Izyumនៃអ៊ុយក្រែនភាគ ខាងកើតនៅថ្ងៃទី១ តុលា ស្របពេលរុស្ស៊ីលុកលុយអ៊ុយក្រែន ។ AFP
កងកម្លាំងអ៊ុយក្រែន នៅថ្ងៃទី ១ ខែតុលា បានឱ្យដឹងថា អ៊ុយក្រែនអាចដណ្តើមយកទីក្រុង Lyman ដែលស្ថិតនៅភាគខាងកើត ពីរុស្ស៊ីមកវិញហើយ ដោយទីក្រុង នេះ គឺជាចំណុចយុទ្ធសាស្ត្រសំខាន់ ដែលអ៊ុយក្រែន នឹងប្រើជាបន្ទាយរឹងមាំ ដើម្បីវាយយកតំបន់ Donbas មកវិញ ខណៈការរងបរាជ័យចុងក្រោយនេះ បានជំរុញឱ្យសម្ព័ន្ធមិត្តជិតស្និទ្ធរបស់ប្រធានាធិបតី លោក វ្ល៉ាឌីមៀរ ពូទីន ដាក់សម្ពាធលើរុស្ស៊ីឱ្យចាប់ផ្តើមប្រើអាវុធនុយក្លេអ៊ែរកម្រិតទាប ដើម្បីតបតវិញ។
ការដណ្តើមបានទីក្រុងដ៏សំខាន់នេះ កើតឡើងតែ ១ ថ្ងៃ បន្ទាប់ពីលោក ពូទីន បានប្រកាសបញ្ចូលតំបន់អ៊ុយក្រែនចំនួន៤ ជាផ្នែកនៃទឹកដីរុស្ស៊ី ដោយក្នុងនោះមានរួមទាំងតំបន់ Donetsk ដែលជាទីតាំងរបស់ទីក្រុង Liman ចំពេលមានការប្រឆាំងពីប្រទេសលោកខាងលិច ដែលលើកឡើងថា ជាការធ្វើប្រជាមតិក្លែងក្លាយ។
កាលពីម្សិលមិញ លោក Kyrylo Tymoshenko អនុប្រធានរបស់វិមានប្រធានាធិបតីអ៊ុយក្រែន បាននាំយកឃ្លីបវីដេអូ ដែលកងទ័ពអ៊ុយក្រែន ប្រកាសពីជ័យជម្នះ មកផ្សព្វផ្សាយ តាមបណ្តាញសង្គម ដោយបង្ហាញឱ្យឃើញនូវរូបភាពទាហានអ៊ុយក្រែនដកទង់ជាតិរុស្ស៊ីចោល ហើយដោតទង់ជាតិអ៊ុយក្រែន នៅលើអគារសភា ក្នុងក្រុង Lyman ជំនួសវិញ។
ជាមួយគ្នានេះ ក្រសួងការពារជាតិរុស្ស៊ី បានប្រកាសនៅថ្ងៃដដែលនោះថា អាជ្ញាធរបានសម្រេចដកទ័ពចេញពីតំបន់នោះ ដោយកន្លងមក រុស្ស៊ីធ្លាប់បានប្រើប្រាស់ក្រុង Liman ជាមជ្ឈមណ្ឌលភស្តុភា និងការដឹកជញ្ជូន សម្រាប់ប្រតិបត្តិការ នៅភាគខាងជើងនៃតំបន់ Donetsk។
ស្ថានការណ៍នេះ បានធ្វើឱ្យសម្ព័ន្ធមិត្តរបស់លោក ពូទីន មានការក្រេវក្រោធ ក្នុងនោះរួមទាំងមេដឹកនាំសាធារណរដ្ឋ Chechen លោក Ramzan Kadyrov ដែលបាននិយាយថា រុស្ស៊ីគួរតែចាត់វិធានការខ្លាំងក្លាជាងនេះ ដូចជាការប្រកាសច្បាប់អាជ្ញាសឹក នៅតំបន់ព្រំដែន និងការប្រើអាវុធនុយក្លេអ៊ែរកម្រិតទាប ខណៈអតីតប្រធានាធិបតីរុស្ស៊ី លោក Dmitry Medvedev បានចេញមកបញ្ជាក់ច្បាស់ៗថា រុស្ស៊ីគួរតែប្រើអាវុធនុយក្លេអ៊ែរ ប្រសិនបើមានករណីចាំបាច់៕
វីដេអូ៖
