The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​ការពារ​ជាតិ​អាមេរិក អូស្ត្រាលី និង​ជប៉ុនជួប​ប្រជុំ​គ្នា ខណៈ​ស្ថានភាព​សន្តិសុខ ប្រឈម​គ្រោះថ្នាក់​ខ្លាំង​ឡើងៗ

រដ្ឋមន្ត្រី​ការពារ​ជាតិ​អាមេរិក អូស្ត្រាលី និង​ជប៉ុនជួប​ប្រជុំ​គ្នា ខណៈ​ស្ថានភាព​សន្តិសុខ ប្រឈម​គ្រោះថ្នាក់​ខ្លាំង​ឡើងៗ

Content image - Phnom Penh Post
លោក Austin (ឆ្វេង​ទី៣) និង​លោក Marles (ឆ្វេង​ទី២) កំពុង​ទស្សនា​នាវាមុជទឹក USS Mississippi នៅ Pearl Harbor ក្នុង​រដ្ឋ​ហា​វ៉ៃ កាលពី​ថ្ងៃទី ១ ខែតុលា។ AFP​

រដ្ឋមន្ត្រី​ការពារ​ជាតិ​អាមេរិក អូស្ត្រាលី និង​ជប៉ុនជួប​ប្រជុំ​គ្នា ខណៈ​ស្ថានភាព​សន្តិសុខ ប្រឈម​គ្រោះថ្នាក់​ខ្លាំង​ឡើងៗ

រដ្ឋមន្ត្រី​ការពារ​ជាតិ​នៃ​ប្រទេស​ដ៏​មាន​ឥទ្ធិពល​ចំនួន ៣ នៅ​តំបន់​ឥណ្ឌូ-ប៉ាស៊ីហ្វិក បាន​ជួប​ប្រជុំ​គ្នា ក្នុងអំឡុងពេល​វិបត្តិ​សន្តិសុខ​សកលលោក ជាពិសេស​តំបន់​អឺរ៉ុប​ខាងកើត និង​ច្រកសមុទ្រ​តៃវ៉ាន់ កាន់តែ​ឡើង​កម្តៅ ខណៈ​ជំនួប​នេះ បាន​លើកឡើង​ពី​ក្តី​ព្រួយបារម្ភ​នូវ​ស្ថានភាព​សង្គ្រាម នៅ​អ៊ុយក្រែន ដែល​បង្កឡើង​ដោយ​រុស្ស៊ី និង​សភាពការណ៍​ច្រកសមុទ្រ​តៃវ៉ាន់ ដែល​កំពុង​ប្រឈម​នឹង​មហាយក្ស​ចិន។

រដ្ឋមន្ត្រី​ការពារ​ជាតិ​អាមេរិក លោក Lloyd Austin លោក Richard Marles ឧបនាយក​រដ្ឋមន្ត្រី និង​ជារ​ដ្ឋ​មន្ត្រី​ការពារ​ជាតិ​អូស្ត្រាលី និង​លោក Hamada Yasukazu រដ្ឋមន្ត្រី​ការពារ​ជាតិ​ជប៉ុន បាន​ជួប​ប្រជុំ​សម្រាប់​ជំនួប​រដ្ឋមន្ត្រី​ការពារ​ជាតិ​ត្រីភាគី (TDMM) នៅ​ទី​ក្រុង​ហូ​ណូ​លូ​លូ នៅ​រដ្ឋ​ហា​វ៉ៃ សហរដ្ឋអាមេរិក កាលពី​ថ្ងៃទី ១ ខែតុលា ដោយ​ការ​ជួបគ្នា​នេះ ក៏​ហាក់​ស្រប​ពេល​ដែល​មេដឹកនាំ​រុស្ស៊ី​បង្កើន​ការ​គំរាមកំហែង​លើ​លទ្ធភាព​នៃ​ការប្រើ​ប្រាស់​អាវុធ​នុយក្លេអ៊ែរ កាន់តែ​ខ្លាំង​ឡើងៗ ដោយសារ​កងទ័ព​រុស្ស៊ី​ប្រយុទ្ធ​ចាញ់​អ៊ុយក្រែន ដែល​បណ្តាល​ឱ្យ​បាត់បង់​ក្រុង​ជាបន្តបន្ទាប់។

យោង​តាម​គេហទំព័រ​ក្រសួងការពារជាតិ​អាមេរិក ថ្នាក់ដឹកនាំ​ក្រសួងការពារជាតិ​នៃ​ប្រទេស​ទាំង ៣ បាន​ជួប​ប្រជុំ ដើម្បី​ត្រួតពិនិត្យ​មើល​វឌ្ឍនភាព​លើ​ការ​ផ្តួចផ្តើម​ជាក់ស្តែង​ជាច្រើន ដែល​ត្រូវ​បាន​លើក​មក​ពិភាក្សា នៅ​ឯកិច្ចប្រជុំ​រដ្ឋមន្ត្រី​ការពារ​ជាតិ​ត្រីភាគី កាលពី​ខែមិថុនា នៅ​ប្រទេស​សិង្ហបុរី ។

ក្នុង​ជំនួប​នោះ រដ្ឋមន្ត្រី​នៃ​ប្រទេស​នី​មួយៗ បាន​ផ្លាស់​ប្តូរ​យោបល់​ពី​បរិយាកាស​សន្តិសុខ ក្នុង​តំបន់ និង​ពិភាក្សា​អំពី​ការ​ពង្រឹង​កិច្ច​សហប្រតិបត្តិ​ការ​លើ​វិស័យ​ការពារ​ជាតិ​ត្រីភាគី ដោយ​បង្កើន​ការចែក​រំលែក​ព័ត៌មាន លំហាត់​សមយុទ្ធ និង​គំនិត​ផ្តួចផ្តើម​វិទ្យាសាស្ត្រ ព្រមទាំង​បច្ចេកវិទ្យា។ ជាមួយនឹង​ជំនួប TDMM ទី ២ នៃ​ឆ្នាំ ២០២២ ដោយ​អះអាង​ឡើងវិញ​នូវ​ការ​តម្រឹម​យុទ្ធសាស្ត្រ ក្នុងចំណោម​មេដឹកនាំ​ទាំង ៣ រដ្ឋមន្ត្រី​បាន​ប្តេជ្ញា​ចាត់វិធានការ​ម៉ឺងមាត់ និង​ជាក់ស្តែង​រួមគ្នា ដើម្បី​ធ្វើ​ឱ្យ​មាន​លំនឹង​នៃ​ស្ថិរភាព និង​វិបុលភាព ក្នុង​តំបន់​ឥណ្ឌូ-ប៉ាស៊ីហ្វិក។

យោង​តាម​ក្រសួងការពារជាតិ​ជប៉ុន រដ្ឋមន្ត្រី​ការពារ​ជាតិ​ជប៉ុន ក្នុង​កិច្ចប្រជុំ​ត្រីភាគី​នោះ រដ្ឋមន្ត្រី​ទាំង ៣ បាន​ចែករំលែក​ការ​ព្រួយបារម្ភ​អំពី​ស្ថានភាព នៅ​សមុទ្រ​ចិន​ខាងកើត និង​ខាងត្បូង ហើយ​បញ្ជាក់​ជាថ្មី​ថា ពួក​គេ​ប្រឆាំង​នឹង​ការប៉ុនប៉ង​ឯកតោភាគី​ណាមួយ ក្នុង​ការ​ផ្លាស់​ប្តូរ​ស្ថានភាព ដោយ​កម្លាំង ឬសកម្មភាព​ឯកតោភាគី​ណាមួយ ដែល​ស្វែងរក​ការ​បង្កើន​ភាព​តានតឹង ក្នុង​តំបន់។ ដូចគ្នា​នេះ​ផង​ដែរ លោក​រដ្ឋមន្ត្រី​ទាំង៣បាន​ថ្កោលទោស​យ៉ាង​ខ្លាំង ចំពោះ​ការ​បាញ់​មី​ស៊ី​លផ្លោង​របស់​ចិន កាលពីដើម​ខែសីហា រួម​ទាំង​ការ​បាញ់បង្ហោះ ដែល​ជប៉ុន រាយការណ៍​ថា បាន​ធ្លាក់​នៅ​ដែនទឹក​ក្បែរ​ប្រទេស​ជប៉ុន រួម​ទាំង EEZ (តំបន់​សេដ្ឋកិច្ច​ពិសេស ដែល​កំណត់​ដោយ​អនុសញ្ញា​អង្គការសហប្រជាជាតិ​ស្តី​ពី​ច្បាប់​សមុទ្រ ឆ្នាំ ១៩៨២ ) ផង​ដែរ។

តាមរយៈ​សេចក្តី​ថ្លែងការណ៍​របស់ក្រ​សួង​ការពារ​ជាតិ រដ្ឋ​មន្ត្រី​ការ​ពា​ជាតិ​ជប៉ុន បាន​រំឭក​ឡើងវិញ​ពីសា​រៈសំ​ខាន់​នៃ​សន្តិភាព និង​ស្ថិរភាព នៅ​ទូទាំង​ច្រកសមុទ្រ​តៃវ៉ាន់ ហើយ​ឯកភាព​ក្នុង​ការ​លើកទឹកចិត្ត​ដោះស្រាយ ដោយសន្តិវិធី​លើ​បញ្ហា​ឆ្លង​ច្រកសមុទ្រ។ លើស​ពី​ការសម្ដែង​នូវ​ការ​បារម្ភ លោក Yasukazu បាន​អះអាង​នូវ​ការ​ផ្លាស់​ប្តូរ​ទស្សនៈ​អំពី​ស្ថានភាព ក្នុង​តំបន់ និង​បញ្ជាក់​ជាថ្មី​ថា ប្រទេស​ទាំង ៣ នឹង​បន្ត​ធ្វើការ​ជាមួយគ្នា​យ៉ាង​ជិតស្និទ្ធ ចំ​ពេល​មានការ​ឈ្លានពាន​របស់​រុស្ស៊ី​លើ​អ៊ុយក្រែន ដែល​ធ្វើ​ឱ្យ​រង្គោះរង្គើ​មូលដ្ឋាន​គ្រឹះ​នៃ​សណ្តាប់​ធ្នាប់​អន្តរជាតិ។

សេចក្តី​ថ្លែងការណ៍​ពី​ក្រសួងការពារជាតិ​ជប៉ុន បាន​លើកឡើង​ថា៖ «រដ្ឋមន្ត្រី​ទាំង ៣ បាន​អះអាង​សាជាថ្មី​ថា នឹង​ពង្រីក និង​ពង្រឹង​ការ​បណ្តុះបណ្តាល និង​សកម្មភាព​ត្រីភាគី ក៏ដូចជា​ជំរុញ​កិច្ច​សហប្រតិបត្តិ​ការ​លើ​វិស័យ​ឧបករណ៍​ការពារ​ជាតិ និង​បច្ចេកវិទ្យា ព្រមទាំង​ផ្លាស់​ប្តូរ​ព័ត៌មាន​ប្រកបដោយ​ប្រសិទ្ធភាព ក្នុង​បំណង​លើកកម្ពស់​អន្តរ​ប្រតិបត្តិ​ការ​ត្រីភាគី»។

ចំណែក​ក្រសួងការពារជាតិ​អូស្ត្រាលី​វិញ ក្រោយ​កិច្ចប្រជុំ​នោះ បាន​ចេញផ្សាយ​ថា អំឡុង​ជួប​ជាមួយ​រដ្ឋមន្ត្រី​ការពារ​ជាតិ​ជប៉ុន ក្នុង​លក្ខណៈ​ទ្វេភាគី រដ្ឋមន្ត្រី​ការពារ​ជាតិ​អូស្ត្រាលី​បញ្ជាក់​ឡើងវិញ​នូវ​ការ​ប្តេជ្ញា​ចិត្ត​របស់​អូស្ត្រាលី ចំពោះ​ភាពជា​ដៃគូ ក្នុង​វិស័យ​ការពារ​ជាតិ ដែល​កំពុង​រីកចម្រើន​ជាមួយ​ជប៉ុន និង​មាន​វឌ្ឍនភាព​យ៉ាង​ខ្លាំង ក្នុង​ឆ្នាំនេះ ជាក់ស្តែង ការ​ចុះហត្ថលេខា​នៃ​កិច្ច​ព្រមព្រៀង​ចូល​ប្រើប្រាស់​គ្នា​ទៅវិញទៅមក ក្នុង​ខែមករា។

ឧបនាយក​រដ្ឋមន្ត្រី និង​ជារ​ដ្ឋ​មន្ត្រី​ការពារ​ជាតិ​អូស្ត្រាលី លោក Marles បាន​ថ្លែង​ថា៖ «ស្ថានភាព​យុទ្ធសាស្ត្រ​លំបាក នា​ពេល​បច្ចុប្បន្ន​នេះ មានន័យថា ការ​តម្រឹម​គ្នា រវាង​ប្រជាជាតិ​របស់​យើង​មិនដែល​មាន​ភាពរឹងមាំ ឬសំខាន់​ជាង​នេះ​ទេ»។

លោក​បន្ត​ថា៖ «ខ្ញុំ​ប្តេជ្ញា​ចិត្ត​ក្នុង​ការ​វិវឌ្ឍ​សម្ព័ន្ធភាព​អូស្ត្រាលី​សហរដ្ឋអាមេរិក ដើម្បី​ឆ្លើយតបទៅនឹង​បរិយាកាស​យុទ្ធសាស្ត្រ​តឹង​តែង​ឡើងៗ។ បណ្តាញ​សម្ព័ន្ធភាព និង​ភាពជា​ដៃគូ​របស់​យើង គឺជា​កម្លាំង​ដ៏​សំខាន់​ក្នុង​ការ-លើកកម្ពស់​ចក្ខុវិស័យ​សម្រាប់​ឥណ្ឌូ-ប៉ាស៊ីហ្វិក ប្រកប​ដោយ​បរិ​យា​ប័ន្ន សុវត្ថិភាព និង​វិបុលភាព»។

ភាព​តានតឹង​ខ្លាំង​បំផុត នៅ​ច្រក​តៃវ៉ាន់ កើតឡើង បន្ទាប់ពី​មានដំណើរ​ទស្សនកិច្ច​របស់​ប្រធាន​សភា​អាមេរិក លោកស្រី ណាន់​ស៊ី ប៉េ​ឡូ​ស៊ី ទៅកាន់​កោះ​តៃវ៉ាន់ ដែល​ចិន អះអាង​ជា​ខេត្ត​ចំណុះ​របស់​ខ្លួន ដោយ​ចាត់ទុក​ដំណើរ​ទស្សនកិច្ច​នោះ​ជា​ការ​ជ្រៀតជ្រែក​ផ្ទៃក្នុង​របស់​ចិន។

កងទ័ព​រំដោះប្រជាជន​ចិន ចាប់ផ្តើម​សមយុទ្ធ​យោធា​ទ្រង់ទ្រាយ​ធំ ដោយ​ការ​បាញ់​មី​ស៊ី​ល នៅ​តំបន់​ចំនួន ៦ នៃ​ដែនទឹក​របស់​កោះ​តៃវ៉ាន់ ដើមខែ​សីហា ពោល​គឺ ១ ថ្ងៃ​ប៉ុណ្ណោះ ក្រោយ​ទស្សនកិច្ច​នោះ​បាន​បញ្ចប់។

ដោយសារតែ​ផែនការ​បាញ់​នេះ អាជ្ញាធរ​ចិន​បាន​ព្រមាន​មិន​អនុញ្ញាត​ឱ្យ​យន្តហោះ​ស៊ីវិល និង​កប៉ាល់​ចូលក្នុង​តំបន់​ទាំង ៦ ដែល​កំពុង​មាន​បញ្ហា។ បើ​យោង​តាម​ក្រសួងការពារជាតិ​ជប៉ុន កាំជ្រួច​មី​ស៊ី​លផ្លោង​ចំនួន ៥ គ្រាប់​របស់ Dongfeng ដែល​ចិន​បាញ់ បាន​ធ្លាក់​នៅ​តំបន់​សេដ្ឋកិច្ច​ពិសេស​របស់​ជប៉ុន កាលពី​ថ្ងៃទី ៤ ខែសីហា។

ភាព​តានតឹង​ខ្លាំង នៅ​អឺរ៉ុប​ខាងកើត​ចុងក្រោយ​នេះ គឺ​លោក Dmitry Medvedev អនុប្រធាន​ក្រុមប្រឹក្សា​សន្តិសុខ​រុស្ស៊ី ដែល​កំពុង​ធ្វើសង្គ្រាម​នៅ​តំបន់​ភាគ​ខាងកើត និង​ខាងត្បូង​អ៊ុយក្រែន បាន​និយាយ​កាលពី​ចុង​សប្ដាហ៍​មុន​ថា ការ​ស្នើសុំ​ចូល​ជាស​មា​ជិ​ករបស់​អង្គការ​ណា​តូ​របស់​អ៊ុយក្រែន គឺជា​ការ​ពន្លឿន​នូវ​ការ​ចាប់ផ្តើម​នៃ​សង្គ្រាមលោក​លើក​ទី៣៕

វីដេអូ៖

អត្ថបទគួរចាប់អារម្មណ៍