ប្រតិបត្តិករនៃបំពង់បង្ហូរហ្គាសក្រោមសមុទ្របាល់ទិកចំនួន ២ ដែលភ្ជាប់ពីរុស្ស៊ីទៅអាល្លឺម៉ង់បានអះអាងថា អាជ្ញាធរដាណឺម៉ាក និងស៊ុយអែត មិនអនុញ្ញាតឱ្យពួកគេចូលពិនិត្យមើលកន្លែងដែលបំពង់លេចធ្លាយកាលពីសប្ដាហ៍មុននោះទេ។
ការអះអាងនេះ ធ្វើឡើង ខណៈដែលអឺរ៉ុបកំពុងស៊ើបអង្កេតពីមូលហេតុដែលបណ្តាលមានការលេចធ្លាយចំនួន ៤ កន្លែង លើបំពង់បង្ហូរហ្គាស Nord Stream1 និង Nord Stream2 ដែលគេសង្ស័យថា ជាការបំផ្លិចបំផ្លាញដោយក្រុមណាមួយ។
ក្រុមហ៊ុន Nord Stream 2 AG ដែលជាប្រតិបត្តិករនៃបំពង់បង្ហូរហ្គាស មានមូលដ្ឋាននៅប្រទេសស្វ៊ីសបានលើកឡើងកាលពីថ្ងៃអង្គារថា ខ្លួននឹងពិនិត្យមើលស្ថានភាពនៃបំពង់បង្ហូរ នៅពេលប៉ូលិសបញ្ជប់ការស៊ើបអង្កេតរបស់ខ្លួន ហើយការរឹតត្បិតត្រូវបានដកចេញ។
ក្រុមហ៊ុនអះអាងថា ប៉ូលិសទីក្រុងកូប៉ិនហាក កំពុងធ្វើការស៊ើបអង្កេតនៅកន្លែងលេចធ្លាយ Nord Stream 2 នៅក្នុងតំបន់សេដ្ឋកិច្ចផ្តាច់មុខ (EEZ) របស់ដាណឺម៉ាក ខណៈឆ្មាំឆ្នេរសមុទ្រស៊ុយអែត បានបិទតំបន់ជុំវិញការលេចធ្លាយនៅក្នុង EEZ របស់ស៊ុយអែត។
ក្នុងថ្ងៃដដែលជាមួយគ្នា ក្រុមហ៊ុន Nord Stream AG ដែលជាប្រតិបត្តិករនៃបំពង់បង្ហូរ Nord Stream 1 អះអាងថា អាជ្ញាធរដាណឺម៉ាកប្រាប់ខ្លួនថា ដើម្បីអាចចូលត្រួតពិនិត្យបាន លុះត្រាតែមានលិខិតអនុ ញ្ញាតចាំបាច់ ដែលចំណាយពេល ២០ ថ្ងៃ ដើម្បីធ្វើវា។
ក្រុមហ៊ុន Nord Stream1 និយាយក្នុងសេចក្ដីប្រកាសថា យោងតាមអាជ្ញាធរស៊ុយអែត ការហាមឃាត់លើការដឹកជញ្ជូន ការបោះយុថ្កា ការមុជទឹក ការប្រើប្រាស់យានជំនិះក្រោមទឹក ការធ្វើផែនទីភូមិសាស្ត្រជាដើម ត្រូវបានដាក់ចេញ ដើម្បីធ្វើការស៊ើបអង្កេត។
គួរបញ្ជាក់ថា បំពង់ទាំង ២ មិនដំណើរការនោះទេ ប៉ុន្តែមានផ្ទុកហ្គាស។ លេចធ្លាយនេះ បង្កឱ្យមានការចង្អុលមុខគ្នាទៅវិញទៅមក ដោយប្រយោលទៅវិញទៅមក ដោយលោកខាងលិចហៅវាថា ជាការបំផ្លិចបំផ្លាញដោយចេទនា ទាំងមិនចង្អុលចំដាក់ក្រុងម៉ូស្គូ ស្របពេលដែលរុស្ស៊ីលើកឡើងថា សហរដ្ឋអាមេរិកជាអ្នកឈរចាំទទួលបានប្រយោជន៍។ តាមសេចក្ដីរាយការណ៍ផ្សេងៗគ្នា ហ្គាសនៅក្នុងបំពង់បង្ហូរលែងផុលចេញមកលើផ្ទៃទឹកទៀតហើយ គិតមកត្រឹមថ្ងៃចន្ទ៕