សេចក្តីរាយការណ៍របស់ភ្នាក់ងារព័ត៌មានតួកគីឱ្យដឹងថា ប្រទេសអាស៊ែបៃហ្សង់ (Azerbaijan) ដែលមានប្រទេសតួកគី ជាអ្នកគាំទ្រដ៏សំខាន់ក្នុងវិស័យការពារជាតិរបស់ខ្លួនបានផ្តល់កិត្តិយសដល់រដ្ឋមន្ត្រីការពារជាតិតួកគី Hulusi Akar ដោយការផ្តល់មេដាយកិត្តិយស ដែលមានឈ្មោះថា «មេដាយនៃកិច្ចសហប្រតិបត្តិការក្នុងវិស័យឧស្សាហកម្មការពារជាតិអាស៊ែបៃហ្សង់ (Medal of Cooperation in the Field of Defense Industry of Azerbaijan)។
លោក Hulusi Akar រដ្ឋមន្ត្រីការពារជាតិតួកគី បានបំពេញទស្សនកិច្ចនៅប្រទេសអាស៊ែបៃហ្សង់ កាលពីថ្ងៃអង្គារ គឺមានរយៈពេលប្រហែល ៣ សប្តាហ៍ បន្ទាប់ពីកងទ័ពនៃប្រទេសនេះបានប៉ះទង្គិចបង្ហូរឈាមជាមួយកងទ័ពអាមេនី ដែលមានការគាំទ្រដោយប្រទេសរុស្ស៊ីដែល កំពុងជាប់ដៃក្នុងសង្គ្រាមនៅប្រទេសអ៊ុយក្រែន។
យោងតាមការផ្សាយរបស់ទីភ្នាក់ងារព័ត៌មានតួកគី Anadolu លោករដ្ឋមន្ត្រី Hulusi Akar ត្រូវបានរៀបពិធីទទួលស្វាគមន៍យ៉ាងអធិកអធមជាមួយនឹងពិធីយោធានៅក្រសួងការពារជាតិដែលជាផ្នែកមួយនៃដំណើរទស្សនកិច្ចផ្លូវការរបស់គាត់ទៅកាន់រដ្ឋធានីបាគូ (Baku) របស់ប្រទេសអាស៊ែបៃហ្សង់ និងបានផ្តល់រង្វាន់ «មេដាយនៃកិច្ចសហប្រតិបត្តិការក្នុងវិស័យឧស្សាហកម្មការពារជាតិ Azerbaijan» ដោយរដ្ឋមន្ត្រីការពារជាតិអាស៊ែបៃហ្សង់ លោក Madat Guliyev ក្នុងនាមប្រធានាធិបតី Ilham Aliyev។
យោងតាមការផ្សាយនោះ ប្រមុខការពារជាតិតួកគី បាននិយាយថា ប្រទេសតួកគី និង អាស៊ែបៃហ្សង់ កំពុងធ្វើការជាមួយគ្នាដើម្បីអនាគត សន្តិសុខ និងសុខុមាលភាពនៃ «ប្រជាជាតិតួកគីដ៏ពិសិដ្ឋ (noble Turkish nation)»។
លោក បាននិយាយថា មានកិច្ចសហប្រតិបត្តិការយ៉ាងខ្លាំងក្លាក្នុងវិស័យអប់រំយោធា និងឧស្សាហកម្មការពារជាតិរវាងប្រទេសទាំង២នេះ ហើយបានសង្កត់ធ្ងន់ថា ការរួបរួម និងសាមគ្គីភាពរវាងប្រទេសទាំង២ នឹងធ្វើជាគំរូសម្រាប់ពិភពតួកគីទាំងមូល (entire Turkish world)។
រដ្ឋមន្ត្រីការពារជាតិអាស៊ែបៃហ្សង់ លោក Madat Guliyev បាននិយាយថា៖«អាស៊ែបៃហ្សង់ គឺជាស្រុកកំណើតទី២របស់អ្នក» ខណៈដែលលោកបានសម្តែងការដឹងគុណចំពោះរដ្ឋមន្ត្រីការពារជាតិតួកគីសម្រាប់ការគាំទ្រកងទ័ពរបស់អាស៊ែ បៃហ្សង់។
យោងតាមការចេញផ្សាយរបស់បណ្តាញព័ត៌មាន Al Jazeera ប្រទេសអាស៊ៃបៃហ្សង់ បានអះអាងកាលពីខែកញ្ញាក្នុងពេលទាហានខ្លួនប៉ះទង្គិចជាមួយកងទ័ពអាមេនី ទាហានរបស់ខ្លួនចំនួន៧១នាក់ត្រូវបានសម្លាប់ អំឡុងពេលមានការប៉ះទង្គិចនៅតាមព្រំដែនជាមួយប្រទេសអាមេនី ដែលជាការប្រយុទ្ធដ៏អាក្រក់បំផុតរវាងប្រទេសជិតខាង ដែលជាគូប្រជែងចាប់តាំងពីសង្រ្គាមឆ្នាំ ២០២០ របស់ពួកគេលើតំបន់ជម្លោះ Nagorno-Karabakh។
អាមេនីដែលមានទំនោរខ្លាំងទៅកាន់ប្រទេសរុស្ស៊ីក្នុងវិស័យការពារជាតិបាននិយាយថា ទាហានរបស់ខ្លួនចំនួន ១០៥ នាក់ បានស្លាប់នៅក្នុងអំពើហិង្សា ដែលភាគីនីមួយៗបន្ទោសគ្នាទៅវិញទៅមក។
ការផ្ទុះឡើងនៃការប្រយុទ្ធបង្ហូរឈាមនោះ បានគំរាមកំហែងអូសទាញតួកគី ដែលជាអ្នកគាំទ្រដ៏សំខាន់របស់អាស៊ែបៃហ្សង់ និងសម្ព័ន្ធមិត្តរបស់អាមេនី គឺប្រទេសរុស្ស៊ី ចូលទៅក្នុងជម្លោះកាន់តែទូលំទូលាយ នៅពេលដែលមានភាពតានតឹងផ្នែកភូមិសាស្ត្រនយោបាយខ្ពស់រួចទៅហើយ៕