.jpg)
ក្រដាសប្រាក់អឺរ៉ូ។ រូបថត AFP
បើនិយាយពីគម្លាតប្រាក់ចំណូល រវាងបុរស និងស្ត្រី នៅប្រទេសឥណ្ឌា គេទំនងជាមិនសូវភ្ញាក់ផ្អើលដូចបានស្តាប់ឮពីបញ្ហានេះ កើតឡើងនៅអឺរ៉ុបនោះទេ។ ហេតុអ្វី? ចម្លើយនោះ គឺនៅត្រង់ថា បើទោះបីជាសហភាពអឺរ៉ុប (EU) ត្រូវបានបង្កើតឡើងដោយផ្អែកលើគោលការណ៍សមភាពយេនឌ័រក៏ដោយ ក៏ស្ត្រីអឺរ៉ុប នៅតែរកចំណូលជាមធ្យមបាន ១៣% តិចជាងបុរសដដែល។
-តើអ្វីជាឫសគល់នាំឱ្យមានគម្លាតប្រាក់ខែរវាងបុរស និងស្ត្រី នៅអឺរ៉ុប?
ការសិក្សាជាច្រើនបង្ហាញថា ប៉ុន្មានឆ្នាំមកនេះ បុរសកាន់តែច្រើន មានទំនោរទទួលបានការងារ ដែលមានប្រាក់ខែខ្ពស់ ដូចជាការងារផ្នែកសំណង់ និងការជីកយករ៉ែ ដែលជាការងារមានហានិភ័យខ្លាំង ឬក៏ការងារក្នុងវិស័យហិរញ្ញវត្ថុ និងធានារ៉ាប់រងជាដើម។
បើនិយាយពីចំនួនអ្នកធ្វើការវិញ ស្ត្រីធ្វើការតិចជាងបុរស។ បើនិយាយពីចំនួនម៉ោងធ្វើការ ស្ត្រីដែលមានអាជីពការងារធ្វើការច្រើនម៉ោងជាងបុរស ក្នុងរយៈពេល ១ សប្តាហ៍ ក៏ប៉ុន្តែពួកគេចំណាយពេលច្រើនម៉ោងធ្វើការងារ ដែលគ្មានប្រាក់ខែ ដូចជាថែទាំកូននៅផ្ទះជាដើម។ នេះគឺជាការពិត ១ ដែលមិនអាចប្រកែកបានថា ស្ត្រីបានប្រាក់បៀវត្សរ៍តិច ដោយសារអាជីព ដែលពួកគេជ្រើសរើស។
ស្ត្រីដែលជាអ្នកសម្រាល និងមានតួនាទីសំខាន់ ក្នុងការមើលថែទាំកូនៗ មានទំនោរជ្រើសរើសការងារណា ដែលធ្វើតិចម៉ោង និងអាចបត់បែនបានស្រួល។ ចំណុចនេះបញ្ជាក់ឱ្យឃើញច្បាស់ថា ស្ត្រីត្រូវឈប់សម្រាកពីការងារខាងក្រៅច្រើន ដើម្បីសម្រាល និងថែទាំកូន។
-គម្លាតប្រាក់បៀវត្សរ៍យេនឌ័រ គឺជាបញ្ហាសំខាន់ក្នុងសង្គមអឺរ៉ុប
ភាពខុសគ្នានៃកម្រិតប្រាក់បៀវត្សរ៍ អាចគូសបញ្ជាក់ពីបញ្ហាជាច្រើន សម្រាប់ស្ត្រី។ ផលវិបាក ដោយផ្ទាល់រួមមានលទ្ធភាពតិចជាង ក្នុងការទទួលបានការ-ថែទាំសុខភាព សុខុមាលភាព ការអប់រំ និងសន្តិសុខហិរញ្ញវត្ថុ ជាពិសេសនៅពេលពួកគេចម្រើនវ័យកាន់តែចាស់ទៅៗ។
ផលប៉ះពាល់ផ្សេងទៀតមានជាអាទិ៍គម្លាតចំណេះដឹងផ្នែកហិរញ្ញវត្ថុ និងទ្រព្យសម្បត្តិ ដែលរកបានពេញ ១ ជីវិត។ នេះក៏មានន័យថា ស្ត្រីកាន់តែតិច អាចឡើងកាន់តួនាទីជាអ្នកដឹកនាំ។ ជាក់ស្តែង នាយកប្រតិបត្តិជាស្ត្រី ធ្វើការ ក្នុងក្រុមហ៊ុនលំដាប់កំពូលៗ នៅទូទាំងពិភពលោកមានចំនួនមិនទាំងដល់ ៨% ផង។
ស្ត្រីកាន់តែច្រើនធ្វើការ ដែលទទួលបានប្រាក់ឈ្នួលទាប ដូចជាធ្វើការតាមផ្ទះ ការងារបណ្តោះអាសន្ន ឬក្រៅម៉ោង ដែលធ្វើឱ្យគ្មានសិទ្ធិទទួលអត្ថប្រយោជន៍ពីរដ្ឋ ឬពីក្រុមហ៊ុននានា។ ជាឧទាហរណ៍ អំឡុងជំងឺរាតត្បាតកូវីដ១៩ ស្ត្រីជាច្រើន នៅអឺរ៉ុប មិនអាចទទួលបានប្រាក់ឧបត្ថម្ភពីរដ្ឋាភិបាលទេ ព្រោះកម្មវិធីទ្រទ្រង់គាំពារគ្មានក្នុងវិស័យការងារពួកគេ។
-តើអាចដោះស្រាយតាមវិធីណា?
សមភាព និងភាពល្អប្រសើរជាងមុន សម្រាប់ស្ត្រី ក្នុងការទទួលបានការអប់រំ ការងារ និងប្រាក់សោធននិវត្តន៍ គឺជាជំហានដំបូងចាំបាច់ ដើម្បីបន្ថយគម្លាតប្រាក់បៀវត្សរ៍ រវាងស្ត្រី និងបុរស។
តាមការសិក្សា ១ របស់ស៊ុយអែត នៅឆ្នាំ ២០១០ បើស្វាមីយកច្បាប់សម្រាក ១ ខែ ដើម្បីថែទាំកូននោះ ប្រាក់ឈ្នួលស្ត្រីជាម្តាយកើន ៧%។ កាលពីខែមេសា សភាអឺរ៉ុបបានបោះឆ្នោតគាំទ្រ ដោយតម្រូវឱ្យក្រុមហ៊ុន ដែលមានបុគ្គលិកចាប់ពី ៥០ នាក់ បង្ហាញព័ត៌មាន ដើម្បីជាការងាយស្រួលជាងមុន សម្រាប់បុគ្គលិក ក្នុងការប្រៀបធៀប និងបង្ហាញពីគម្លាតប្រាក់ខែ រវាងស្ត្រី និងបុរស។
បទប្បញ្ញត្តិដូចនេះ ទទួលជោគជ័យនៅប្រទេសមួយចំនួន ដូចជាអុីស្លង់ ដែលបំបាត់គម្លាតប្រាក់ឈ្នួល រវាងស្ត្រី និងបុរស បាន ៩០%។ ការជួយឱ្យស្ត្រីទទួលប្រាក់ឈ្នួលខ្ពស់ អាចជាគ្រាប់ថ្នាំដ៏ល្វីង សម្រាប់ក្រុមហ៊ុននានា ឥឡូវនេះ ក៏ប៉ុន្តែនៅទីបំផុត វានឹងមានអត្ថប្រយោជន៍ សម្រាប់ទាំងសេដ្ឋកិច្ច និងសង្គម៕
