.jpg)
ប្រធានាធិបតីហ្វីលីពីន លោក Ferdinand Marcos Jr ថ្លែងនាពេលកន្លងទៅ។ រូបថត AFP
ប្រធានាធិបតីហ្វីលីពីនលោក Ferdinand Marcos Jr កាលពីថ្ងៃ ពុធ ទី ៥ ខែតុលា អះអាងថា ប្រទេសរបស់លោក ប្រហែលជាត្រូវងាកទៅរកប្រទេសរុស្ស៊ី ដើម្បីបំពេញតម្រូវការប្រេងឥន្ធនៈ ខណៈមានការកើនឡើងតម្លៃថាមពលជាសកល។ កន្លងមកសម្ពាធ បានធ្លាក់មកពីសម្ព័ន្ធមិត្តលោកខាងលិចលើប្រទេសនានា ដើម្បីគេចចេញពីទីក្រុងម៉ូស្គូ។
ចំពោះមុខក្លិបសារព័ត៌មាន Manila Overseas លោក Marcos ដែលជារដ្ឋមន្ត្រីក្រសួងកសិកម្មដែរនោះ និយាយថា ហ្វីលីពីនប្រហែលជាអាចមានកិច្ចព្រមព្រៀងជាមួយរុស្ស៊ី ដើម្បីផ្គត់ផ្គង់ជីកសិកម្មដែរ។ លោកថា៖ «យើងទទួលយកទស្សនៈ ដែលមានតុល្យភាព ព្រោះការពិតនៃបញ្ហា គឺយើងប្រហែលជានិយាយជាមួយរុស្ស៊ីចំពោះបញ្ហាឥន្ធនៈ និងជីកសិកម្ម។”
ហ្វីលីពីន មិនខុសពីប្រទេសជាច្រើនផ្សេងទៀត កំពុងប្រឈមនឹងបញ្ហាអតិផរណាកើនឡើង ដោយសារបញ្ហាផ្គត់ផ្គង់ បន្ទាប់ពីការលុកលុយរបស់រុស្ស៊ីលើអ៊ុយក្រែន។ តែជាការកត់សម្គាល់ហ្វីលីពីន ដែលជាសម្ព័ន្ធមិត្តរបស់អាមេរិក មិនដាក់ទណ្ឌកម្មណាមួយលើរុស្ស៊ីទេ។
លោក Marcos ជាកូនប្រុសតែម្នាក់គត់របស់បុរសខ្លាំងហ្វីលីពីន គឺលោក Ferdinand MarcosSr ដែលត្រូវបានបណ្តេញចេញពីអំណាច ក្រោយពីគ្រប់គ្រងប្រទេសនេះ អស់រយៈពេល ២ ទសវត្សរ៍។ លោក Marcos ក៏បានបញ្ជាក់ដែរថា លោកចង់ឱ្យប្រទេសនេះ ដើរតួនាទីចម្បង ក្នុងការលើកកម្ពស់សន្តិភាព ក្នុងតំបន់ ចំពេលមានបញ្ហាប្រឈម ដែលបង្កឡើងដោយភាពតាន នៅឧបទ្វីបកូរ៉េ និងបញ្ហាចិនតៃវ៉ាន់។
ជាមួយគ្នានេះដែរ លោក Marcos បានបញ្ជាក់ថា លោកនឹងស្នើវិធីសាស្រ្តថ្មី ១ ដើម្បីឆ្លើយតបចំពោះវិបត្តិ នៅប្រទេសមីយ៉ាន់ម៉ា ក្នុងកិច្ចប្រជុំនាពេលខាងមុខរបស់សមាគមប្រជាជាតិអាស៊ីអាគ្នេយ៍ (អាស៊ាន) ដែលនឹងធ្វើឡើង ក្នុងខែវិច្ឆិកា នៅទីក្រុងភ្នំពេញ ប្រទេសកម្ពុជា។ ហើយបើតាមលោក Marcos សំណើនោះ អាចពាក់ព័ន្ធនឹងការចូលរួមរបស់រដ្ឋាភិបាលយោធា ដោយផ្ទាល់៕
