.jpg)
តម្លៃប្រេងកើនឡើង បន្ទាប់ពីក្រុមប្រទេសផលិតប្រេង OPEC+ ប្រកាសកាត់បន្ថយទិន្នផលប្រេងឆៅ។ រូបថត AFP
តម្លៃប្រេងបានកើនថ្លៃ នៅថ្ងៃសុក្រ ទី ៧ តុលា ឆ្នាំ ២០២២ នេះ បន្ទាប់ពីក្រុមប្រទេសផលិតប្រេង OPEC+ ក្រាសពីផែនការរឹតបន្តឹងការផ្គត់ផ្គង់ប្រេងជាសកល ដោយកាត់បន្ថយគោលដៅផលិតកម្មចំនួន ២ លានបារ៉ែលក្នុងមួយថ្ងៃ។
កាលពីថ្ងៃពុធ ក្រុមប្រទេស OPEC+ ទាំង ២៣ បានព្រមព្រៀងគ្នាកាត់បន្ថយផលិតកម្មប្រេងឆៅ ដើម្បីឱ្យតម្លៃប្រេងឡើងថ្លៃ។ នេះគឺជាការកាត់បន្ថយដ៏ធំបំផុតរបស់ OPEC+ ចាប់តាំងពីឆ្នាំ ២០២០ និងធ្លាក់មកមុនការហាមឃាត់របស់សហភាពអឺរ៉ុបលើប្រេងរុស្ស៊ី។
សេចក្តីសម្រេចចិត្តដែលនឹងចូលជាធរមានចាប់ពីខែវិច្ឆិកា តំណាងឱ្យប្រមាណ ២% នៃការផ្គត់ផ្គង់ប្រេងពិភពលោក ហើយមានទំហំធំជាងការរំពឹងទុក។ ហេតុដូចនេះ វាអាចនឹងទៅបន្ថែមបន្ទុកលើការផ្គត់ផ្គង់ក្នុងទីផ្សារប្រេងដែលមានសភាពតឹងតែងខ្លាំងរួចទៅហើយ ពោលគឺអាចនឹងធ្វើឱ្យអតិផរណាកើនឡើង។
សហរដ្ឋអាមេរិក បានស្នើក្រុមប្រទេសនាំចេញប្រេង OPEC+ កុំឱ្យអនុវត្តផែនការកាត់បន្ថយការផលិតនេះ ក្រោមហេតុផលមួយផ្នែកថា តម្លៃប្រេងទាបមានន័យថា រុស្ស៊ី អាចរកចំណូលបានទាបជាងមុនដែរពីការលក់ប្រេង។ ទីក្រុងវ៉ាស៊ីនតោន បានហៅការសម្រេចចិត្តរបស់ OPEC+ ថាជាការមើលឃើញរយៈពេលខ្លី។
កាលពីខែកក្កដា ប្រធានាធិបតីអាមេរិកលោក ចូ បៃដិន បានទៅបំពេញទស្សនកិច្ចនៅអារ៉ាប៊ីសាអ៊ូឌីត ដែលជាប្រទេសផលិតប្រេងដ៏ធំបំផុតនៅក្នុងអង្គការ OPEC+ ដើម្បីសុំឱ្យព្រះអង្គម្ចាស់ ម៉ូហាមេដ បេនសាលម៉ាន បង្កើនការផលិតប្រេង។ ប៉ុន្តែសំណើ ត្រូវបានបដិសេធ។
លោក បូរីស ចនសុន អតីតនាយករដ្ឋមន្ត្រីអង់គ្លេស ក៏បានស្នើដល់ប្រទេសអារ៉ាប៊ីសាអ៊ូឌីត និងអារ៉ាប់រួមឱ្យជំរុញទិន្នផលប្រេងដែរ តែមិនទទួលបានជោគជ័យដូចគ្នា៕
