មេដឹកនាំសហភាពអឺរ៉ុប បានជួបប្រជុំគ្នានៅទីក្រុងប្រាកសាធារណរដ្ឋឆែក នៅព្រឹកថ្ងៃសុក្រ ទី ៧ ខែតុលា ឆ្នាំ ២០២២ នេះ ដើម្បីរកដំណោះស្រាយរួមគ្នាជុំវិញតម្លៃឧស្ម័នធម្មជាតិ។ ឧស្ម័នធម្មជាតិ ដែលជាតម្រូវការចាំបាច់មួយសម្រាប់ប្រទេសអឺរ៉ុប ខណៈរដូវរងាខិតជិតមកដល់ និងបន្ទាប់ពីសង្គ្រាមរបស់រុស្ស៊ីលើអ៊ុយក្រែនបានបញ្ឆេះឱ្យមានវិបត្តិថាមពល។
ការកំណត់តម្លៃឧស្ម័នធម្មជាតិ គឺជាវិធានការមួយក្នុងចំណោមវិធានការជាច្រើនទៀត ដែលប្លុកប្រទេសចំនួន ២៧ កំពុងរៀបចំឡើង ដើម្បីទប់ទល់នឹងវិបត្តិថាមពល។ វិបត្តិថាមពល ដែលកំពុងជំរុញឱ្យតម្លៃឧស្ម័នធម្មជាតិឡើងថ្លៃ ប៉ះពាល់ដល់ការប្រើប្រាស់ជាទូទៅ និងបែបអាជីវកម្ម។ ការណ៍នេះ ក៏នឹងធ្វើឱ្យប៉ះពាល់ដល់ការផលិតថាមពលអគ្គិសនី សកម្មភាពតាមរោងចក្រ ហើយក៏ជំរុញឱ្យថមថយកំណើនសេដ្ឋកិច្ចនារដូវរងាដែរ។
នៅពេលដែលប្រជាពលរដ្ឋអឺរ៉ុប បង្ហាញការគាំទ្ររបស់ពួកគេចំពោះអ៊ុយក្រែន ក្រោមរូបភាពជាការផ្តល់សព្វាវុធ ហិរញ្ញវត្ថុ និងជំនួយផ្សេងៗទៀតនោះ ប្រទេសរុស្ស៊ីបានឆ្លើយតបភ្លាមៗតាមរយៈការកាត់បន្ថយ ឬផ្តាច់ទាំងស្រុងនូវឧស្ម័នធម្មជាតិ សម្រាប់ប្រទេសចំនួន ១៣ នៅអឺរ៉ុប។ ហេតុផលនេះហើយ ធ្វើឱ្យតម្លៃឧស្ម័ន និងអគ្គិសនីកើនឡើងជាបន្តបន្ទាប់។ តម្លៃថាមពលអាចនឹងបន្តកើនឡើងខ្ពស់ថែមទៀត នៅពេលដែលតម្រូវការកើនឡើងក្នុងអំឡុងពេលខែត្រជាក់ក្នុងទ្វីបអឺរ៉ុប។
នៅចំពោះមុខនៃកិច្ចព្រមព្រៀងកំណត់តម្លៃឧស្ម័នធម្មជាតិនេះ គឺជាហេតុផលមួយបញ្ជាក់ថាប្រទេសក្នុងសហភាពអឺរ៉ុបបានប្រើប្រាស់ប្រភេទថាមពល ឬមានអ្នកផ្គង់ផ្គង់ថាមពលផ្សេងៗគ្នា។ ពួកគេពិបាកនឹងសម្លឹងមើលមុខគ្នា ចំពោះបញ្ហាមួយនេះ។
ក្រុមប្រទេសសមាជិកចំនួន ១៥ បានជំរុញឱ្យស្ថាប័នប្រតិបត្តិនៃសហភាពអឺរ៉ុប គឺគណៈកម្មការអឺរ៉ុប ធ្វើយ៉ាងណាដាក់ចេញនូវគោលការណ៍កំណត់តម្លៃឧស្ម័នមួយឱ្យបានឆាប់ តាមដែលអាចធ្វើទៅបាន។ ប៉ុន្តែគំនិតមួយនេះ មិនទទួលបាននូវការគាំទ្រជាឯកច្ឆ័ន្ទទេ ដោយសារប្រទេសអាល្លឺម៉ង់បានរារាំង។
សម្រាប់ពេលនេះ គណៈកម្មការអឺរ៉ុបបាននិយាយថា សមត្ថភាពផ្ទុកឧស្ម័នរបស់អឺរ៉ុបមានប្រមាណ ៩០% ទោះបីជាការផ្គត់ផ្គង់ឧស្ម័នពីប្រទេសរុស្ស៊ីទៅអឺរ៉ុបបានធ្លាក់ចុះ ៣៧% នៅចន្លោះខែមករា ដល់ខែសីហា។ ជុំវិញបញ្ហានេះ សហរដ្ឋអាមេរិក និងន័រវេស បានបោះដៃជួយដោះស្រាយបញ្ហាតាមរយៈការផ្តល់ឧស្ម័នរាវ ប៉ុន្តែការផ្គត់ផ្គង់ជំនួសពីប្រទេសទាំងនេះ គឺមានតម្លៃថ្លៃ។
«ខ្ញុំសូមផ្តល់អនុសាសន៍ឱ្យបង្កើនការចរចាជាមួយអ្នកផ្គត់ផ្គង់ ដែលអាចទុកចិត្តបានរបស់យើង ដើម្បីកាត់បន្ថយតម្លៃឧស្ម័ននាំចូលគ្រប់ប្រភេទ»។ នេះគឺជាការលើកឡើងរបស់ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន (Ursula von der Leyen) តាមរយៈលិខិតមួយទៅកាន់មេដឹកនាំប្រទេសអឺរ៉ុប ដែលចូលរួមកិច្ចប្រជុំកំពូល «សហគមន៍នយោបាយអឺរ៉ុប» នាថ្ងៃសុក្រ ទី ៧ ខែតុលានេះ។
ការផ្ទុះបំពង់បង្ហូរឧស្ម័នធម្មជាតិ នៅសមុទ្របាល់ទិក នាពេលកន្លងទៅនេះ គឺបានបង្ហាញយ៉ាងច្បាស់ថាតើប្រទេសតូចៗ នៅអឺរ៉ុបពឹងផ្អែកកម្រិតណាលើការនាំចូលឧស្ម័នពីរុស្ស៊ី។ និយតករបណ្តាញឧស្ម័នធម្មជាតិរបស់ប្រទេសអាល្លឺម៉ង់បានព្រមានរួចហើយថា អ្នកប្រើប្រាស់កំពុងប្រើប្រាស់ច្រើនជាងឆ្នាំមុនៗ ហើយកន្លងទៅនេះ ប្រទេសអ៊ីតាលី ក៏បានកម្រិតចំនួនម៉ោង លើការប្រើប្រាស់ឧស្ម័នសម្រាប់កម្តៅអគារជាច្រើន៕