.jpg)
បុរសម្នាក់កំពុងរាប់ក្រដាសប្រាក់ ១០០ ដុល្លារសហរដ្ឋអាមេរិក។ រូបថត AFP
កាលពីថ្ងៃអង្គារ ទី ១១ ខែតុលា មូលនិធិរូបិយវត្ថុអន្តរជាតិ (IMF) បានព្យាករបន្ថយកំណើនសេដ្ឋកិច្ចរបស់អាស៊ី។ ជាមួយនឹងកំណើនយឺតអមដោយការកើនឡើងនៃអតិផរណា បង្ខំឱ្យធនាគារកណ្តាលជាច្រើនរឹតបន្តឹងលើគោលនយោបាយរូបិយវត្ថុ បើទោះបីជាការនាំចេញប្រឈមមុខនឹងការធ្លាក់ចុះជាមួយដៃគូពាណិជ្ជកម្មនានា ជាពិសេសសហរដ្ឋអាមេរិកជាដើម។
ការបន្ថយកំណើនសេដ្ឋកិច្ចតាមរយៈការព្យាករថ្មីនេះ បានបង្ហាញពីភាពមិនប្រាកដប្រជាកាន់តែខ្លាំងឡើង ចំពោះការងើបឡើងវិញរបស់អាស៊ីពីជំងឺរាតត្បាតសកលកូវីដ១៩។ ទន្ទឹមនឹងគ្នានេះ ចក្ខុវិស័យលើការថមថយកំណើនសេដ្ឋកិច្ចសហរដ្ឋអាមេរិក ចិន និងតំបន់ចាយប្រាក់អឺរ៉ូ បង្កឱ្យមានការភ័យខ្លាចនៃវិបត្តិសេដ្ឋកិច្ចសកល។
IMF បាននិយាយ នៅក្នុងរបាយការណ៍ទស្សនវិស័យសេដ្ឋកិច្ចពិភពលោករបស់ខ្លួនថា គោលនយោបាយរូបិយវត្ថុទាក់ទងនឹងការដំឡើងអត្រាការប្រាក់របស់សហរដ្ឋអាមេរិក ទំនងជានឹងបន្តធ្វើឱ្យប្រាក់ដុល្លារ កាន់តែកើនឡើងថែមទៀត។ ការណ៍នេះនឹងធ្វើឱ្យវិបត្តិបំណុលរបស់ប្រទេសមួយចំនួនធ្លាក់ទៅរកស្ថានភាពអាក្រក់ និងបង្ខំឱ្យប្រទេសខ្លះដំឡើងអត្រាការប្រាក់បន្ថែម ដើម្បីចៀសវាងពីការធ្លាក់ថ្លៃនៃរូបិយប័ណ្ណរបស់ពួកគេធៀបនឹងប្រាក់ដុល្លារ។
របាយការណ៍ IMF ថា «វិបត្តិបំណុល ដែលរីករាលដាល នៅតាមប្រទេសកំពុងអភិវឌ្ឍន៍ នឹងបន្ថែមទម្ងន់ឱ្យកំណើនសេដ្ឋកិច្ចសកលថមថយ ហើយអាចឈានទៅរកវិបត្តិសេដ្ឋកិច្ចសកល។ ភាពរឹងមាំនៃប្រាក់ដុល្លារអាមេរិក នឹងក្លាយជាបន្ទុកបន្ថែមសម្ពាធលើបំណុល»។
មូលនិធិរូបិយវត្ថុអន្តរជាតិដាក់ក្តីរំពឹងថា ប្រទេសដែលមានសេដ្ឋកិច្ច កំពុងលូតលាស់នៅអាស៊ី នឹងមានកំណើន ៤,៤ ភាគរយ នៅឆ្នាំ ២០២២ នេះ ពោលគឺបានថយចុះ ០,២ ភាគរយធៀបនឹងការព្យាករ កាលពីខែកក្កដា។ សម្រាប់ឆ្នាំ ២០២៣ កំណើនសេដ្ឋកិច្ច នៅតាមប្រទេសទាំងនោះនឹងឡើងដល់ ៤,៩ ភាគរយ ពោលគឺថយចុះ ០,១ ភាគរយធៀបនឹងការព្យាករ កាលពីខែកក្កដា។
របាយការណ៍ដដែលនេះ បានបញ្ជាក់ថា មួយផ្នែកធំនៃការព្យាករបន្ថយកំណើនសេដ្ឋកិច្ច គឺមកពីការថយចុះនៃសេដ្ឋកិច្ចរបស់ចិនមកត្រឹម ៣,២ ភាគរយ សម្រាប់ឆ្នាំ ២០២២ នេះ ដោយថយចុះពី ៨,១ ភាគរយ កាលពីឆ្នាំ ២០២១។ ការថមថយនៃកំណើនសេដ្ឋកិច្ចរបស់ចិន គឺដោយសារតែវិធានការរឹតបន្តឹងកូវីដ ១៩ និងវិបត្តិអចលនទ្រព្យ នៅក្នុងប្រទេសនេះ។
ប្រទេសចិន ដែលមានសេដ្ឋកិច្ចធំលំដាប់ទី ២ លើពិភពលោកនឹងស្គាល់នូវកំណើន ៤.៤ ភាគរយ ក្នុងឆ្នាំ ២០២៣ ពោលគឺថយចុះប្រមាណ ០,២ ភាគរយ ធៀបនឹងការព្យាករ កាលពីខែកក្កដារបស់ IMF។
របាយការណ៍របស់ IMF បាននិយាយថា សមាជិកនៃសមាគមប្រជាជាតិអាស៊ីអាគ្នេយ៍ ដូចជាប្រទេសឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងថៃ (ASEAN-5) ត្រូវបានគេរំពឹងថា នឹងមានកំណើន ៥.៣ ភាគរយ នៅឆ្នាំនេះ ពោលគឺបានកើនពី ៣.៤ ភាគរយ នៅឆ្នាំ ២០២១។ បើតាម IMF កំណើននៃប្រទេសទាំងនេះ ត្រូវបានគេព្យាករថា នឹងធ្លាក់ចុះមកនៅត្រឹម ៤,៩ ភាគរយ នៅឆ្នាំ ២០២៣ ដោយសារតម្រូវការកាន់តែខ្សោយរបស់ប្រទេសដៃគូពាណិជ្ជកម្មធំៗ ដូចជាប្រទេសចិន តំបន់ចាយប្រាក់អឺរ៉ូ និងសហរដ្ឋអាមេរិកជាដើម។
IMF រំពឹងថា សេដ្ឋកិច្ចរបស់ប្រទេសជប៉ុន នឹងកើនឡើង ១,៧ ភាគរយ នៅឆ្នាំនេះ ពោលគឺមិនមានការប្រែប្រួលទេធៀបនឹងការព្យាករ កាលពីខែកក្កដា ប៉ុន្តែនៅឆ្នាំ ២០២៣ ជប៉ុន នឹងមានកំណើន ១,៦ ភាគរយ ពោលគឺថយចុះ ០,១ ភាគរយ។ របាយការណ៍ IMF បាននិយាយថា ការទម្លាក់កំណើនសេដ្ឋកិច្ចរបស់ប្រទេសជប៉ុន សម្រាប់ឆ្នាំ ២០២៣ ឆ្លុះបញ្ចាំងពីការធ្លាក់ចុះនៃការទិញដូរក្នុងស្រុក ដោយសារការកើនឡើងអតិផរណា និងកំណើនប្រាក់ឈ្នួលយឺត៕
វីដេអូ៖
