ព្រះអង្គម្ចាស់ ម៉ូហាមេដ ប៊ីន សាលម៉ាន ចូលរួមពិធីស្បថចូលកាន់តំណែងជានាយករដ្ឋមន្ត្រីថ្មីរបស់ប្រទេសអារ៉ាប៊ី សាអ៊ូឌីត នៅព្រះបរមរាជវាំង Al-Salam ក្នុងទីក្រុង Jeddah កាលពីថ្ងៃទី ២៧ ខែកញ្ញា។ AFP
អារ៉ាប៊ីសាអ៊ូឌីត បានប្រកាសថា នឹងផ្តល់ជំនួយមនុស្សធម៌ជាង ៤០០ លានអឺរ៉ូ ($៣៨៨,៨៤០ លាន)ដល់ប្រទេសអ៊ុយក្រែន។ ការប្រកាសដ៏គួរឱ្យភ្ញាក់ផ្អើលនេះ កើតឡើង ខណៈមានសេចក្តីរាយការណ៍ថា ព្រះរាជបុត្រស្នងរាជ្យអារ៉ាប៊ីសាអ៊ូឌីត ម៉ូហាមេដ ប៊ីន សាលម៉ាន បានជួបតាមទូរស័ព្ទជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី។
តាមទីភ្នាក់ងារព័ត៌មានអារ៉ាប៊ីសាអ៊ូឌីត Saudi SPA ព្រះអង្គម្ចាស់ ប៊ីន សាលម៉ាន បានសង្កត់ធ្ងន់ពីជំហររបស់ព្រះរាជាណាចក្រទ្រង់ក្នុងការគាំទ្រគ្រប់យ៉ាងទាំងអស់ ដែលនឹងរួមចំណែកបន្ថយកម្តៅនៃភាពតានតឹង និងការត្រៀមខ្លួនរបស់ទីក្រុងរីយ៉ាដ ដើម្បីបន្តកិច្ចប្រឹងប្រែងនៃការសម្របសម្រួលជម្លោះ។
កាលពីខែមុន អារ៉ាប៊ីសាអ៊ូឌីត បានដើរតួនាទី ដែលគេមិននឹកស្មានដល់ ក្នុងដំណើរសម្របសម្រួលការផ្លាស់ប្តូរអ្នកទោស សង្គ្រាមរវាងទីក្រុងម៉ូស្គូ និងកៀវ។ ព្រឹត្តិការណ៍នេះ បានធ្វើឱ្យមានការភ្ញាក់ផ្អើលខ្លាំង និងបានលើកឡើងជាសំណួរថា តើអារ៉ាប៊ីសាអ៊ូឌីត ដែលជាប្រទេសមជ្ឈិមបូព៌ាគ្មានពាក់ព័ន្ធនឹងបញ្ហាសោះ តែបែរជាក្លាយជាអន្តរការីដោះស្រាយទំនាស់យ៉ាងដូចម្ដេច?
សង្គ្រាម នៅអ៊ុយក្រែន បានជំរុញឱ្យមានភាពតានតឹង រវាង អារ៉ាប៊ីសាអ៊ូឌីត និងសហរដ្ឋអាមេរិក បន្ទាប់ពីក្រុងរីយ៉ាដ បានសម្រេចកាត់បន្ថយការផលិតប្រេង ក្នុងចំនួនច្រើន ក្នុងពេលដែលពិភពលោក កំពុងតែប្រឈមខ្លាំងទៅនឹងវិបត្តិថាមពល ដែលបណ្តាលមកពីសង្គ្រាមនេះ។
អាមេរិក បានរិះគន់យ៉ាងខ្លាំង ចំពោះអារ៉ាប៊ីសាអ៊ូឌីត ដែលសហការជាមួយរុស្ស៊ី និងសម្ព័ន្ធមិត្តផ្សេងទៀត ក្នុងការបន្ថយការបូមប្រេង ដោយមិនខ្វល់ពីការទទូច ក្រោមហេតុផលសេដ្ឋកិច្ច និងទ្រទ្រង់ទីផ្សារប្រេងឱ្យមាននិរន្តរភាព។
ទីក្រុងវ៉ាស៊ីនតោន បានចោទក្រុមប្រទេសផលិតប្រេង OPEC+ ថាបានចងសម្ព័ន្ធភាពជាមួយរុស្ស៊ី ហើយលោកប្រធានាធិបតីចូ បៃដិន ថែមទាំងបានចេញមុខព្រមានអារ៉ាប៊ីសាអ៊ូឌីត កាលពីថ្ងៃពុធ ក្នុងការធ្វើឱ្យប្រេងឡើង ដែលបណ្ដាលមកពីផលវិបាក ក្នុងការរួមដៃជាមួយរុស្ស៊ីនេះ៕
វីដេអូ៖
