.jpg)
ប្រធានគណៈកម្មការអឺរ៉ុបលោកស្រី Ursula von der Leyen (ឆ្វេង) ពិភាក្សាជាមួយម្ចាស់រថយន្ត Rimac automobili ក្នុងដំណើរទស្សនកិច្ចក្រុមហ៊ុនផលិតរថយន្តអគ្គិសនីលឿនបំផុតក្នុងពិភពលោក «Concept Two» ក្នុងទីក្រុង Sveta Nedelja ប្រទេសក្រូអាស៊ី នាពេលកន្លងទៅ។ AFP
សហភាពអឺរ៉ុបត្រូវលើកទឹកចិត្តផ្នែកច្បាប់បន្ថែមទៀត សម្រាប់ក្រុមហ៊ុនផលិតរថយន្តរបស់ខ្លួនក្នុងការបង្កើនការផលិតរថយន្តអគ្គិសនីពេញលេញ (EV)។ នេះបើយោងតាមការសិក្សាមួយចេញផ្សាយដោយអង្គការបរិស្ថាន Transport & Environment ដោយបញ្ជាក់បន្ថែមថា សហភាពអឺរ៉ុបអាចប្រឈមនឹងហានិភ័យបាត់បង់ចំណែកទីផ្សារទៅគូប្រជែងរបស់ខ្លួនគឺចិន។
នៅក្នុងរបាយការណ៍ក្រោមចំណងជើងថា''តើការផ្លាស់ប្តូរក្នុងវិស័យរថយន្តអគ្គិសនីត្រូវជាប់គាំងទេ?'' ដែលចេញផ្សាយនៅថ្ងៃចន្ទ ទី ១៧ ខែតុលាT&Eបាននិយាយថា កំណើននៃការលក់រថយន្ត EV នៅក្នុងតំបន់អឺរ៉ុបធ្លាក់ចុះពោលគឺរថយន្តអគ្គិសនីមានចំណែកត្រឹមតែ ១១ ភាគរយនៃការលក់នៅក្នុងឆមាសទី ១ នៃឆ្នាំ ២០២២ នេះ។ ផ្ទុយពីទិន្នន័យដែលបង្ហាញពីនិន្នាការនៃការលក់រថយន្តអគ្គិសនី ដែលថាវាអាចឈានដល់ ១៣ ភាគរយ។
ក្នុងពេលជាមួយគ្នានេះ ក្រុមហ៊ុនផលិតរថយន្តអគ្គិសនីរបស់ចិនដែលរួមមានក្រុមហ៊ុន BYD និងក្រុមហ៊ុន Great Wall Motor កំពុងសម្លឹងរកមើលចំណែកទីផ្សារបន្ថែម ដើម្បីឈរជើងនៅសហភាពអឺរ៉ុប ខណៈពេលថ្មីៗនេះ ក្រុមហ៊ុនរថយន្តអគ្គិសនីរបស់ចិនបានទទួលចំណាត់ថ្នាក់សុវត្ថិភាពកាន់តែខ្ពស់។
ក្រុមអ្នកបរិស្ថាន T&E បានប៉ាន់ស្មានថា រថយន្តដើរដោយថាមពលអគ្គិសនីរបស់ក្រុមហ៊ុនចិនមានចំណែកប្រមាណ ៥ ភាគរយនៃប្រភេទរថយន្តអគ្គិសនីទាំងអស់ ដែលបានលក់នៅក្នុងទីផ្សារអឺរ៉ុបសម្រាប់ឆមាសទី ១ ឆ្នាំ ២០២២។ តួលេខនេះ អាចនឹងកើនឡើងដល់ ១៨ ភាគរយសម្រាប់ឆ្នាំ ២០២៥ ។
បច្ចុប្បន្ននេះ សហភាពអឺរ៉ុបកំពុងពិភាក្សាលើសំណើគោលនយោបាយថ្មីមួយស្តីពីការប្រែប្រួលអាកាសធាតុ ដែលចំណុចនៅក្នុងសំណើនោះក៏មានលើកឡើង ពីការហាមឃាត់ការលក់រថយន្ត ដែលប្រើប្រេងឥន្ធនៈ ចាប់ពីឆ្នាំ ២០៣៥ ទៅ។
ក្រុមអ្នកបរិស្ថាន T&E បានបញ្ជាក់បន្ថែមថា ដើម្បីជំរុញការផលិតរថយន្តអគ្គិសនី សហភាពអឺរ៉ុបគួរតែប្រកាន់ខ្ជាប់នូវគោលការណ៍ហាមឃាត់ ឬប្រឆាំងការប្រើឥន្ធនៈសំយោគនៅក្នុងរថយន្ត និងត្រូវប្រើប្រាស់មូលនិធិរបស់សហភាពអឺរ៉ុបនិងគោលនយោបាយជាតិ ដើម្បីពន្លឿនការបង្កើនទំហំផលិតកម្ម EV។
របាយការណ៍ដដែលបញ្ជាក់ថា បរាជ័យរបស់សហភាពអឺរ៉ុបក្នុងការបង្កើនចំណែកទីផ្សារ និងការផ្គត់ផ្គង់អាចនឹងធ្វើឱ្យរថយន្តដែលផលិតដោយគូប្រជែងចាប់យកចំណែកទីផ្សារបានកាន់តែធំជាងមុន នៅអឺរ៉ុប។ "ប្រសិនបើសហភាពអឺរ៉ុបមិនអាចគ្រប់គ្រងទីផ្សាររបស់ខ្លួនប្រកបដោយប្រសិទ្ធភាពទេ នោះវាគ្រោះថ្នាក់ដែលអឺរ៉ុបនឹងប្រឈមចំពោះការបាត់បង់អធិបតេយ្យភាពសេដ្ឋកិច្ចរបស់ខ្លួននៅក្នុងឧស្សាហកម្មរថយន្ត"៕
