មន្ត្រីជាន់ខ្ពស់ផ្នែករៀបចំផែនការរដ្ឋ បាននិយាយ នៅថ្ងៃចន្ទ ទី ១៧ ខែតុលានេះថា សេដ្ឋកិច្ចរបស់ប្រទេសចិន បានបង្ហាញពីការស្ទុះងើបឡើងវិញគួរឱ្យកត់សម្គាល់ នៅក្នុងត្រីមាសទី ៣ ហើយអត្រាការងារមានស្ថិរភាពល្អ។ ប៉ុន្តែសេដ្ឋកិច្ចចិន នៅតែប្រឈម បូករួមនឹងបញ្ហានានា។
ដើម្បីជំរុញសេដ្ឋកិច្ចរបស់ចិន ដែលជាសេដ្ឋកិច្ចធំទី ២ លើពិភពលោក អ្នកបង្កើតគោលនយោបាយ បានដាក់ចេញវិធានការណ៍ចាំបាច់មួយចំនួន។ ប៉ុន្តែវិធានការស្តារទាំងនេះ បានធ្វើឱ្យចិនរួចចេញពីការធ្លាក់ចុះត្រឹមកម្រិតតិចតួចប៉ុណ្ណោះ កាលពីត្រីមាសទី ២ ដោយសារវិធានការទប់ស្កាត់កូវីដ ១៩ និងការធ្លាក់ចុះនៃវិស័យអចលនទ្រព្យ បានជះឥទ្ធិពលមកលើសេដ្ឋកិច្ចទាំងមូល។
ក្នុងសន្និសីទសារព័ត៌មាន ក្នុងអំឡុងពេលសមាជបក្សកុម្មុយនីស្ត ដែលមានតែម្តង ក្នុង ៥ ឆ្នាំ លោក Zhao Chenxin អនុប្រធានគណៈកម្មាធិការអភិវឌ្ឍ និងកំណែទម្រង់ជាតិចិន ប្រាប់អ្នកកាសែតថា៖ «សេដ្ឋកិច្ចបានកើនឡើងគួរឱ្យកត់សម្គាល់នៅក្នុងត្រីមាសទី ២ »។ លោកបញ្ជាក់ទៀតថា៖ «តម្លៃទំនិញប្រើប្រាស់ ឬអតិផរណា បានកើនឡើងតិចតួច ផ្ទុយស្រឡះទៅនឹងអតិផរណាពិភពលោក ដែលបានកើនឡើងខ្ពស់ ហើយអត្រាការងារទូទៅ នៅតែមានស្ថិរភាព»។
វិនិយោគិនកំពុងរង់ចាំយ៉ាងអន្ទះសារនូវទិន្នន័យ GDP របស់ចិន ក្នុងត្រីមាសទី ៣ នៅថ្ងៃអង្គារ ទី ១៨ ខែតុលា ជាពិសេសបន្ទាប់ពីតួលេខពាណិជ្ជកម្មរបស់ចិន ដែលគ្រោងនឹងចេញផ្សាយ កាលពីថ្ងៃសុក្រ បែរជាត្រូវលើកពេល។
ការស្ទង់មតិរបស់សារព័ត៌មាន Reuters បានបង្ហាញថា សេដ្ឋកិច្ចរបស់ប្រទេសចិន ទំនងជាបានកើនឡើង ៣,៤ ភាគរយ ក្នុងខែកក្កដា ដល់ខែកញ្ញា ធៀបនឹងរយៈពេលដូចគ្នា កាលពីឆ្នាំមុន ប៉ុន្តែបានកើនឡើង ០,៤ ភាគរយ ធៀបនឹងត្រីមាសទី ២។ យ៉ាងណាក៏ដោយ ការព្យាករដដែល ក៏បញ្ជាក់ដែរថា កំណើនសេដ្ឋកិច្ចរបស់ចិន សម្រាប់ឆ្នាំ ២០២២ នៅតែជាកំណើនដ៏ខ្សោយបំផុត ក្នុងរយៈពេលជិតកន្លះសតវត្សរ៍។
ក្រុមអ្នកបង្កើតគោលនយោបាយ បានដាក់ចេញវិធានការសេដ្ឋកិច្ចប្រមាណ ៥០ ចាប់តាំងពីខែឧសភា ដែលវិធានការទាំងនោះ បានផ្តល់ហិរញ្ញវត្ថុយ៉ាងច្រើនលើវិស័យហេដ្ឋារចនាសម្ព័ន្ធ និងការបន្ថយពន្ធលើអាជីវកម្ម។
លោក Zhao Chenxin បញ្ជាក់ថា៖ «ដោយសារតែឥទ្ធិពលប្រែប្រួលនៃបរិយាកាសខាងក្រៅ និងខាងក្នុង វានៅតែមានភាពផ្ទុយគ្នា រួមទាំងបញ្ហាមួយចំនួននៃដំណើរការសេដ្ឋកិច្ច ដូច្នេះការអភិវឌ្ឍសេដ្ឋកិច្ច នៅតែប្រឈមមុខនឹងការលំបាក និងបញ្ហាប្រឈមជាច្រើន»។
ដោយសារតែការថយចុះទំនុកចិត្តរបស់អ្នកប្រើប្រាស់ និងអាជីវកម្ម ក្រុមហ៊ុននានា មានការប្រុងប្រយ័ត្ន ក្នុងការពង្រីក និងជួលកម្លាំងកម្មករបន្ថែម។ ផ្អែកលើការស្ទង់មតិទូទាំងប្រទេស បានបង្ហាញថា អត្រាគ្មានការងារធ្វើ បានថយចុះបន្តិចមកត្រឹម ៥,៣ភាគរយ ក្នុងខែសីហា ខណៈខែកក្កដា មាន ៥,៤ ភាគរយ។ ទិន្ន័យដដែល បង្ហាញថា ភាពអត់ការងារធ្វើរបស់យុវជនចិន ស្ថិតនៅក្នុងតួលេខខ្ពស់ គឺ ១៨,៧ ភាគរយ ធៀបនឹងកំណត់ត្រាខ្ពស់បំផុត ១៩,៩ ភាគរយ កាលពីខែកក្កដា។
លោក Zhao Chenxin បានបន្ថែមថា ប្រទេសចិននឹងចាត់វិធានការ ដើម្បីធ្វើឱ្យមានស្ថិរភាពខ្សែចង្វាក់ផ្គត់ផ្គង់របស់ខ្លួន និងបង្កើនគោលនយោបាយទាក់ទាញការវិនិយោគពីបរទេស ជាពិសេសក្នុងវិស័យផលិតកម្ម៕