រដ្ឋមន្ត្រីទទួលបន្ទុកកិច្ចការជនភៀសខ្លួនអ៊ីស្រាអែល លោក Nachman Shai ។ AFP
អនុប្រធានក្រុមប្រឹក្សាសន្តិសុខរុស្ស៊ីលោក ឌីមីទ្រី ម៉េដវ៉េដេវ នៅថ្ងៃចន្ទទី ១៧ តុលា បានព្រមានអ៊ីស្រាអែលចំៗកុំឱ្យ បញ្ជូនអាវុធទៅឱ្យអ៊ុយក្រែន។ លោកនិយាយថា បើអ៊ីស្រាអែលធ្វើដូច្នោះនោះ ទំនាក់ទំនងរវាងទីក្រុងហ្ស៊េរុយសាឡិមនិងម៉ូស្គូនឹងត្រូវបំផ្លាញជាមិនខាន។
«អ៊ីស្រាអែលហាក់បីដូចជា កំពុងរៀបចំផែនការផ្គត់ផ្គង់សព្វាវុធឱ្យទៅរបបក្រុងកៀវ។ នេះ គឺជាសកម្មភាពដែលមិនបានគិតពីផលប៉ះពាល់នៅពេលក្រោយខ្លាំងណាស់។ ទង្វើនេះ នឹងបំផ្លាញទំនាក់ទំនងអន្តររដ្ឋទាំងអស់រវាងប្រទេសរបស់យើងទាំង២ »។ លោកម៉េដវ៉េដេវ បាននិយាយដូច្នោះនៅក្នុងសារបង្ហោះតាមបណ្តាញសង្គមតេឡេក្រាមដោយមិនបានផ្តល់ព័ត៌មានលម្អិតបន្ថែមលើសនេះទៀតឡើយ។
អតីតប្រធានាធិបតីរុស្ស៊ី លោក ឌីមីទ្រី ម៉េដវ៉េដេវ ដែលបច្ចុប្បន្នមានតួនាទីជាអនុប្រធានក្រុមប្រឹក្សាសន្តិសុខនៃប្រទេសរុស្ស៊ី ត្រូវបានគេចាត់ទុកថា ជាសម្ព័ន្ធមិត្តដ៏សំខាន់ ១រូបរបស់ប្រធានាធិបតីរុស្ស៊ី វ្ល៉ាឌីមៀរ ពូទីន។
ការអត្ថាធិប្បាយរបស់លោកអនុប្រធានក្រុមប្រឹក្សាសន្តិសុខរុស្ស៊ីនេះ ធ្លាក់មកភ្លាមៗបន្ទាប់ពីរុស្ស៊ី បានបើកការវាយប្រហារជាថ្មីលើរដ្ឋធានីអ៊ុយក្រែន កាលពីព្រឹកថ្ងៃចន្ទ តាមរយៈយន្តដ្រូនអត្តឃាតគ្មានមនុស្សបើកដែលទំនងជាផលិតដោយប្រទេសអ៊ីរ៉ង់។
កាលពីសប្តាហ៍មុន ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បាននិយាយថា រុស្ស៊ីកំពុងប្រើប្រាស់យន្តដ្រូនគ្មានមនុស្សបើកដែលផលិតដោយអ៊ីរ៉ង់ដើម្បីតម្រង់គោលដៅវាយប្រហារទៅលើជនស៊ីវិលអ៊ុយក្រែន។
ទូរទស្សន៍ CNN បានទាក់ទងទៅកាន់ការិយាល័យនាយករដ្ឋមន្ត្រីអ៊ីស្រាអែល ដើម្បីសុំការឆ្លើយតបដែរ ប៉ុន្តែពួកគេមិនបានឆ្លើយតបអ្វីឡើយចំពោះការអះអាងរបស់លោកម៉េដវ៉េដេវ។
យ៉ាងណាក៏ដោយ គេមើលឃើញថា ការព្រមានរបស់លោកម៉េដវ៉េដេវ គឺជាការឆ្លើយតបចំពោះសេចក្តីអំពាវនាវរបស់រដ្ឋមន្ត្រីអ៊ីស្រាអែល ១ រូបគឺលោក នេកម៉េន ហ្សៃ (Nachman Shai) ដែលកាលពីថ្ងៃអាទិត្យអំពាវនាវឱ្យរដ្ឋាភិបាលក្រុងហ្ស៊េរុយសាឡិមបញ្ជូនជំនួយយោធាទៅដល់អ៊ុយក្រែន ក្រោយពីមានសេចក្តីរាយការណ៍ថា អ៊ីរ៉ង់គ្រោងនឹងផ្តល់ឱ្យទីក្រុងម៉ូស្គូនូវមីស៊ីលបាលីស្ទិក។
លោក ហ្សៃ បាននិយាយថា៖ «ព្រឹកនេះមានសេចក្តីរាយការណ៍ថា អ៊ីរ៉ង់ កំពុងដឹកមីស៊ីលបាលីស្ទិកទៅឱ្យរុស្ស៊ី។ គ្មានអ្វីគួរឱ្យ សង្ស័យទៀតនោះទេតើថាអ៊ីស្រាអែល គួរឈរនៅខាងណាក្នុងជម្លោះបង្ហូរឈាមនេះ។ វាដល់ពេលហើយសម្រាប់អ៊ុយក្រែនក្នុងការទទួលបានជំនួយយោធាដូចជាអ្វីដែលសហរដ្ឋអាមេរិក និងបណ្តាប្រទេសអូតង់ធ្វើអ៊ិញ្ចឹងដែរ»។
គួរជ្រាបថាទោះបីជាអ៊ីស្រាអែល បានថ្កោលទោសជាផ្លូវការចំពោះការលុកលុយរបស់រុស្ស៊ី និងបានបញ្ជូនជំនួយទៅដល់អ៊ុយក្រែនជាទៀងទាត់ក៏ដោយក៏អ៊ីស្រាអែល នៅមិនទាន់បានបញ្ជូនអាវុធទៅទីក្រុងកៀវនៅឡើយទេ។ កន្លងមក នេះ អ៊ីស្រាអែល ត្រូវបានគេរិះគន់ថា មិនបានរិះគន់រុស្ស៊ីឱ្យ បានខ្លាំងគ្រប់គ្រាន់ចំពោះសកម្មភាពបង្កសង្គ្រាមនៅក្នុងប្រទេសអ៊ុយក្រែន៕
វីដេអូ៖
