BYD Co ដែលជាក្រុមហ៊ុនដ៏ធំរបស់ចិនផ្នែកផលិតរថយន្តអគ្គិសនី បានបញ្ជាក់ថាប្រាក់ចំណេញសុទ្ធនៅត្រីមាសទី ៣ ទំនងជាកើនឡើងជាង ៤ ដង។ ជាការកើនឡើងដោយសារតែកំណើននៃការលក់រឹងមាំ និងគុណភាពផលិតផលកាន់តែប្រសើរ ដែលនាំឱ្យភាគហ៊ុនរបស់ក្រុមហ៊ុននេះកើនឡើង។ ខណៈក្រុមហ៊ុនតៃវ៉ាន់ឯណោះវិញ សម្រុកបង្ហាញបច្ចេក វិទ្យាថ្មីលើរថយន្តអគ្គិសនី។
ក្រុមហ៊ុនបានប៉ាន់ប្រមាណថា ប្រាក់ចំណេញសុទ្ធសម្រាប់ខែកក្កដាដល់ខែកញ្ញាមានចន្លោះពី ៧៦៥ លានដុល្លារ ទៅ ៨៣០ លានដុល្លារ ឬបានន័យថា កើនឡើងរហូតដល់ ៣៣៣% ទៅ ៣៦៥% បើធៀបនឹងរយៈពេលដូចគ្នាកាលពីឆ្នាំមុន។
ភាគហ៊ុនរបស់ក្រុមហ៊ុន BYD នៅហុងកុង បានកើនឡើង ៤% នៅព្រឹកថ្ងៃអង្គារ ទី ១៨ ខែតុលា ខណៈភាគហ៊ុនរបស់ក្រុមហ៊ុននៅ Shenzhen បានកើនឡើង ៥%។ ភាគហ៊ុនរបស់ក្រុមហ៊ុននេះមានចំណែក ១៩% ជារបស់មហាសេដ្ឋីអាមេរិកលោក Warren Buffett។
គោលនយោបាយរបស់រដ្ឋាភិបាល ក្នុងការលើកម្ពស់ការប្រើប្រាស់រថយន្តអគ្គិសនី ក៏បានរួមចំណែកធ្វើឱ្យការលក់រថយន្តប្រភេទនេះមានការកើនឡើងដែរ ជាពិសេសសម្រាប់ប្រទេសចិនដែលជាទីផ្សាររថយន្តដ៏ធំលំដាប់ទី២លើពិភពលោក។
ការលក់រួមគ្នាលើប្រភេទរថយន្តផ្សេងៗរបស់ក្រុមហ៊ុន BYD ដែលមានដូចជារថយន្តអគ្គិសនីសុទ្ធ និងរថយន្តកូនកាត់ បានកើនឡើង ២៥០% ក្នុងរយៈពេល៩ខែដំបូងនៃឆ្នាំ ២០២២។
ចំណែកឯតៃវ៉ាន់វិញ! នៅថ្ងៃអង្គារទី ១៨ ខែតុលានេះ ក្រុមហ៊ុនបច្ចេកវិទ្យាដ៏ធំរបស់តៃវ៉ាន់គឺ Foxconn បានបញ្ចេញរថយន្តរចនាថ្មី ចំនួន ២ ម៉ូដែលបន្ថែមទៀត។ រថយន្តទាំងនេះ គឺជាប្រភេទរថយន្តអគ្គិសនីគំរូ ដែលមានទាំងបែប Pickup ផង ខណៈដែលក្រុមហ៊ុននេះអះអាងថា នឹងចាប់ផ្តើមផលិតរថយន្ត ដែលបានរចនាហើយ នៅចុងឆ្នាំនេះ។
ក្រុមហ៊ុន Foxconn គឺជាក្រុមហ៊ុនទទួលផលិតឧបករណ៍អេឡិចត្រូនិកដ៏ធំមួយរបស់ពិភពលោក ហើយក្រុមហ៊ុននេះក៏ត្រូវបានគេស្គាល់ថា ជាក្រុមហ៊ុនផលិតនិងផ្គុំគ្រឿងអេឡិចត្រូនិកឱ្យក្រុមហ៊ុនផលិតទូរស័ព្ទអាមេរិក Apple។
នារយៈពេលចុងក្រោយនេះក្រុមហ៊ុន បានផ្លាស់ប្តូរដោយការធ្វើពិពិធកម្មលើសពីការផ្គុំគ្រឿងអេឡិចត្រូនិក និងចាប់ផ្តើមអាជីវកម្មដែលមានលក្ខណៈប្រកួតប្រជែង។ ប៉ុន្តែក្រុមហ៊ុននេះ ក៏បោះជើងចូលយ៉ាងឆាប់រហ័សក្នុងវិស័យរថយន្តអគ្គិសនី ដែលកាលពីឆ្នាំមុនក្រុមហ៊ុន បានបញ្ចេញរថយន្តគំរូចំនួន ៣ គ្រឿង៕