.jpg)
រដ្ឋ Texas ប្តឹងក្រុមហ៊ុន Google ដែលលួចទិន្នន័យរបស់អ្នកប្រើប្រាស់រាប់លាននាក់។ រូបថត AFP
រដ្ឋតិចសាស់ (Texas) របស់សហរដ្ឋអាមេរិក បានដាក់ពាក្យប្តឹងក្រុមហ៊ុន Google ក្រោមការចោទប្រកាន់ថាបានប្រមូលទិន្នន័យជីវមាត្រ (biometric) របស់អ្នករស់នៅក្នុងរដ្ឋនេះរាប់លាននាក់ ដោយមិនទទួលបានការយល់ព្រមត្រឹមត្រូវ ពីអ្នកប្រើប្រាស់ឡើយ។ នេះបានបើតាមការិយាល័យមេធាវីរដ្ឋតិចសាស់ក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ ទី ២០ ខែតុលា។
ពាក្យបណ្តឹងទៅកាន់តុលាការ បានលើកឡើងថាក្រុមហ៊ុនបច្ចេកវិទ្យានានា ដែលកំពុងប្រតិបត្តិការនៅក្នុងរដ្ឋតិចសាស់ ត្រូវបានហាមឃាត់អស់រយៈពេលជាង ១ ទស្សវត្សរ៍មកហើយ ចំពោះការប្រមូលព័ត៌មានរូបថតផ្ទៃមុខ សំឡេង ឬទិន្នន័យជីវមាត្រផ្សេងទៀតរបស់អ្នកប្រើប្រាស់ ដោយគ្មានការយល់ព្រម។
ពាក្យបណ្តឹងដដែលឱ្យដឹងថានៅចំពោះការមិនគោរពច្បាប់ និងឥតលាក់លៀម Google បានប្រមូលទិន្នន័យជីវមាត្រពីឆ្នាំ ២០១៥ ពីប្រជាជនក្នុងរដ្ឋតិចសាស់ សឹងតែរាប់មិនអស់ ហើយថែមទាំងបានប្រើប្រាស់ទិន្នន័យផ្ទៃមុខ និងសំឡេង ដើម្បីបម្រើផលប្រយោជន៍បែបពាណិជ្ជកម្មរបស់ Google។ ជាការពិតណាស់ ប្រជាជននៅទូទាំងរដ្ឋ ជារៀងរាល់ថ្ងៃ បានក្លាយជាជនរងគ្រោះដោយមិនដឹងខ្លួន ពោលគឺពួកគេត្រូវបាន Google បោកបញ្ឆោតដើម្បីរកប្រាក់ចំណេញ។
Google មិនបានឆ្លើយតបភ្លាមៗចំពោះសំណើសុំយោបល់ ពាក់ព័ន្ធនឹងករណីខាងលើនេះឡើយ។
សេចក្តីថ្លែងការណ៍មេធាវីឱ្យដឹងថា ការប្រមូលទិន្នន័យរបស់ Google ធ្វើឡើងតាមរយៈផលិតផល និងសេវាកម្មដូចជា Google Photos, Google Assistant និង Nest Hub Max ជាដើម។
គួរជ្រាបថា បណ្ដឹងខាងលើនេះគឺជាបណ្ដឹងមួយក្នុងចំណោមរដ្ឋមួយចំនួនទៀតរបស់សហរដ្ឋអាមេរិក ដែលបានប្ដឹងប្រឆាំងនឹង Google ដោយចោទប្រកាន់ពីការអនុវត្តមិនយុត្តិធម៌ទាក់ទងនឹងឯកជនភាព។ រដ្ឋអារីហ្សូណាជារដ្ឋមួយ ដែលទទួលបានការទូទាត់សំណងនៅដើមខែតុលាក្នុងទំហំទឹកប្រាក់ ៨៥ លានដុល្លារ។
រដ្ឋតិចសាស់ រដ្ឋអ៊ីនឌីយ៉ាណា រដ្ឋវ៉ាស៊ីនតោន ក៏បានដាក់ពាក្យប្តឹង Google កាលពីខែមករា ឆ្នាំ ២០២២ កន្លងទៅដែរ។ ជាការប្តឹងដោយចោទប្រកាន់ថា Google ការអនុវត្តកម្មវិធីតាមដានទីតាំងរបស់អ្នកប្រើប្រាស់ដែលទង្វើនេះគឺជាការឈ្លានពានឯកជនភាពរបស់អ្នកប្រើប្រាស់។
ជុំវិញការចោទប្រកាន់ដោយរដ្ឋទាំង ៣ ខាងលើ កាលពីដើមឆ្នាំ ត្រូវបានអ្នកនាំពាក្យក្រុមហ៊ុនឆ្លើយតបថា ជាការចោទប្រកាន់ដោយសំអាងលើទិន្នន័យខុស។ លោក Jose Castaneda អ្នកនាំពាក្យក្រុមហ៊ុន Google បានបញ្ជាក់ថា៖ «យើងតែងតែបង្កើតមុខងារឯកជនភាពទៅក្នុងផលិតផលរបស់យើង និងផ្តល់ការគ្រប់គ្រងដ៏រឹងមាំសម្រាប់ទិន្នន័យទីតាំង។ យើងនឹងការពារខ្លួនឯងយ៉ាងម៉ឺងម៉ាត់ចំពោះការចោទប្រកាន់ទាំងនេះ»៕
