ហិរញ្ញវត្ថុគឺជាកត្តាតានតឹងដ៏ខ្លាំងសម្រាប់មនុស្សជាច្រើន។ នៅក្នុងសហរដ្ឋអាមេរិក ៤២% នៃមនុស្សពេញវ័យ និយាយថាលុយកំពុងជះឥទ្ធិពលអវិជ្ជមានដល់សុខភាពផ្លូវចិត្តរបស់ពួកគេ។ នេះបើតាមការស្ទង់មតិថ្មីមួយរបស់ក្រុមហ៊ុនសេវាកម្មហិរញ្ញវត្ថុ Bankrate។
ក្នុងចំណោមមនុស្សគ្រប់វ័យទាំងអស់ ក្រុមអ្នកដែលមានអាយុចន្លោះពី ២៦ ទៅ ៤១ ឆ្នាំ ជួបប្រទះការថប់បារម្ភ ផ្នែកហិរញ្ញវត្ថុច្រើនបំផុត ពោលគឺមានចំនួន ៤៨%។
អ្នកជំនាញខាងគ្រប់គ្រងហិរញ្ញវត្ថុ លោក វីលៀម (T.J. Williams) បានមានប្រសាសន៍ថា ក្រុមមនុស្សអាយុពី ២៦ ទៅ ៤១ ឆ្នាំត្រូវជួបទុក្ខភ័យព្រួយច្រើនពីរឿងលុយកាក់ ព្រោះថា៖ «នោះជាពេលដែលយើង មានកូនដំបូង ចាប់ផ្ដើមដំបូង ឬមានភាពអសន្តិសុខជុំវិញការងារយើង ព្រោះយើងមិនបានធ្វើវាយូរល្មមគ្រប់គាន់។ យើងនៅមិនទាន់បានសន្សំប្រាក់កាសទេ»។
អ្នកជំនាញដដែលនេះ បានពន្យល់ទៀតថា ទាំងនោះគឺជាបទពិសោធធម្មតាដែលមនុស្សមានរាប់ជំនាន់មកហើយ ប៉ុន្តែសង្គមបានបង្កើតភាពខុសគ្នាទៅលើបទពិសោធ។ ប្រព័ន្ធផ្សព្វផ្សាយសង្គមបានដាក់សម្ពាធដែលមិនសមហេតុផលយ៉ាងច្រើន»។
គួរកត់សម្គាល់ថា ចំនួនស្ត្រីដែលបង្ហាញថាលុយមានឥទ្ធិពលយ៉ាងខ្លាំងទៅលើស្ថានភាពផ្លូវចិត្តរបស់ពួកគេមានច្រើនជាងបុរស ដោយស្ត្រីមាន ៤៦% ធៀបនឹងបុរស ៣៨%។ ហើយនៅពេលនិយាយដល់ប្រាក់ចំណូលវិញ ជាធម្មតា គឺអ្នកដែលមានប្រាក់ចំណូលទាប ជួបប្រទះនឹងបញ្ហាផ្លូវចិត្តច្រើនជាងអ្នកដែលមានប្រាក់ចំណូលខ្ពស់។
លុយគឺជាអាវុធមុខ ២។ លុយអាចទាំងធ្វើឱ្យមនុស្សរីករាយ និងកើតទុក្ខ។ ទីប្រឹក្សាផ្នែកសន្តិសុខហិរញ្ញវត្ថុ បានផ្តល់យោបល់ថា៖ «ប្រសិនបើអ្នកចង់ចាប់យកសុខភាពផ្លូវចិត្តជាអាទិភាព ការបន្ថយការថប់ បារម្ភ មួយចំនួនជុំវិញការគ្រប់គ្រងថវិកា គឺជាគន្លឹះដ៏ល្អមួយដែលអ្នកគួរតែចាប់ផ្តើមអនុវត្តមុនគេ»។
ខាងក្រោមនេះ គឺជាវិធីសាស្ត្រ ៣ យ៉ាងដែលអ្នកជំនាញផ្តល់ជូនដើម្បីធ្វើឱ្យអ្នកមានអារម្មណ៍ថាមានសុវត្ថិភាពផ្នែកហិរញ្ញវត្ថុ និងអាចរក្សាសុខភាពផ្លូវចិត្តវិជ្ជមានបាន៖
១. បង្កើតទុនបម្រុងសាច់ប្រាក់៖ សន្សំប្រាក់ឱ្យបានគ្រប់គ្រាន់ ដើម្បីទុកប្រើប្រាស់ក្នុងករណីបន្ទាន់ ឬចាំបាច់ណាមួយ។
២. សរសេរផែនការទុកសម្រាប់ដោះស្រាយការសងបំណុល ហើយព្យាយាមធ្វើយ៉ាងណាសម្រេចវាឱ្យបានដូចការគ្រោងទុក។
៣. ពិនិត្យប្រចាំខែ (ឬប្រចាំសប្តាហ៍) នូវថវិកាដែលអ្នកមាន ដែលនេះមានន័យថា ត្រូវគិតគូរពីចំនួនប្រាក់ដែលអ្នកត្រូវការសម្រាប់ចំណាយលើថ្លៃផ្សេងៗដូចជា ថ្លៃជួលផ្ទះ ទិញសម្ភារឧបករណ៍ប្រើប្រាស់ផ្សេងៗ និងគ្រឿងទេសជាដើម។ សម្រាប់មនុស្សមួយចំនួន ពួកគេក៏ទំនងជាត្រូវពិចារណាដែរ ចំពោះការចំណាយលើថាមពល និងថ្លៃធានារ៉ាប់រង។
អ្នកជំនាញខាងគ្រប់គ្រងហិរញ្ញវត្ថុ លោក វីលៀម បានសង្កត់ធ្ងន់ដែរថា គេអាចពិចារណាពីដៃគូជីវិតដើម្បីដោះស្រាយបន្ទុកហិរញ្ញវត្ថុដែលអាចនាំឱ្យប៉ះពាល់ដល់ផ្លូវចិត្ត។ ឧទាហរណ៍ដូចជាព្យាយមជ្រើសរើសដៃគូដែលមានទំនួលខុសត្រូវ អាចឱ្យអ្នកចែករំលែកគោលដៅហិរញ្ញវត្ថុជាមួយគ្នាបាន ហើយដៃគូនោះទៀតសោធ គួរតែមិនមែនជាបុគ្គលដែលអង្គុយចាំតែរិះគន់វិនិច្ឆ័យ តែត្រូវជាបុគ្គលម្នាក់ដែលតាមគាំទ្រអ្នក ក្នុងពេលជួបបញ្ហា។
លោក វីលៀម បន្តថាមនុស្សគ្រប់រូបត្រូវចងចាំថា អ្វីៗគ្រប់យ៉ាងដែលគេឃើញនៅលើប្រព័ន្ធផ្សព្វផ្សាយសង្គម មិនមែនសុទ្ធតែជាការពិតទាំងអស់នោះទេ។ «ការប្រៀបធៀប ស្ថានភាពហិរញ្ញវត្ថុរបស់អ្នកជាមួយអ្នកដទៃ ដោយសារពួកគេបង្ហោះរូបភាពធ្វើដំណើរកម្សាន្ត ឬទិញរថយន្តថ្មី នឹងធ្វើឱ្យអ្នកមានអារម្មណ៍កាន់តែមិនល្អ»៕
