សេដ្ឋកិច្ចរបស់ប្រទេសចិន បានស្ទុះងើបឡើងវិញ ក្នុងល្បឿនលឿនជាងការរំពឹងទុក នៅក្នុងត្រីមាសទី៣។ នេះបើតាមទិន្នន័យផ្លូវការ នៅថ្ងៃទី ២៤ ខែតុលា។ ប៉ុន្តែការទប់ស្កាត់កូវីដ ១៩ ដ៏តឹងរ៉ឹង វិបត្តិអចលនទ្រព្យកាន់តែជ្រៅ និងហានិភ័យនៃការធ្លាក់ចុះសេដ្ឋកិច្ចពិភពលោក កំពុងក្លាយជាក្តីប្រឈម ចំពោះកិច្ចខិតខំប្រឹងប្រែងរបស់ទីក្រុងប៉េ កាំង ក្នុងការជំរុញការងើបឡើងវិញ នៅឆ្នាំក្រោយ។
ផលិតផល ក្នុងស្រុកសរុប (GDP) នៅក្នុងប្រទេស ដែលមានសេដ្ឋកិច្ចធំបំផុតទី២ របស់ពិភពលោក បានកើនឡើង ៣,៩% នៅក្នុងត្រីមាសទី៣ ពីខែកក្កដា ដល់ខែកញ្ញា ធៀបនឹងរយៈពេលដូចគ្នា កាលពីឆ្នាំមុន។ នេះបើតាមទិន្នន័យផ្លូវការ ដែលចេញផ្សាយនៅថ្ងៃចន្ទ ទី ២៤ ខែតុលា ឆ្នាំ ២០២២។ ទិន្នន័យនេះគឺខ្ពស់ជាងការព្យាកររបស់សារព័ត៌មាន Reuters ដែលថា កំណើន GDP របស់ចិនកើនឡើងតែ ៣,៤%ប៉ុណ្ណោះនិង ០,៤% ពីត្រីមាសទី២។
ដំបូងនៃឡើយទិន្នន័យនេះ គ្រោងនឹងចេញផ្សាយ នៅថ្ងៃទី ១៨ ខែតុលា ប៉ុន្តែត្រូវពន្យារពេលរហូតដល់ក្រោយសមាជបក្សកុម្មុយនីស្តចិន ដែលបានធ្វើឡើងកាលពីសប្តាហ៍មុន។ សមាជបក្ស ដែលលោក ស៊ី ជីនភីង ទទួលបានអាណត្តិដឹកនាំលើកទី៣ ជាប្រវត្តិសាស្ត្រ ហើយថែមទាំងប្រមូលអ្នកស្មោះត្រង់របស់លោក សម្រាប់សមាសភាពគណៈកម្មាធិការអចិន្ត្រៃយ៍នៃការិយាល័យនយោបាយបក្សកុម្មុយនីស្តចិនផង។
ទោះបីជាមានការស្ទុះងើបឡើងវិញក៏ដោយ ប៉ុន្តែសេដ្ឋកិច្ចចិន ក៏កំពុងប្រឈមមុខនឹងបញ្ហាជាច្រើនទាំងក្នុងប្រទេស និងក្រៅប្រទេស។ បញ្ហាទាំងនោះរួមមាន យុទ្ធសាស្ត្រទប់ស្កាត់កូវីដ ១៩ របស់ចិន និងវិបត្តិក្នុងវិស័យអចលនទ្រព្យរបស់ចិន ដែលបានធ្វើឱ្យសម្ពាធពីខាងក្រៅកាន់តែមានទំងន់ថែមទៀត ជាពិសេសឥទ្ធិពលពីវិបត្តិអ៊ុយក្រែន និងការថយចុះនៃសេដ្ឋកិច្ចសកល ដោយសារការដំឡើងអត្រាការប្រាក់ ដើម្បីទប់ស្កាត់អតិផរណា។
ការស្ទង់មតិរបស់ទីភ្នាក់ងារសារព័ត៌មាន Reuters បានព្យាករថា កំណើនសេដ្ឋកិច្ចរបស់ប្រទេសចិន នឹងថយចុះមកត្រឹម ៣,២% នៅឆ្នាំ២០២២ ខណៈការព្យាករផ្លូវការរបស់ចិនគឺ ៥,៥%។ ជាការថយចុះនៃកំណើនសេដ្ឋកិច្ចដ៏អាក្រក់បំផុត ក្នុងរយៈពេលជិតកន្លះសតវត្សរ៍។
ឆ្លើយតបនឹងបញ្ហានេះ អ្នករៀបចំគោលនយោបាយ បានដាក់ចេញនូវវិធានការគាំទ្រសេដ្ឋកិច្ចជាង ៥០ ចាប់តាំងពីចុងខែឧសភា ដែលជាយន្តស្វែងរកការជំរុញសេដ្ឋកិច្ច។
ទិន្នន័យដាច់ដោយឡែកមួយទៀត បានបង្ហាញថា សកម្មភាពក្នុងឧស្សាហកម្មចិន នាខែកញ្ញា បានកើនឡើង ៦.៣% ធៀបនឹងឆ្នាំមុន ដែលលើសពីការរំពឹងទុក ៤,៥%។ ប៉ុន្តែកំណើននៃការលក់រាយនៅតែមានភាពទន់ខ្សោយ ពោលគឺបានកើនឡើងតែ ២,៥% អាក្រក់ជាងការរំពឹងទុក ដែលថា នឹងកើនឡើង ៣,៣%៕