បណ្តាប្រទេសសហភាពអឺរ៉ុបជួបប្រជុំគ្នា នៅថ្ងៃចន្ទ ទី ២៤ ខែតុលា ដើម្បីរកចំណុចឯកភាពលើជំហរចរចារួមរបស់ពួកគេ ដាក់ចូលក្នុងកិច្ចពិភាក្សាអាកាសធាតុនៅឆ្នាំនេះ ដែលរៀបចំដោយអង្គការសហប្រជាជាតិ។ ប្រធានបទក្តៅក៏រួមបញ្ចូលរឿងសំណងហិរញ្ញវត្ថុ ប៉ះប៉ូវឱ្យ ប្រទេសក្រីក្រ ដែលពួកគេកំពុងរងគ្រោះពីការប្រែប្រួលអាកាសធាតុ។
សហភាពអឺរ៉ុបត្រូវបានគេស្គាល់ថាជាប្រទេសបញ្ចេញឧស្ម័នផ្ទះកញ្ចក់ដ៏ធំបំផុតទី៣ របស់ពិភពលោក ដែលកំពុងប្រឈមមុខនឹងសម្ពាធពីប្រទេសកំពុងអភិវឌ្ឍន៍។ ប្រឈមមុខនៅត្រង់ថាប្រទេសក្រីក្រចង់ឱ្យអឺរ៉ុប បន្ទន់ជំហររបស់ខ្លួន ដែលជាជំហរមិនចង់ប៉ះប៉ូវទៅឱ្យ ប្រទេសក្រីក្រ ដែលពួកគេកំពុងរងគ្រោះដោយទឹកជំនន់ ការកើនឡើងនៃទឹកសមុទ្រ និងផលប៉ះពាល់ ដែលបណ្តាលមកពីការប្រែប្រួលអាកាសធាតុ។
សេចក្តីព្រាងនៃគោលជំហរចរចារបស់សហភាពអឺរ៉ុបសម្រាប់កិច្ចប្រជុំកំពូលនៃអង្គការសហប្រជាជាតិក្នុងខែវិច្ឆិកាខាងមុខ ត្រូវអនុម័តនៅថ្ងៃចន្ទ ទី ២៤ ខែតុលា តាមរយៈជំនួបនៃរដ្ឋមន្ត្រីទាំងអស់របស់អឺរ៉ុប។ សេចក្តីព្រាងនោះបានបង្ហាញថា ប្លុកប្រទេសទាំង ២៧ នឹងគាំទ្រកិច្ចពិភាក្សាលើប្រធានបទខាងលើ នៅឯកិច្ចប្រជុំ COP27 ដែលគ្រោងនឹងធ្វើឡើងនៅក្នុងប្រទេសអេហ្ស៊ីប។
ការលើកយកប្រធានបទនៃការប៉ះប៉ូវសម្រាប់ប្រទេសក្រីក្រ គឺជាការបោះជំហានមួយរបស់អឺរ៉ុប ដែលប្រធានបទនេះ តែងត្រូវបានលើកឡើងជាហូរហែឥតដាច់។ ប្រទេសក្នុងតំបន់នេះ បានបង្ហាញនូវទស្សនៈផ្សេងគ្នាលើប្រធានរឿងមួយនេះ។
សេចក្តីព្រាងឯកសាររបស់សហភាពអឺរ៉ុប ដែលសារព័ត៌មាន Reutersទទួលបានកាលពីថ្ងៃសុក្រ កន្លងទៅ បាននិយាយថា «សកម្មភាព និងការគាំទ្រសម្រាប់ប្រទេសងាយរងគ្រោះ ប្រជាជន និងក្រុមងាយរងគ្រោះ ចាំបាច់ត្រូវតែពង្រីកបន្ថែមទៀត»។ ប៉ុន្តែឯកសារនេះនៅតែបង្ហាញភាពមិនច្បាស់លាស់នៅឡើយ ថាតើវានឹងក្លាយទៅជាប្រធានបទបន្ទាន់មួយសម្រាប់ កិច្ចពិភាក្សារបស់អង្គការសហប្រជាជាតិ ដែលមានប្រទេសចូលរួមជាង ២០០នាចុងឆ្នាំនេះ ឬយ៉ាណា?
ប្រទេសកំពុងអភិវឌ្ឍន៍និយាយថា សន្និសីទស្តីពីអាកាសធាតុ COP27 ត្រូវតែបង្កើតកញ្ចប់មូលនិធិមួយដើម្បីគាំទ្រប្រទេសដែលរងគ្រោះដោយផលប៉ះពាល់អាកាសធាតុដូចជាទឹកជំនន់នៅក្នុងប្រទេសប៉ាគីស្ថានក្នុងឆ្នាំនេះ។ ជំនន់នៅប៉ាគីស្ថាន ដែលបានសម្លាប់ជីវិតមនុស្សជិត ១ ៧០០ នាក់។
រដ្ឋមន្ត្រីនៃបណ្តាប្រទេសអឺរ៉ុបក៏នឹងសម្រេចនៅថ្ងៃចន្ទ ទី ២៤ ខែតុលាថាតើ EU គួរតែប្ដេជ្ញាពង្រីកនូវគោលដៅការប្រែប្រួល អាកាសធាតុរបស់ខ្លួនឱ្យកាន់តែមានមហិច្ឆិតាជាងមុនឬយ៉ាងណា។នេះបើយោងតាមសេចក្តីព្រាងឯកសារដដែល៕