ប្រធានាធិបតីចិន លោក Xi Jinping (ឆ្វេង) និងប្រធានាធិបតីតៃវ៉ាន់ លោកស្រី Tsai Ing-wen។ រូបថត AFP
ប្រធានក្រុមប្រឹក្សាកិច្ចការចិនដីគោករបស់តៃវ៉ាន់ បាននិយាយនៅថ្ងៃសុក្រ ទី ២៨ តុលានេះថា ចិនគួរតែបញ្ឈប់ការបង្ហាញ ឬការគំរាមកំហែងផ្នែកកម្លាំងយោធារបស់ខ្លួន ប្រឆាំងនឹងតៃវ៉ាន់ទៀតទៅ ហើយគួរតែរក្សាសន្តិភាព និងស្ថិរភាពវិញ។ ការលើកឡើងរបស់មន្ត្រីក្រុងតៃប៉ិនេះ ធ្លាក់មកនៅខណៈដែលប៉េកាំងបង្កើនសម្ពាធផ្នែកនយោបាយ និងយោធាលើតៃវ៉ាន់ដែលចិនបានអះអាងថាជាផ្នែកមួយរបស់ខ្លួន។
ចិន បានធ្វើសមយុទ្ធយោធានៅជុំវិញកោះតៃវ៉ាន់ក្នុងខែសីហា ដើម្បីបង្ហាញការខឹងសម្បារបស់ខ្លួនចំពោះដំណើរទស្សនកិច្ចទៅកាន់ទីក្រុងតៃប៉ិរបស់ប្រធានសភាសហរដ្ឋអាមេរិកលោកស្រី ណាន់ស៊ី ប៉េឡូស៊ី។ ចាប់តាំងពីពេលនោះមក ចិនបានរក្សាសកម្មភាពយោធារបស់ខ្លួន បើទោះបីជាមានកម្រិតថមថយក៏ដោយចុះ។
រដ្ឋមន្ត្រីក្រុមប្រឹក្សាកិច្ចការចិនដីគោករបស់តៃវ៉ាន់លោក ឈីវ តៃសាន (Chiu Tai-san) បាននិយាយក្នុងវេទិកាមួយឯទីក្រុងតៃប៉ិថា៖ «ប៉េកាំង គួរតែបញ្ឈប់ការគំរាមអំពីការឈានទៅប្រើប្រាស់កម្លាំងយោធា ព្រោះវាគ្មានបានអ្វីមកវិញក្រៅតែពីធ្វើឱ្យមានគម្លាតកាន់តែឆ្ងាយរវាងភាគីទាំង ២ និងបង្កើនភាពតានតឹងនៅក្នុងតំបន់តែប៉ុណ្ណោះ»។
មន្ត្រីតៃវ៉ាន់រូបនេះ បានបន្ថែមទៀតថា តៃវ៉ាន់ ជំរុញឱ្យចិនដីគោកឈប់គិតពីរឿងប្រើកម្លាំង ប្រើអាវុធទៀត និងត្រូវងាកមករក្សាសន្តិភាព និងស្ថិរភាពវិញ។ គន្លឹះឆ្ពោះទៅសន្តិភាព គឺត្រូវបង្វែរផ្នត់គំនិតនៃការដោះស្រាយបញ្ហាដោយប្រើកម្លាំង ហើយប៉េកាំងគួរតែដោះស្រាយការខ្វែងគំនិតជាមួយតៃប៉ិតាមរយៈ «កិច្ចសន្ទនាដោយគ្មានដាក់លក្ខខណ្ឌជាមុន»។
ទន្ទឹមគ្នានេះ តៃវ៉ាន់ក៏សង្ឃឹមដែរថា ចិនអាចនឹងបន្ធូរបន្ថយលើវិធានការរឹតត្បិតក្នុងការធ្វើដំណើរដើម្បីគ្រប់គ្រងជំងឺរាតត្បាតកូវីដ ដែលការធ្វើដូច្នោះនឹងបើកផ្លូវឱ្យភាគីទាំង ២ អាចបន្តការផ្លាស់ប្តូរយោបល់និងបង្កើតទំនាក់ទំនងវិជ្ជមានជាមួយគ្នា។
គួរជ្រាបថា ប្រទេសចិនបានបដិសេធម្តងហើយម្តងទៀតនូវការចរចាជាមួយតៃវ៉ាន់ ដែលគ្រប់គ្រងដោយលោកស្រីប្រធានាធិបតី ឆៃ អ៊ីងវេន ដែលទីក្រុងប៉េកាំងចាត់ទុកជាអ្នកផ្តាច់ខ្លួននិយម។
សម្រាប់ចិន តៃវ៉ាន់គឺជាទឹកដីរបស់ខ្លួន។ មេដឹកនាំចិនលោក ស៊ី ជីនពីន បានថ្លែងនាឱកាសបើកសមាជលើកទី២០ របស់បក្សកុម្មុយនីស្តនៅទីក្រុងប៉េកាំងថា ការដោះស្រាយបញ្ហាតៃវ៉ាន់គឺអាស្រ័យលើប្រជាជនចិន ហើយថាចិនត្រូវបង្រួបបង្រួមតៃវ៉ាន់តាមផ្លូវសន្តិវិធី ឬមួយដោយប្រើកម្លាំងបើសិនចាំបាច់។
ចំណែកតៃវ៉ាន់វិញនិយាយថា មានតែប្រជាជន ២៣ លាននាក់របស់កោះនេះប៉ុណ្ណោះ ដែលអាចសម្រេចជោគវាសនាអនាគតរបស់ពួកគេបាន និងថាតៃវ៉ាន់មិនដែលធ្លាប់ត្រូវបានគ្រប់គ្រងដោយសាធារណរដ្ឋប្រជាមានិតចិនទេ។ ទន្ទឹមនេះ តៃប៉ិសង្កត់ធ្ងន់ទៀតថាការអះអាងដែលថា តៃវ៉ាន់ជាខេត្តមួយរបស់ចិនជារឿងមិនត្រឹមត្រូវឡើយ៕
