លោក ប៉ូល ប៉េឡូស៊ី និងប្រធានសភាអាមេរិកលោកស្រី ណាន់ស៊ី ប៉េឡូស៊ី។ រូបថត AFP
ប្រធានាធិបតីអាមេរិកលោក ចូ បៃដិន នៅថ្ងៃសុក្រ ទី ២៨ តុលា បានហៅការវាយប្រហារទៅលើស្វាមីរបស់ប្រធានសភាអាមេរិកលោកស្រី ណាន់ស៊ី ប៉េឡូស៊ី ថា ជាអំពើអាក្រក់និងគួរឱ្យស្អប់ខ្ពើមខ្លាំង។
ជនដែលមានចេតនាឧក្រិដ្ឋម្នាក់ បានវាយប្រហារលោក ប៉ូល ប៉េឡូស៊ី (Paul Pelosi) ដោយញញួររហូតបណ្តាលឱ្យលោករងរបួសបែកក្បាល បន្ទាប់ពីជននោះបានសម្រុកចូលទៅក្នុងផ្ទះរបស់ប្តីប្រពន្ធប៉េឡូស៊ី នៅរដ្ឋកាលីហ្វ័រនីញ៉ា ដើម្បីស្វែងរកលោកស្រីប្រធានសភាអាមេរិក។ នេះបើតាមការឱ្យដឹងពីខាងមន្ត្រីអាមេរិក។
ថ្លែងនៅក្នុងយុទ្ធនាការប្រមូលផ្តុំនៅទីក្រុង ហ្វ៊ីឡាដែលហ្វៀ (Philadelphia) លោក បៃដិន បាននិយាយថាអំពើហិង្សានយោបាយ មិនត្រូវបានស្វាគមន៍ជាដាច់ខាតនៅក្នុងទឹកដីនៃសហរដ្ឋអាមេរិក។ ដោយនិយាយផ្អែកលើសេចក្តីរាយការណ៍របស់ប្រព័ន្ធផ្សព្វផ្សាយ លោកប្រមុខសេតវិមានអាមេរិក ថាជនវាយប្រហារបានស្រែកឡើងថា៖ «តើណាន់ស៊ី នៅឯណា?»។ នេះជាសំឡេងស្រែកដូចគ្នានឹងការស្រែកដែលបានប្រើក្នុងអំឡុងនៃការវាយប្រហារដ៏សាហាវកាលពីថ្ងៃទី ៦ ខែមករា ឆ្នាំ ២០២១ លើវិមានកាពីតូលរបស់អាមេរិក។
លោក បៃដិន បានសង្កត់ធ្ងន់ទៀតថា៖ «ខ្ញុំមិនបានបង្កើត ប្រតិដ្ឋរឿងនេះឡើងទេ»។ «ព័ត៌មាននេះ ត្រូវបានគេរាយការណ៍មក»។
គួរជ្រាបថា ស្វាមីរបស់ប្រធានសភាអាមេរិកលោក ប៉ូល ប៉េឡូស៊ី បានរងការវាយប្រហារដោយជនដែលមានចេតនាឧក្រិដ្ឋម្នាក់ដែលធ្វើសកម្មភាពចាប់បង្ខំ និងបានគំរាមកំហែងដល់អាយុជីវិតរបស់លោក នៅខណៈពេលដែលរូបគេទាមទារជួបលោកស្រី ណាន់ស៊ី ប៉េឡូស៊ី។ នេះបើតាមលោក ដ្រូ ហេមម៊ល (Drew Hammill) អ្នកនាំពាក្យរបស់លោកស្រី ប៉េឡូស៊ី និយាយកាលពីថ្ងៃសុក្រម្សិលមិញ។
មានវ័យ ៨២ ឆ្នាំ លោក ប៉ូល ប៉េឡូស៊ី បានទទួលការវះកាត់ និងកំពុងសម្រាកព្យាបាលនៅមន្ទីរពេទ្យ ហើយរបួសរបស់លោកកំពុងជាសះស្បើយវិញហើយ។ ក្នុងពេលរងការវាយប្រហារ លោកនៅផ្ទះតែម្នាក់ឯង ចំណែកភរិយារបស់លោកវិញកំពុងធ្វើការនៅទីក្រុងវ៉ាស៊ីនតោន។
រយៈពេលតិចជាង ២ សប្តាហ៍មុនការបោះឆ្នោតពាក់កណ្តាលអាណត្តិដ៏សំខាន់របស់សហរដ្ឋអាមេរិក សមាជិកនៃគណបក្សទាំង ២ ពោលទាំងបក្សប្រជាធិបតេយ្យ និងបក្សសាធារណរដ្ឋ បានព្រមានពីអំពើហិង្សាផ្នែកនយោបាយដែលអាចកើតមានឡើង៕
