ទង់សហភាពអឺរ៉ុប នៅពីមុខទីស្នាក់ការកណ្តាលរបស់ធនាគារកណ្តាលអឺរ៉ុប (ECB) ក្នុងទីក្រុង Frankfurt (អាល្លឺម៉ង់) កាលពីថ្ងៃទី ៨ ខែកញ្ញា ឆ្នាំ២០២២។ AFP
អតិផរណា នៅតំបន់ចាយប្រាក់អឺរ៉ូ កំពុងបន្តឡើងដល់កម្រិតខ្ពស់បំផុត។ បើតាមការព្យាករចុងក្រោយបង្អស់ អតិផរណា នៅតំបន់ចាយប្រាក់អឺរ៉ូប្រចាំឆ្នាំមានចំនួន ៩,៩% ធៀបនឹង ៣,៤% ក្នុងឆ្នាំ២០២១។ ដោយឡែកបើតាមទីភ្នាក់ងារស្ថិតិរបស់សហភាពអឺរ៉ុប Eurostat នៅទូទាំងប្លុកអឺរ៉ុប អតិផរណាប្រចាំឆ្នាំ ឈានដល់ ១០,៩% ឯណោះ។
តាមការប៉ាន់ប្រមាណ ក្នុងខែកញ្ញាតម្លៃម្ហូបអាហារ គ្រឿងស្រវឹង និងថ្នាំជក់ ទំនិញឧស្សាហកម្មមិនប្រើថាមពល ហើយនិងសេវាកម្ម បានកើនឡើងដូចតួលេខនៅក្នុងខែកក្កដា និងសីហា ដែលជាពេលមានការព្យាករថា អតិផរណាប្រចាំឆ្នាំ នៅតំបន់ចាយប្រាក់អឺរ៉ូ មានចំនួន ៨,៩% និង ៩,១%។
អតិផរណា នៅចក្រភពអង់គ្លេស បានកើនឡើងដល់កម្រិត ១០,១% ក្នុងខែតុលា។ តួលេខនេះដូចគ្នានឹងចំនួន ដែលបានកត់ត្រា ក្នុងខែកក្កដា ដោយនេះជាកម្រិតខ្ពស់បំផុត ក្នុងរយៈពេល ៤០ ឆ្នាំ។ ការិយាល័យស្ថិតិជាតិអង់គ្លេស បានរាយការណ៍ថា តម្លៃម្ហូបអាហារ កំពុងហក់ឡើងខ្ពស់ខ្លាំងមិនធ្លាប់មានពីមាន ក្នុងអត្រាប្រចាំឆ្នាំ ១៤,៦%។
ការប៉ាន់ស្មានក្នុងខែកញ្ញា ពីទីភ្នាក់ងារស្ថិតិរបស់សហភាពអឺរ៉ុប បង្ហាញថា អតិផរណាថាមពលមានចំនួន ៤០,៧% ធៀបនឹង ៣៨,៦% នៅក្នុងខែសីហា។ បណ្តាប្រទេស-បាល់ទិក ដែលរួមមាន អេស្តូនី ឡេតូនី និងលីទុយអានី នៅតែបន្តរងគ្រោះខ្លាំងជាងគេ ជាពិសេសអេស្តូនី កំពុងជួបប្រទះអតិផរណាខ្ពស់បំផុត នៅតំបន់ចាយប្រាក់អឺរ៉ូ ដោយអតិផរណាកើនឡើង ក្នុងអត្រា ៦,៤% ក្នុងខែកញ្ញា ឆ្នាំ ២០២១ បើធៀបនឹង ២៤,១% ក្នុងខែកញ្ញា ឆ្នាំ២០២២។
អតិផរណា នៅប្រទេសឡេតូនី និងលីទុយអានី ក៏ហក់ឡើងដល់ ២២% និង ២២,៥% ដែរ។ ចំណែកនៅហូឡង់វិញ ការកើនឡើងខ្លាំងបំផុតនៃថ្លៃមុខទំនិញប្រចាំខែ បានកើតឡើងក្នុងខែកញ្ញា ដែលមានចំនួន ១៧,១% កើនពី ១៣,៧% នៅក្នុងខែសីហា។
អតិផរណារបស់តំបន់ចាយប្រាក់អឺរ៉ូ បានកើនឡើងពី ៧,៤% នៅក្នុងខែមេសា ដោយសារប្រជាជនអឺរ៉ុប នៅតែប្រឈមទៅនឹងការកើនឡើងនៃតម្លៃថាមពល និងតម្លៃអាហារ ដែលបណ្តាលមកពីសង្គ្រាមឈ្លានពានរបស់រុស្ស៊ីលើអ៊ុយក្រែន។ គ្រប់ជ្រុងនៃទ្វីបអឺរ៉ុប ទាំងអស់ កំពុងប្រឈមមុខនឹងការឡើងថ្លៃមុខទំនិញដោយហេតុថា ការស្ទុះងើបឡើងវិញនៃសេដ្ឋកិច្ច ដែលអឺរ៉ុបរំពឹងទុកក្រោយការរីករាលដាលខ្លាំងនៃជំងឺរាតត្បាតកូវីដ ត្រូវបានរាំងស្ទះដោយកត្តាមួយចំនួន។
-តើអ្វីជាកត្តា ដែលនាំឱ្យអត្រាអតិផរណា នៅអឺរ៉ុប ឡើងខ្ពស់?
អឺរ៉ុប និងប្រទេសជាច្រើនទៀត នៅទូទាំងពិភពលោក បានរងការវាយប្រហាររួចហើយពីការកើនឡើងតម្លៃថាមពល ដែលជាចំណែកធ្វើឱ្យមានអតិផរណា នៅមុនពេលរុស្ស៊ីចូលឈ្លានពានអ៊ុយក្រែន នៅចុងខែកុម្ភៈ ទៅទៀត។ សង្គ្រាមនេះបានធ្វើឱ្យវិបត្តិថាមពលកាន់តែធ្ងន់ធ្ងរឡើងដោយជំរុញឱ្យមានការព្រួយបារម្ភជាសកលតែម្តងថា វាអាចនាំឱ្យមានការរំខានដល់ការផ្គត់ផ្គង់ប្រេង ឬឧស្ម័នធម្មជាតិពីប្រទេសរុស្ស៊ី។
កាលពីខែកញ្ញា ទីក្រុងម៉ូស្គូ បាននិយាយថា នឹងមិនដំណើរការឡើងវិញទាំងស្រុងនោះទេនូវការផ្គត់ផ្គង់ឧស្ម័នរបស់ខ្លួនទៅកាន់អឺរ៉ុប រហូតទាល់តែបណ្តាប្រទេសលោកខាងលិចដកចេញទណ្ឌកម្ម ដែលដាក់លើរុស្ស៊ីវិញ។ ប្រទេសរុស្ស៊ី ផ្គត់ផ្គង់ឧស្ម័នធម្មជាតិទៅឱ្យបណ្តាប្រទេសអឺរ៉ុបប្រមាណ ៤០% នៃតម្រូវការសរុប។
តម្លៃនៃទំនិញជាច្រើន រួមទាំងអាហារផងដែរ បានកើនឡើងមិនធ្លាប់មាន ចាប់តាំងពីវិធានការបិទខ្ទប់ប្រទេស ដើម្បីការពារជំងឺកូវីដ១៩ ត្រូវបានដាក់ចេញជាលើកដំបូង កាលពី ២ ឆ្នាំមុន។ វិធានការដ៏តឹងរ៉ឹងនេះ បានធ្វើឱ្យប៉ះពាល់ដល់ខ្សែចង្វាក់ផ្គត់ផ្គង់សកល និងបង្កឱ្យមានការភ័យស្លន់ស្លោ ក្នុងចំណោមប្រជាជន រហូតរត់ទៅទិញទំនិញ នៅតាមផ្សារទំនើប។
បន្ថែមលើនេះ សង្គ្រាមនៅអ៊ុយក្រែន បានធ្វើឱ្យស្ថានការណ៍ កាន់តែអាក្រក់ទៅៗ ដោយសារតែប្រទេសរុស្ស៊ី និងអ៊ុយក្រែន ជាអ្នកផលិតចំនួនជិត ៣៤% នៃស្រូវសាឡី និងស្រូវបាឡេរបស់ពិភពលោក។ ក្រៅពីនេះ ប្រទេសទាំង២ ក៏តំណាងឱ្យចំនួន ៦៦% នៃការនាំចេញប្រេងផ្កាឈូករ័ត្នរបស់ពិភពលោក ដែលគេប្រើប្រាស់ សម្រាប់ចម្អិនអាហារ ហើយអ៊ុយក្រែន ក៏ជាប្រទេសនាំចេញពោតធំជាងគេលំដាប់ទី៤ របស់ពិភពលោកផងដែរ៕
វីដេអូ៖
