មេដឹកនាំហុងកុងលោក John Lee បានលើកឡើងពីទំនាក់ទំនងរបស់ទីក្រុងជាមួយប្រទេសចិន នៅក្នុងសុន្ទរកថាទៅកាន់នាយកប្រតិបត្តិហិរញ្ញវត្ថុកំពូលមួយចំនួនរបស់ពិភពលោក ខណៈដែលលោកជំរុញឱ្យកសាងឡើងវិញនូវមុខមាត់ទីក្រុងហុងកុងដែលជាមជ្ឈមណ្ឌលហិរញ្ញវត្ថុអន្តរជាតិដ៏សំខាន់ឡើងវិញ។ ខណៈដែលសេដ្ឋកិច្ចទីក្រុងនេះត្រូវរាំងស្ទះ ព្រោះតែយុទ្ធនាការទប់ស្កាត់ដ៏តឹងរ៉ឹងប្រឆាំងជំងឺ COVID-19។
នាយកប្រតិបត្តិហុងកុង លោក Lee បានប្រាប់កិច្ចប្រជុំកំពូលវិនិយោគរបស់មេដឹកនាំហិរញ្ញវត្ថុសកលរបស់អាជ្ញាធររូបិយវត្ថុហុងកុងនៅថ្ងៃពុធថា ហុងកុងនឹងបន្តធ្វើការឆ្ពោះទៅរកការដកហូតបម្រាម ស្ដីពីការរឹតបន្តឹងវិធានការប្រឆាំងជំងឺកូវីដ ១៩។
មហាសេដ្ឋីធនាគារធំៗមួយចំនួនរបស់ពិភពលោក រួមទាំងលោក David Solomon របស់ Goldman Sachs និង James Gorman របស់ Morgan Stanleyក៏ស្ថិតនៅក្នុងទីក្រុងហុងកុងជាលើកដំបូងដែរ ក្នុងរយៈពេលជិត ៣ ឆ្នាំចុងក្រោយនេះ។
លោក Lee បាននិយាយថា៖ «ហុងកុងនៅក្នុងទីក្រុងតែ ១ និងនៅតែជាកន្លែងតែ ១ គត់នៅក្នុងពិភពលោកដែលផលប្រយោជន៍សកលនិងអត្ថប្រយោជន៍របស់ចិននៅជាមួយគ្នា»។
លោក Lee បានបន្ថែមថា៖ «ការរួបរួមគ្នាតែ ១ គត់នេះធ្វើឱ្យហុងកុងមានទំនាក់ទំនងដែលមិនអាចជំនួសបានរវាងដីគោក និងពិភពលោកទាំងមូល»។
គាត់ក៏បាននិយាយផងដែរថាហុងកុងកំពុងធ្វើការដើម្បីទាក់ទាញអ្នកដែលមានទេពកោសល្យកំពូលៗ ជុំវិញពិភពលោក ដើម្បីដោះស្រាយបញ្ហានានាឈានទៅរកការអភិវឌ្ឍថ្មី ខណៈដែលអ្នកជំនាញៗជាច្រើននាក់នោះបានចាកចេញពីហុងកុងក្នុងរយៈពេល ៣ ឆ្នាំចុងក្រោយ ព្រោះតែវិធានការដ៏តឹងរ៉ឹងប្រឆាំងជំងឺកូវីដ ១៩ ក្នុងរយៈពេល ៣ ឆ្នាំចុងក្រោយ។
លោកបន្ថែមថា៖ «ដូចទីក្រុងធំៗជាច្រើនផ្សេងទៀតនៅទូទាំងពិភពលោក ហុងកុងបានឆ្លងកាត់សម័យកាលរុងរឿងនិងធ្លាក់ចុះ ក្នុងប៉ុន្មានឆ្នាំមកនេះ ប៉ុន្តែហុងកុងនៅតែមានជំហររឹងមាំ»។
នៅក្នុងសម័យប្រជុំទី១ នៃកិច្ចប្រជុំនេះ អនុប្រធានគណៈកម្មការនិយតកម្មមូលបត្រចិន (CSRC) បាននិយាយថា ហុងកុងគឺជាមជ្ឈមណ្ឌលហិរញ្ញវត្ថុ "មានសារៈសំខាន់ខ្លាំងណាស់" សម្រាប់ប្រទេសចិន។លោកថា អាជ្ញាធរមានបំណងចង់ឱ្យក្រុមហ៊ុនអន្តរជាតិជាច្រើនចុះបញ្ជីក្នុងទីក្រុងហុងកុង ដើម្បីពង្រីកសកម្មភាពទីផ្សារមូលធនរបស់ទីក្រុង។
ភាគហ៊ុនហុងកុងមានតម្លៃ ១០,៨ ពាន់លានដុល្លារគិតត្រឹមខែដើមខែវិច្ឆកា ក្នុងឆ្នាំ ២០២២ ដែលជាកម្រិតទាបបំផុតចាប់តាំងពីឆ្នាំ ២០១៧ មក។ ខណៈដែលឆ្នាំមុខតម្លៃភាគហ៊ុនមានតម្លៃ ៣៧,៧ ពាន់លានដុល្លារអាមេរិក។
វិនិយោគិនសកលកំពុងប្រឈមមុខនឹងបញ្ហាប្រឈមជាច្រើននៅឆ្នាំនេះរួមមានសង្រ្គាមអ៊ុយក្រែនការកើនឡើងអតិផរណា ការកើនឡើងតម្លៃថាមពលនិងការរឹតបន្តឹងអត្រាការប្រាក់ ដែលជាសញ្ញាបង្ហាញពីស្ថានភាពសេដ្ឋកិច្ចដែលមានហានិភ័យខ្ពស់។
នាយកប្រតិបត្តិនៃក្រុមហ៊ុន Goldman Sachs លោក Solomon បានប្រាប់និយាយថា វាអាចចំណាយពេលដល់ទៅ ៦ ត្រីមាសសម្រាប់ពិភពលោកដើម្បី "ធ្វើឱ្យមានតុល្យភាពឡើងវិញ" ។ លោកបានបន្តថា៖ «នៅតែមានភាពមិនប្រាកដប្រជាមួយចំនួនដែលយើងឈានដល់ឆ្នាំ ២០២៣»។ លោបន្តថា ៖«យើងនឹងចាប់ផ្តើមយល់កាន់តែច្បាស់អំពីគន្លងនៃទីផ្សារមូលធន.. ខ្ញុំរំពឹងថា សេដ្ឋកិច្ចអាចមានលំនឹងនៅក្នុងត្រីមាសខាងមុខនេះ»៕