ផ្ទាំងទឹកកកយ៉ាងហោចណាស់ ១/៣ នៃតំបន់បេតិកភណ្ឌពិភពលោក Yosemite ដែលជាឧទ្យានជាតិរបស់សហរដ្ឋអាមេរិកដែរនោះ នឹងចាប់ផ្ដើមរលាយបាត់នៅពាក់កណ្ដាលសតវត្សរ៍នេះ បើទោះបីជាការបំភាយឧស្ម័នផ្ទះកញ្ចក់ត្រូវបានទប់ស្កាត់ក្ដី។ នេះបើតាមការរកឃើញក្នុងរបាយការណ៍របស់អង្គការយូណេស្កូ (UNESCO) ចេញផ្សាយនៅថ្ងៃព្រហស្បតិ៍ ទី ៣ ខែវិច្ឆិកា។
របាយការណ៍ដដែលបញ្ជាក់ថា ផ្ទាំងទឹកកកទាំងអស់នៅឧទ្យាន Yosemite ក៏ដូចជាឧទ្យានជាតិ Yellowstone ព្រមទាំងផ្ទាំងទឹកកកមួយចំនួនដែលនៅសល់ក្នុងទ្វីបអាហ្វ្រិកនឹងត្រូវរលាយបាត់ ដោយចៀសមិនរួចបើទោះបីជាការឡើងកម្ដៅនៃភពផែនដីមានត្រឹមតែ ១,៥ អង្សាក៏ដោយ។
អង្គការយូណេស្កូដែលមានមូលដ្ឋាននៅទីក្រុងប៉ារីស បានព្រមាននៅក្នុងរបាយការណ៍របស់ខ្លួនថាពិភពលោកអាចរក្សាផ្ទាំងទឹកកកទុកបានដរាបណាការបញ្ចេញឧស្ម័នផ្ទះកញ្ចក់ត្រូវបានកាត់បន្ថយយ៉ាងខ្លាំង។
លោក Audrey Azoulay អគ្គនាយកអង្គការយូណេស្កូថ្លែងតាមរយៈសេចក្តីថ្លែងការណ៍មួយថា៖ «របាយការណ៍នេះគឺជាការអំពាវនាវឱ្យចាត់វិធានការបន្ទាន់ចំពោះបញ្ហាឡើងកម្ដៅនៃភពផែនដី» និងថា សន្និសីទស្ដីពីការប្រែប្រួលអាកាសធាតុរបស់អង្គការសហប្រជាជាតិ COP27 ដែលត្រូវបើកធ្វើនៅក្នុងប្រទេសអេហ្ស៊ីប នាសប្ដាហ៍ក្រោយ មានតួនាទីសំខាន់ណាស់ក្នុងការជួយស្វែងរកដំណោះស្រាយចំពោះបញ្ហានេះ។
សូមជម្រាបជូនថា នៅក្នុងចំណោមតំបន់បេតិកភណ្ឌពិភពលោកចំនួន ១ ១៥០ ក្នុងបញ្ជីរបស់អង្គការយូណេស្កូមានតំបន់ចំនួនជាង ៥០ កន្លែង ជាទីតាំងដែលគ្របដណ្ដប់ដោយផ្ទាំងទឹកកកដែលស្មើនឹង ១/១០ នៃតំបន់ទឹកកកសរុបរបស់ពិភពលោក។ បើតាមអង្គការយូណេស្កូផ្ទាំងទឹកកកជិត ១៩ ០០០ ដែលមានទីតាំងនៅតំបន់បេតិកភណ្ឌទាំងនេះ កំពុងបាត់បង់ទឹកកកច្រើនជាង ៦០ ពាន់លានតោនក្នុង ១ ឆ្នាំ ដែលស្មើនឹងការប្រើប្រាស់ទឹកប្រចាំឆ្នាំរបស់ប្រទេសអេស្ប៉ាញ និងបារាំងរួមបញ្ចូលគ្នាហើយមានចំនួនប្រហែល ៥ ភាគរយ នៃការកើនឡើងនៃកម្រិតទឹកសមុទ្រពិភពលោក។
របាយការណ៍របស់អង្គការពិភពលោកនេះបញ្ជាក់បន្ថែមថា ផ្ទាំងទឹកកកតូចៗនៅរយៈកម្ពស់ទាប ឬមធ្យមនឹងរលាយបាត់មុនគេហើយអត្រានៃការបាត់បង់ទឹកកកនៅក្នុងតំបន់ទឹកកកតូចៗនេះបានកើនឡើងទ្វេដងចាប់ពីដើមទសវត្សរ៍ឆ្នាំ ២០០០ ដល់ចុងទសវត្សរ៍ឆ្នាំ ២០១០៕