នៅក្នុងរយៈពេល ២៣ ឆ្នាំកន្លងមកនេះ សត្វខ្លាធំ និងបំណែកសាកសពសត្វខ្លាធំជាមធ្យមចំនួន ១៥០ ក្បាល ត្រូវបានរឹបអូសជារៀងរាល់ឆ្នាំនៅទូទាំងសកលលោក។ ការណ៍នេះបង្កក្ដីព្រួយបារម្ភ និងជាបញ្ហាប្រឈមដ៏ធំមួយសម្រាប់សត្វខ្លាធំដែលជាសត្វដ៏កម្រជិតផុតពូជពីលើភពផែនដី បើទោះជាមានការខិតខំប្រឹងប្រែងអភិរក្សយ៉ាងណាក្ដី។ នេះបើតាមរបាយការណ៍ចេញផ្សាយដោយអង្គការឃ្លាំមើលការជួញដូរសត្វព្រៃ TRAFFIC កាលពីថ្ងៃពុធ ទី ២ ខែវិច្ឆិកា ឆ្នាំ ២០២២។
អង្គការ TRAFFIC បានឱ្យដឹងនៅក្នុងរបាយការណ៍របស់ខ្លួនថា សត្វខ្លារស់សាកសពសត្វខ្លាទាំងមូលក៏ដូចជាផ្នែកផ្សេងៗនៃសត្វខ្លាដែលត្រូវគេសម្លាប់ចំនួន ៣ ៣៧៧ ក្បាល ត្រូវអាជ្ញាធរមានសមត្ថកិច្ចរឹបអូសបានក្នុងចន្លោះខែមករា ឆ្នាំ ២០០០ និងខែមិថុនា ឆ្នាំ ២០២២។ ការរឹបអូសបានធ្វើឡើងនៅក្នុងប្រទេស និងដែនដីចំនួន ៥០ ប៉ុន្តែភាគច្រើនគឺនៅក្នុងប្រទេសចំនួន ១៣ ដែលមានវត្តមានសត្វខ្លាធំនៅក្នុងព្រៃធម្មជាតិ។
ប្រទេសឥណ្ឌា ដែលជាជម្រករបស់សត្វខ្លាព្រៃជាងពាក់កណ្តាលដែលនៅសេសសល់នៅលើពិភពលោកបង្ក្រាបករណីជួញដូរសត្វព្រៃបានច្រើនបំផុតតាមពីក្រោយដោយប្រទេសចិន និងប្រទេសឥណ្ឌូនេស៊ី។ ប៉ុន្តែបើតាមអង្គការ TRAFFIC តួលេខពិតប្រាកដនៃបទឧក្រិដ្ឋជួញដូរសត្វខ្លាព្រៃដោយខុសច្បាប់ទំនងជាមានចំនួនច្រើនជាងនេះឆ្ងាយណាស់។
បើតាមរបាយការណ៍របស់អង្គការឃ្លាំមើលការជួញដូរសត្វព្រៃដដែលក្នុងឆមាសទី១ នៃឆ្នាំ ២០២២ នេះ ករណីបង្ក្រាបការជួញដូរសត្វខ្លាធំបានកើនឡើងនៅប្រទេសឥណ្ឌូនេស៊ីថៃ និងរុស្ស៊ី ដែលនេះឆ្លុះបញ្ចាំងឱ្យឃើញថា ការជួញដូរក៏មានការកើនឡើងដូចគ្នាដែរ។ ឥណ្ឌូនេស៊ីជាជម្រករបស់សត្វខ្លាស៊ូម៉ាត្រាដែលកំពុងប្រឈមនឹងការជិតផុតពូជរឹបអូសបានសត្វខ្លាចំនួន ១៨ ក្បាលនៅក្នុងឆមាសទី១ នៃឆ្នាំ ២០២២ កើនឡើងលើសឆ្នាំ ២០២១ ដែលមានចំនួនតែ ១៦ ក្បាលប៉ុណ្ណោះ។
របាយការណ៍ចេញផ្សាយដោយអង្គការ TRAFFIC លើកឡើងថា៖ «ការបរបាញ់និងការជួញដូរខុសច្បាប់នៅតែជាការគំរាមកំហែងដ៏គ្រោះថ្នាក់ដល់ការរស់រានមានជីវិតរបស់សត្វខ្លាព្រៃ» ហើយថា៖ «កិច្ចខិតខំប្រឹងប្រែងការវិនិយោគនិងការសន្យាជាច្រើនទសវត្សរ៍មិនបានបន្ធូរបន្ថយករណីជួញដូរសត្វខ្លាព្រៃទេ»។
ចំនួនសត្វខ្លាធំនៅក្នុងព្រៃធម្មជាតិត្រូវបានគេប៉ាន់ប្រមាណថាមានចំនួនយ៉ាងហោចណាស់ ១០០ ០០០ ក្នុងឆ្នាំ ១៩០០។ប៉ុន្តែការបរបាញ់ការប្រម៉ាញ់ និងការបំផ្លាញព្រៃឈើដែលជាជម្រករបស់សត្វខ្លាបានធ្វើឱ្យចំនួនសត្វខ្លាធំថមថយយ៉ាងខ្លាំងហើយមានវត្តមានតែនៅក្នុងប្រទេសមួយចំនួននៅអាស៊ីខាងត្បូង និងអាស៊ីអាគ្នេយ៍និងនៅភាគខាងកើតរបស់រុស្ស៊ី។ តម្រូវការសត្វខ្លាធំនៅលើទីផ្សារដែលជំរុញឱ្យមានការប្រមាញ់ខុសច្បាប់ជំរុញដោយអតិថិជនភាគច្រើននៅក្នុងប្រទេសចិន និងតំបន់ផ្សេងទៀតនៃអាស៊ីដែលជឿថា ការប្រើប្រាស់ផ្នែកខ្លះរបស់សត្វខ្លានឹងអាចជួយព្យាបាលជំងឺជាច្រើនមុខឬអាចជួយឱ្យពួកគេមានសុខភាពរឹងមាំ និងមានអំណាចដូចសត្វខ្លាដូច្នោះដែរ៕