មេបញ្ជាការផ្នែកយុទ្ធសាស្ត្ររបស់អាមេរិកលោកនាយឧត្តមនាវី ឆាលស៍ រីឆាដ។ រូបថត Youtube
មេបញ្ជាការផ្នែកយុទ្ធសាស្ត្ររបស់អាមេរិកលោកនាយឧត្តមនាវី ឆាលស៍ រីឆាដ (Charles A. Richard) បានព្រមានថា ប្រទេសចិនកំពុងអភិវឌ្ឍអាវុធនុយក្លេអ៊ែរលឿនជាងអាមេរិក និងបានហៅវាថាជាបញ្ហាដែលត្រូវឆាប់ដោះស្រាយ។ លោក រីឆាដ បានលើកឡើងបែបនេះក្នុងអំឡុងពេលថ្លែងសុន្ទរកថានៅឯព្រឹត្តិការណ៍មួយកាលពីសប្តាហ៍មុន។
មន្ត្រីមន្ទីរបញ្ចកោណ បាននិងកំពុងប្រកាសអាសន្នពីការកសាងនិងអភិវឌ្ឍអាវុធនុយក្លេអ៊ែររបស់ចិនអស់រយៈពេលជាច្រើនឆ្នាំមកហើយ។ ក៏ប៉ុន្តែ ការអត្ថាធិប្បាយរបស់លោកនាយឧត្តមនាវីអាមេរិក រីឆាដ បានរំលេចថាបញ្ហានេះកាន់តែធ្ងន់ធ្ងរនិងបន្ទាន់ជាងមុន។
«នៅពេលខ្ញុំវាយតម្លៃកម្រិតនៃការទប់ទល់របស់យើងប្រឆាំងនឹងចិន កប៉ាល់កំពុងលិចបន្តិចម្តងៗ។ វាកំពុងលិច ដោយហេតុថា ចិនកំពុងពង្រឹងសមត្ថភាពក្នុងវិស័យនេះលឿនជាងយើង»។ នេះគឺជាការលើកឡើងរបស់លោក រីឆាដ។
បន្ថែមលើនេះ លោកនាយឧត្តមនាវីអាមេរិក បានហៅការអភិវឌ្ឍកម្មវិធីអាវុធនុយក្លេអ៊ែររបស់ចិនថាជាបញ្ហាដែលត្រូវតែឆាប់ដោះស្រាយ។
គួរជ្រាបថា ប្រមុខយោធានុយក្លេអ៊ែរអាមេរិក បានធ្វើការព្រមានអំពីល្បឿននៃកម្មវិធីអាវុធនុយក្លេអ៊ែររបស់ចិន ក្នុងអំឡុងពេលថ្លែងសុន្ទរកថានៅឯសន្និសីទប្រចាំឆ្នាំរបស់របស់កងទ័ពជើងទឹកកាលពីថ្ងៃពុធសប្តាហ៍មុន។ នេះជាព្រឹត្តិការណ៍សម្ងាត់មួយ ប៉ុន្តែការអត្ថាធិប្បាយរបស់លោក រីឆាដ ត្រូវបានគេយកទៅចុះផ្សាយនៅក្នុងអត្ថបទព័ត៌មានរបស់ក្រសួងការពារជាតិកាលពីថ្ងៃសុក្រ។
រដ្ឋបាលរបស់លោក ចូ បៃដិន បានហៅចិនថាជាដៃគូប្រកួតប្រជែងដ៏សំខាន់របស់សហរដ្ឋអាមេរិក និងបានព្រមានអំពីការអភិវឌ្ឍកម្មវិធីយោធា និងអាវុធនុយក្លេអ៊ែររបស់ចិននៅក្នុងឯកសារគោលនយោបាយជាបន្តបន្ទាប់។ ឯកសារគោលនយោបាយដែលត្រូវបានចេញផ្សាយកាលពីចុងខែតុលានេះ ពន្យល់ពីយុទ្ធសាស្ត្រផ្នែកការពារជាតិ និងយោធារបស់អាមេរិក។
ដោយឡែក មន្ត្រីការពារជាតិជាន់ខ្ពស់អាមេរិកមួយរូបទៀត បាននិយាយអំពីយុទ្ធសាស្ត្រនេះថា ប្រទេសចិនគឺជាបញ្ហាដែលសហរដ្ឋអាមេរិកត្រូវដោះស្រាយ ពីព្រោះចិនគឺគូប្រជែងតែមួយគត់ដែលមានទាំងចេតនា និងសមត្ថភាពកាន់តែខ្លាំងឡើងក្នុងការប្រកួតប្រជែងជាមួយអាមេរិកមិនថាលើផ្នែកយោធា សេដ្ឋកិច្ច បច្ចេកវិទ្យា ឬផ្នែកការទូតឡើយ។
ឯកសារគោលនយោបាយមួយរបស់អាមេរិក បានលើកឡើងអំពីកម្មវិធីអាវុធនុយក្លេអ៊ែររបស់ចិនថា ប្រទេសចិន ទំនងជាមានគោលដៅផលិតក្បាលគ្រាប់នុយក្លេអ៊ែរឱ្យបានយ៉ាងហោចណាស់ ១ ០០០ គ្រាប់នៅចុងទសវត្សរ៍នេះ។
ប្រមុខយោធានុយក្លេអ៊ែរអាមេរិកលោក រីឆាដ ធ្លាប់បានព្រមានហើយដែរអំពីការអភិវឌ្ឍនុយក្លេអ៊ែររបស់ចិនក្នុងឆ្នាំ ២០២១ ដោយហៅកម្មវិធីរបស់ចិននេះថាជាការបំបែកយុទ្ធសាស្ត្រមួយ៕
