អ្នកនាំពាក្យរដ្ឋាភិបាលថៃ លោក អានុឆា ប៊ូរ៉ាប៉ាឆៃស្រី (Anucha Burapachaisri)។ ហ្វេសប៊ុក
នៅក្នុងប្រទេសថៃមន្ត្រីរដ្ឋាភិបាលម្នាក់ បាននិយាយនៅថ្ងៃអង្គារ ទី៨ វិច្ឆិកាថា រដ្ឋអំណាច កំពុងដកចេញនូវគោលនយោបាយដែលអនុញ្ញាតឱ្យជនបរទេសអាចមានសិទ្ធិកាន់កាប់ដីធ្លីនៅក្នុងទឹកដីថៃបាន។ ការប្រកាសខាងលើ ធ្វើឡើងបន្ទាប់ពីមានប្រតិកម្មប្រឆាំងនឹងផែនការនេះពីសាធារណជន។
កាលពីប៉ុន្មានខែមុន រដ្ឋាភិបាលថៃ បានប្រកាសពីគម្រោងផែនការដែលមានបំណងទាក់ទាញការវិនិយោគពីបរ ទេស ដោយកំណត់ឱ្យជនបរទេសអាចមានសិទ្ធិទិញផ្ទៃដីក្នុងទំហំ ០,១៦ ហិកតា ប្រសិនបើពួកគេ វិនិយោគក្នុងទឹកប្រាក់យ៉ាងតិចចំនួន ៤០លានបាត (១,០៧ លានដុល្លារអាមេរិក) ជាមូលបត្រ ឬ មូលបត្របំណុលយ៉ាងហោចណាស់រយៈពេល ៣ឆ្នាំ។
ផែនការនេះ ទទួលបានប្រតិកម្មប្រឆាំងជាច្រើនពីមតិសាធារណជនថៃ។ ក្រុមអ្នករិះគន់ បានលើកឡើងថា ផលចំណេញដែលបានមកពីផែនការនេះគឺតិចតួច និងថាគោលនយោបាយនេះអាចរុញ ច្រានឱ្យតម្លៃអចលនទ្រព្យកើនឡើង ពោលគឺធ្វើឱ្យបាត់បង់ភាពជាម្ចាស់កម្មសិទ្ធិក្នុងស្រុក។
អ្នកនាំពាក្យរដ្ឋាភិបាលថៃ លោក អានុឆា ប៊ូរ៉ាប៉ាឆៃស្រី (Anucha Burapachaisri) បាននិយាយនៅឯសន្និសីទសារព័ត៌មានមួយថា៖ «ក្រសួងមហាផ្ទៃ បានដកសំណើ…ស្តាប់មតិយោបល់ ពីគ្រប់ភាគីទាំងអស់ដើម្បីឱ្យផែនការនេះ មានភាពគ្រប់ជ្រុងជ្រោយ»។
ចំណែករដ្ឋមន្ត្រីក្រសួងមហាផ្ទៃថៃ លោក អានុពុងប៉ាវឈីនដា (Anupong Paochinda) បានហៅរឿងនេះថា បញ្ហារស៊ើបខ្លាំងនិងត្រូវដោះស្រាយយ៉ាងប្រុងប្រយ័ត្ន និងបាននិយាយទៀតថា ការសិក្សាមួយ គឺចាំបាច់ត្រូវធ្វើដើម្បីថ្លឹងថ្លែងពីគុណសម្បត្តិ និងគុណវិបត្តិ។
គួរជ្រាបថា រដ្ឋាភិបាលថៃ បានខិតខំប្រឹងប្រែងយ៉ាងខ្លាំងក្នុងការទាក់ទាញការវិនិយោគពីបរទេសដើម្បីជំរុញសេដ្ឋ កិច្ចរួមមានទាំងគម្រោងទិដ្ឋាការរយៈពេលវែង និងការបន្ធូរបន្ថយពន្ធលើប្រាក់ចំណូលសម្រាប់ជនបរទេសដែលមានសក្តានុពលខ្ពស់អ្នកចូលនិវត្តន៍ដែលសម្បូរទ្រព្យ និងអ្នកដែលមានជំនាញ។
ជាប្រទេសមានសេដ្ឋកិច្ចធំលំដាប់ទី២របស់អាស៊ីអាគ្នេយ៍ ថៃត្រូវបានរំពឹងថា នឹងមានកំណើនសេដ្ឋកិច្ច ៣,៣% នៅឆ្នាំ២០២២ ហើយអស់រយៈពេលជាច្រើនទសវត្សរ៍មកហើយដែលថៃបានក្លាយជាគោលដៅដ៏ពេញនិយមបំផុតមួយនៅអាស៊ីសម្រាប់ជនបរទេសអាជីវកម្ម និងអ្នកចូលនិវត្តន៍មកពីបណ្តាប្រទេសលោកខាងលិច៕
