.jpg)
ផែនទីប្រទេសនេប៉ាល់ កំណត់ទីតាំងរញ្ជួយដីកម្រិត ៥,៦ រុិចទ័រ ដែលបានវាយប្រហារ នៅព្រឹកព្រលឹមថ្ងៃ ពុធ។ AFP
គ្រោះរញ្ជួយដីកម្រិត ៥,៦រ៉ិចទ័រ បានវាយប្រហារភាគខាងលិចប្រទេសនេប៉ាល់ នៅព្រឹកព្រលឹមថ្ងៃពុធ ទី៩ ខែវិច្ឆិកានេះ បណ្ដាលឱ្យមនុស្សយ៉ាងហោចណាស់៦នាក់ ស្លាប់បាត់បង់ជីវិត។ នេះបើតាមតួលេខផ្លូវការបឋមផ្ដល់ឱ្យអាជ្ញាធរនៅក្នុងតំបន់កើតហេតុ។
ក្រុមអ្នកជំនាញខាងភូគព្ភសាស្រ្តអាមេរិក(United States Geological Survey) បានឱ្យដឹងថា ចំណុចកណ្ដាលនៃការរញ្ជួយដី គឺស្ថិតនៅតំបន់ Seti មានជម្រៅ ១៥,៧គីឡូម៉ែត្រទៅក្រោមដី និងមានចម្ងាយ ២១គីឡូម៉ែត្រ ភាគខាងកើតនៃទីក្រុង Dipayalរបស់នេប៉ាល់។
ស្នងការរងប៉ូលិសនេប៉ាល់ លោក Bhola Bhatta បានគូសបញ្ជាក់ប្រាប់សារព័ត៌មាន CNN ថា មានមនុស្សយ៉ាងហោចណាស់៦នាក់ បានស្លាប់បាត់បង់ជីវិត ដោយសារតែគ្រោះរញ្ជួយដីនេះ និង៥នាក់ផ្សេងទៀតរងរបួស នៅទីក្រុង Pur bichukiនៃស្រុក Doti។ លោកបន្តថា៖ «ការរញ្ជួយដីនេះ បានបំផ្លិចបំផ្លាញទាំងស្រុងនូវផ្ទះចំនួន៣ខ្នង ព្រមទាំងហេដ្ឋារចនាសម្ព័ន្ធសំខាន់ៗមួយចំនួនទៀត និងថា ឥឡូវនេះ ក្រុមប្រតិបត្តិការរុករកកំពុងតែបន្តការងាររបស់ខ្លួនក្នុងការជួយសង្គ្រោះប្រជាជននៅតំបន់រងគ្រោះ»។
ចំណែកនាយករដ្ឋមន្ដ្រីនេប៉ាល់ លោក Sher Bahadur Deuba បានសរសេរសាររំលែកទុក្ខនៅលើបណ្ដាញសង្គម Twitter របស់លោក ចំពោះក្រុមគ្រួសារនៃជនរងគ្រោះដែលស្លាប់ដោយសារតែគ្រោះធម្មជាតិនេះ។ តាមរយៈសារដដែលនោះ លោកបានគូសបញ្ជាក់អំពីការដាក់ចេញនូវបទបញ្ជាដល់ភ្នាក់ងារពាក់ព័ន្ធ ឱ្យរៀបចំការសង្គ្រោះព្យាបាលបន្ទាន់ភ្លាមៗសម្រាប់អ្នករងរបួស និងខិតខំប្រឹងប្រែងជួយឱ្យអស់ពីលទ្ធភាពនៅតំបន់ដែលរងផលប៉ះពាល់។
បើតាមលោកនា យករដ្ឋមន្ដ្រីនេប៉ាល់អាជ្ញាធរ មិនរំពឹងថា នឹងមានអ្នកស្លាប់ និងរបួសច្រើននោះទេ ដោយសារតែចំណុចកណ្តាលនៃការរញ្ជួយដីនេះ កើតឡើង នៅត្រង់តំបន់ដែលមានប្រជាជនតិច។
ជាការកត់សម្គាល់ គ្រោះរញ្ជួយដីនៅនេប៉ាល់នេះ បានជះឥទ្ធិពលទៅដល់ទីក្រុងញូវដេលីរបស់ប្រទេសឥណ្ឌា។ ទីក្រុងញូវ ដេលីរបស់ឥណ្ឌាដែលបានរាយការណ៍អំពីការញ័ររញ្ជួយដែលមានរយៈពេលប្រហែល ១០វិនាទី។
សូមរំឭកថាកាលពីឆ្នាំ២០១៥គ្រោះរញ្ជួយដីកម្រិត៧,៨ រ៉ិចទ័រ បានអង្រួនប្រទេសនេប៉ាល់ដោយបានសម្លាប់មនុស្សជិត៩ ០០០នាក់ និងបានបំផ្លិចបំផ្លាញផ្ទះនិងអគារជាច្រើនកន្លែង៕
