.jpg)
ការធ្វើតេស្តហោះហើរ Artemis I របស់ NASA គឺជាការធ្វើតេស្តរួមបញ្ចូលគ្នាលើកដំបូងនៃប្រព័ន្ធរុករកអវ កាសរៅរបស់ទីភ្នាក់ងារនេះ។ AFP
នៅរដ្ឋហ្លរីដា ការបាញ់បង្ហោះរ៉ុក្កែត នៅក្នុងបេសកកម្ម Artemis-I ដែលទីភ្នាក់ងារអវកាសអាមេរិក NASA គ្រោងធ្វើឡើងនៅថ្ងៃទី ១៤ ខែវិច្ឆិកា ត្រូវលើកពេលទៅធ្វើនៅថ្ងៃទី ១៦ ខែវិច្ឆិកាវិញ។ នេះគឺលើកទី២ ហើយ ដែលទីភ្នាក់ងារអវកាស NASA សម្រេចចិត្តពន្យារពេលការបាញ់បង្ហោះរ៉ុក្កែតដែលធ្វើឡើងក្នុងគម្រោងបេសកកម្ម Artemis-I។
កាលពីខែកញ្ញាកន្លងទៅ បេសកកម្ម Artemis-I ត្រូវបានលើកពេលម្ដងដោយសារតែបញ្ហាធាតុអាកាស ដែលកាលណោះ រដ្ឋហ្វ្លរីដារងការវាយប្រហារដោយខ្យល់ព្យុះ Ian។ ចំណែកគម្រោងបាញ់បង្ហោះនៅថ្ងៃទី ១៤ វិច្ឆិកានេះ ត្រូវលើកពេលម្ដងទៀត ដោយសារតែខ្យល់ព្យុះសង្ឃរា Nicole ដែលត្រូវគេព្យាករថា នឹងធ្វើដំណើរបោកបក់ដល់រដ្ឋហ្វ្លរីដា នៅវេលាយប់ថ្ងៃពុធ ទី ៩ ឬព្រឹកថ្ងៃព្រហស្បតិ៍ ទី ១០ ខែវិច្ឆិកា ម៉ោងនៅរដ្ឋហ្វ្លរីដា សហរដ្ឋអាមេរិក។ បើតាមការព្យាករណ៍ ខ្យល់ព្យុះ Nicole ស្ថិតនៅក្នុងកម្រិតទី១ ដោយមានកម្លាំងខ្យល់បោកបក់ជាង ១០០ គីឡូម៉ែត្រនៅ ក្នុង ១ ម៉ោង។
សូមជម្រាបថា Artemis-I គឺជាបេសកកម្មទី១ នៃគម្រោងអារតេមីសរបស់ណាសា ដើម្បីបញ្ជូនមនុស្សទៅកាន់ព្រះចន្ទ ក្នុងគោលដៅបោះទីតាំងអចិន្រ្តៃយ៍។ ជាការបោះទីតាំងនៅលើផ្ទៃព្រះចន្ទដើម្បីធ្វើជាមូលដ្ឋាន សម្រាប់បេសកកម្ម បញ្ជូនមនុស្សទៅកាន់ភពអង្គារ។ បេសកកម្មArtemis-Iនេះ នឹងមិនមានដឹកអវកាសយានិកនោះទេ ដោយមានតែតួយានទទេតែប៉ុណ្ណោះ ដើម្បីជាការសាកល្បងបច្ចេកវិទ្យារ៉ុក្កែត និងយានអវកាសថ្មី មុននឹងឈានទៅដឹកអវកាសយានិក។
គួរបញ្ជាក់ជូនថា ប្រសិនបើបេសកកម្ម Artemis-I ទទួលបានជោគជ័យ ទីភ្នាក់ងារអវកាស NASA នឹងបន្តបេសក កម្មក្នុងគម្រោង Artemis បន្តទៀត។ ក្នុងនោះ បេសកកម្មទី២ Artemis-II នៅក្នុងអំឡុងឆ្នាំ ២០២៤ ដោយនៅក្នុងដំណាក់កាលទី២ នេះអារតេមីសនឹងមិនធ្វើដំណើរទៅដោយទទេនោះទេ ដោយនៅក្នុងយាន Orion នឹងមានដឹកអវកាសយានិកចំនួន ៤ រូប។ គោលដៅ គឺធ្វើដំណើរទៅហោះកាត់មួយជុំព្រះចន្ទ រួចហើយត្រឡប់មកផែនដីវិញ តែមិនចុះចតលើដីព្រះចន្ទ គឺទាល់តែដល់បេសកកម្មទី៣ Artemis-III ទើបទីភ្នាក់ងារអវកាស NASA បញ្ជូនអវកាស យានិកឱ្យទៅចុះចតដោយផ្ទាល់លើដីព្រះចន្ទ ដើម្បីបើកផ្លូវឆ្ពោះទៅការបង្កើតមូលដ្ឋានអចិន្ត្រៃយ៍ ទុកប្រើសម្រាប់ការធ្វើដំណើរទៅកាន់ភពអង្គារ៕
