.jpg)
លោក បៃដិន (កណ្ដាល) ជួបជាមួយប្រធានាធិបតីកូរ៉េខាងត្បូង លោក Yoon Suk-Yeol (ឆ្វេង) និងនាយករដ្ឋមន្ត្រីជប៉ុន Fumio Kishida (ស្ដាំ) ក្នុងទីក្រុងម៉ា្រឌីដ កាលពីថ្ងៃទី ២៩ ខែមិថុនា ឆ្នាំ ២០២២។ AFP
ប្រធានាធិបតីអាមេរិក លោក ចូ បៃដិន នឹងជួបជាមួយនាយករដ្ឋមន្ដ្រីជប៉ុន ព្រមទាំងប្រធានាធិបតីកូរ៉េខាងត្បូង ដើម្បីពិភាក្សាអំពីវិធីទប់ស្កាត់កម្មវិធីនុយក្លែអ៊ែររបស់កូរ៉េខាងជើង។ ជំនួបរវាងមេដឹកនាំប្រទេសសម្ព័ន្ធមិត្តទាំង ៣ នេះ នឹងត្រូវរៀបចំធ្វើឡើង ក្នុងអំឡុងពេលដែលលោក ចូ បៃដិន ធ្វើដំណើរមកកាន់តំបន់អាស៊ី ដើម្បីចូលរួមកិច្ចប្រជុំសំខាន់ៗមួយចំនួនដូចជា កិច្ចប្រជុំកំពូលអាស៊ាន នៅកម្ពុជា និងកិច្ចប្រជុំកំពូល G20 នៅកោះបាលី ប្រទេសឥណ្ឌូនេស៊ី។ នេះបើតាមសេចក្ដីប្រកាសព័ត៌មានរបស់សេតវិមានអាមេរិក កាលពីថ្ងៃពុធ ទី ៩ ខែវិច្ឆិកា ឆ្នាំ២០២២។
បើតាមការឱ្យដឹងពីប្រភពសេតវិមានដដែល មេដឹកនាំអាមេរិក ជប៉ុន និងកូរ៉េខាងត្បូង នឹងជួបគ្នា នៅថ្ងៃអាទិត្យ ទី ១៣ ខែវិច្ឆិកា។ ចំណែកកិច្ចពិភាក្សានឹងផ្ដោតសំខាន់ទៅលើការបន្តពង្រឹងកិច្ចសហប្រតិបត្តិការត្រីភាគី នៅក្នុងតំបន់ឥណ្ឌូ-ប៉ាស៊ីហ្វិក ជាពិសេស គឺកិច្ចខិតខំប្រឹងប្រែងរួមគ្នា ប្រឈមនឹងការគំរាមកំហែងអាវុធនុយក្លេអ៊ែរ និងការបាញ់សាកល្បងមីស៊ីលម្ដងហើយម្ដងទៀតពីសំណាក់ប្រទេសកូរ៉េខាងជើង។
គួររំឭកថា កាលពីខែតុលា ប្រទេសកូរ៉េខាងជើង បានបាញ់សាកល្បងមីស៊ីលរយៈចម្ងាយឆ្ងាយជាងពេលមុន ជាមីស៊ីលដែលមានសមត្ថភាពហោះរយៈចម្ងាយឆ្ងាយរំលងប្រទេសជប៉ុនជាលើកដំបូង ក្នុងរយៈពេល ៥ ឆ្នាំ។ ការបាញ់មីស៊ីលរំលងប្រទេសជប៉ុន នាពេលនោះ បានជំរុញឱ្យជប៉ុនចេញបញ្ជាដល់ប្រជាជនរបស់ខ្លួន ក្នុងការបង្កើនការប្រុងប្រយ័ត្ន និងប្រញាប់នាំគ្នាចូលលេណដ្ឋាន ដើម្បីការពារខ្លួនពីគ្រោះថ្នាក់ជាយថាហេតុថែមទៀតផង។
ភ្លាមៗ បន្ទាប់ពីការបាញ់មីស៊ីលរំលងប្រទេសជប៉ុន ពីសំណាក់កូរ៉េខាងជើង សហរដ្ឋអាមេរិក បានបង្ហាញការប្ដេជ្ញាចិត្តយ៉ាងមុតមាំរបស់ខ្លួន ក្នុងការការពារប្រទេសជប៉ុន។ ទន្ទឹមគ្នានោះ សហរដ្ឋអាមេរិក រួមជាមួយសម្ព័ន្ធមិត្តជប៉ុន បានធ្វើសមយុទ្ធយោធារួមគ្នា នៅលើដែនសមុទ្រជប៉ុន។ ចំណែកជាមួយកូរ៉េខាងត្បូង សហរដ្ឋអាមេរិកបានធ្វើសមយុទ្ធយោធា ដោយមានទាំងការបើកយន្តហោះចម្បាំងទម្លាក់គ្រាប់បែក នៅសមុទ្រលឿង ដើម្បីជាការឆ្លើយតប និងបង្ហាញសាច់ដុំដល់កូរ៉េខាងជើងផងដែរ។
កាលពីសប្តាហ៍មុន មន្ត្រីអាមេរិកម្នាក់ បានប្រាប់ទីភ្នាក់ងារព័ត៌មាន Reuters ថា បញ្ហាតានតឹង នៅតំបន់ឧបទ្វីបកូរ៉េនេះ គឺមានតែចិន និងរុស្ស៊ីប៉ុណ្ណោះ ដែលមានអានុភាពអាចបញ្ចុះបញ្ចូលកូរ៉េខាងជើង កុំឱ្យបន្តសាកល្បងគ្រាប់បែកនុយក្លេអ៊ែរឡើងវិញ។ កាលពីខែឧសភា សហរដ្ឋអាមេរិកបានបង្ហើបថា កូរ៉េខាងជើងកំពុងរៀបចំបន្តការសាកល្បងនុយក្លេអ៊ែរជាលើកទី១ គិតចាប់តាំងពីឆ្នាំ ២០១៧ ប៉ុន្តែគេមិនទាន់មានព័ត៌មានច្បាស់ការណ៍ថា កូរ៉េខាងជើង នឹងសាកល្បងអាវុធនុយក្លេអ៊ែររបស់ខ្លួន នៅពេលណានោះឡើយ។ សហរដ្ឋអាមេរិក បានបញ្ជាក់ថា ខ្លួនកំពុងតែស្ថិតក្នុងដំណាក់កាលចុងក្រោយនៃការពិនិត្យឡើងវិញនូវគោលនយោបាយរបស់ខ្លួន ចំពោះកូរ៉េខាងជើង និងចង់បង្កើនកិច្ចសហប្រតិបត្តិការត្រីភាគីជាមួយកូរ៉េខាងត្បូង និងជប៉ុន បន្ថែមទៀត ដើម្បីទប់ទល់នឹងការគំរាមកំហែងរបស់កូរ៉េខាងជើង។
គួរបញ្ជាក់ថា កូរ៉េខាងជើងត្រូវក្រុមប្រឹក្សាសន្តិសុខអង្គការសហប្រជាជាតិ ហាមឃាត់ ក្នុងការធ្វើតេស្តសាកល្បងអាវុធនុយក្លេអ៊ែរ និងបាញ់មីស៊ីលណាមួយជាដាច់ខាត។ ការបាញ់មីស៊ីលរបស់ប្រទេសកូរ៉េខាងជើង នាពេលថ្មីៗនេះ បានជំរុញឱ្យមានការដាក់ទណ្ឌកម្មបន្ថែមទៀតទៅលើកូរ៉េខាងជើង ដើម្បីធ្វើយ៉ាងណាកុំឱ្យប្រទេសនេះមានចំណូល ឬមូលនិធិណាមួយ ដើម្បីផ្គត់ផ្គង់ការអភិវឌ្ឍកម្មវិធីនុយក្លេអ៊ែររបស់ខ្លួនតទៅទៀតបាន៕
វីដេអូ៖
