តុលាការហុងកុង បានសម្រេចដាក់ពន្ធនាគារបុរសម្នាក់ ក្នុងបទចោទប្រមាថភ្លេងជាតិចិន នៅថ្ងៃទី ១០ ខែវិច្ឆិកា។ នេះជាករណីដំបូងបង្អស់ហើយ ដែលតុលាការហុងកុង បានសម្រេចដាក់ទោសពលរដ្ឋម្នាក់ក្នុងបទចោទប្រមាថភ្លេងជាតិចិន។
ពលរដ្ឋហុងកុងម្នាក់នោះ បានគ្រវីទង់ជាតិសម័យអាណានិគម នៅពេលដែលគេកំពុងមើលការផ្សាយផ្ទាល់ពីព្រឹត្តិការណ៍កីឡាអូឡាំពិក ក្រុងតូក្យូ កាលពីឆ្នាំមុន។
លោក Paula Leung អាយុ ៤២ ឆ្នាំ បានសារភាពកំហុស ចំពោះការប្រមាថលើប្រទេសចិន ក្នុងអំឡុងពេលទស្សនាការប្រកួតរបស់កីឡាករប្រដាល់ហុងកុង Edgar Cheung ដែលបានឈ្នះមេដាយមាស អូឡាំពិក ដោយក្នុងខណៈដែលអត្តពលិកហុងកុង បានទទួលមេដាយមាស លោក Leung បែរជាគ្រវីទង់ជាតិហុងកុងសម័យអាណានិគមអង់គ្លេសទៅវិញ។
តុលាការហុងកុងបានបង្ហាញភ័ស្តុតាង ដែលជនជាប់ចោទគ្រវីទង់ជ័យហុងកុង ក្រោមអាណានិគមអង់គ្លេស ខណៈដែលពិធីប្រគល់មេដាយ ត្រូវបានបង្ហាញនៅលើអេក្រង់ធំនៃផ្សារទំនើបមួយ កាលពីខែកក្កដា ឆ្នាំ ២០២១។
សារព័ត៌មានហុងកុង បានរាយការណ៍ថា ចៅក្រមបានកាត់ទោសជនជាប់ចោទ ឱ្យជាប់ពន្ធនាគាររយៈពេល ៣ ខែ និងបាននិយាយថា ចុងចោទបានប្រមាថយ៉ាងធ្ងន់ធ្ងរដល់បទភ្លេងជាតិ និងធ្វើឱ្យខូចកិត្តិយសប្រទេស (ចិន)។
កាលពីឆ្នាំ ២០២០ ក្រុងហុងកុងបានអនុម័តច្បាប់ ដែលហាមប្រាមការប្រមាថដល់ភ្លេងជាតិរបស់ប្រទេសចិន បន្ទាប់ពីការតវ៉ាជំរុញលទ្ធិប្រជាធិបតេយ្យដ៏ធំ និងដោយហិង្សា ប្រឆាំងនឹងគំនាបពីសំណាក់អំណាចកណ្ដាលប៉េកាំង។
អត្តពលិកហុងកុងបានទទួលជោគជ័យ ក្នុងព្រឹត្តិការណ៍កីឡាអូឡាំពិក នាទីក្រុងតូក្យូ ដែលនាំឱ្យមានកំណើនអ្នកគាំទ្រ ក្នុងស្រុក។ កាលពីឆ្នាំមុន អ្នកគាំទ្ររាប់រយនាក់ បានប្រមូលផ្តុំគ្នា នៅផ្សារទំនើបមួយ ដើម្បីមើលកីឡាករ Cheung ឈ្នះមេដាយមាស ហើយអ្នកខ្លះបានចំអកភ្លេងជាតិរបស់ប្រទេសចិន និងស្រែកថា «យើងគឺជាហុងកុង»។
ច្បាប់ប្រឆាំងការប្រមាថដល់ភ្លេងជាតិ កម្រិតដាក់ពន្ធនាគាររហូតដល់ ៣ឆ្នាំ និងពិន័យជាប្រាក់អតិបរមា ៥០ ០០០ ដុល្លារហុងកុង (៦ ៤០០ ដុល្លារអាមេរិក)៕