មេបញ្ជាការអង្គភាពអវកាសឆ្មាំបដិវត្តន៍របស់អ៊ីរ៉ង់ លោកឧត្តមសេនីយ៍ AmiraliHajizadeh បានប្រកាសនៅថ្ងៃព្រហស្បតិ៍ ទី ១០ ខែវិច្ឆិកាថា អ៊ីរ៉ង់បានផលិតមីស៊ីលអ៊ីពែរសូនិក (Hypersonic) ជាប្រភេទមីស៊ីល ដែលមានល្បឿនលឿនជាងសំឡេង និងមានសមត្ថភាពវាយប្រហារគ្រប់ប្រព័ន្ធការពារទាំងអស់។
មីស៊ីលអ៊ីពែរសូនិក គឺជាមីស៊ីល ដែលអាចផ្ទុកអាវុធនុយក្លេអ៊ែរ និងអាចហោះ បានលឿនជាងសំឡេងដល់ទៅ ៥ ដងឯណោះ ពោលគឺចាប់ពី ៦ពាន់គីឡូម៉ែត្រ ក្នុង ១ ម៉ោងឡើងទៅ។ ទីភ្នាក់ងារព័ត៌មានរដ្ឋរបស់អ៊ីរ៉ង់ Fars បានស្រង់សម្ដីលោកឧត្តមសេនីយ៍ Hajizadeh ដែលនិយាយថា មីស៊ីលអ៊ីពែរសូនិក ដែលអ៊ីរ៉ង់ផលិតឡើងនេះ គឺដើម្បីទប់ទល់នឹងប្រព័ន្ធការពារដែនអាកាស និងប្រព័ន្ធការពារប្រឆាំងមីស៊ីលទាំងអស់។
លោក Haijizadeh បានថ្លែងដោយអំនួត និងភាពជឿជាក់ថា ប្រទេសដទៃ ត្រូវប្រើពេលយូរទៀត គឺជាច្រើនទសវត្សរ៍ទៀត មុនពេលអាចផលិតប្រព័ន្ធការពារ ឬប្រព័ន្ធចាប់ស្ទាក់មីស៊ីលអ៊ីពែរសូនិក ដែលអ៊ីរ៉ង់ទើបតែផលិតបាននេះ។ សម្រាប់លោកឧត្តមសេនីយ៍ Haijizadeh មីស៊ីលអ៊ីពែរសូនិករបស់អ៊ីរ៉ង់នេះ ឆ្លុះបញ្ចាំងឱ្យឃើញពីការលោតផ្លោះដ៏អស្ចារ្យ នៅក្នុងវិស័យផលិតមីស៊ីលរបស់អ៊ីរ៉ង់។
គួរកត់សម្គាល់ថា ការប្រកាសនេះធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីអ៊ីរ៉ង់បានទទួលស្គាល់ថា ខ្លួនបានបញ្ជូនយន្តហោះគ្មានមនុស្សបើកទៅរុស្ស៊ី។ ចំណែកកាសែត Washington Post បានរាយការណ៍ កាលពីថ្ងៃទី១៦ ខែតុលាថា អ៊ីរ៉ង់កំពុងរៀបចំបញ្ជូនមីស៊ីលទៅកាន់ប្រទេសរុស្ស៊ី ប៉ុន្តែទីក្រុងតេអេរ៉ង់ បានច្រានចោលរបាយការណ៍នេះថា មិនមែនជារឿងពិតឡើយ។
ទាំងអ៊ីរ៉ង់ និងរុស្ស៊ី សុទ្ធតែទទួលរងនូវការដាក់ទណ្ឌកម្មយ៉ាងតឹងរ៉ឹង ដោយអ៊ីរ៉ង់រងការដាក់ទណ្ឌកម្ម ព្រោះតែប្រទេសនេះ រឹងទទឹងមិនព្រមបន្ទន់ជំហរ ដើម្បីស្ដារកិច្ចព្រមព្រៀងនុយក្លេអ៊ែរឆ្នាំ ២០១៥ ឡើងវិញ ខណៈរុស្ស៊ី រងទណ្ឌកម្ម បន្ទាប់ពីប្រទេសនេះ បានចូលឈ្លានពានអ៊ុយក្រែន តាំងពីខែកុម្ភៈ។
ប្រទេសទាំង២ គឺអ៊ីរ៉ង់ និងរុស្ស៊ី បានឆ្លើយតបទៅនឹងការដាក់ទណ្ឌកម្មទាំងនេះ ដោយជំរុញកិច្ចសហប្រតិបត្តិការលើវិស័យសំខាន់ៗ ដើម្បីជួយជំរុញសេដ្ឋកិច្ចរបស់ពួកគេ។
កាលពីខែមីនា រដ្ឋបាលអាមេរិករបស់លោក ចូ បៃដិន បានសម្រេចដាក់ទណ្ឌកម្មលើអ៊ីរ៉ង់ ទាក់ទងនឹងសកម្មភាពមីស៊ីលរបស់ប្រទេសនេះ។ អាមេរិកបានបញ្ជាក់ នៅក្នុងសេចក្តីថ្លែងការណ៍ ក្នុងខែមីនានោះថា វិធានការដាក់ទណ្ឌកម្មនេះ ធ្វើឡើងជាការឆ្លើយតបនឹងការវាយប្រហារ ដោយមីស៊ីលរបស់អ៊ីរ៉ង់ ទៅលើទីក្រុង Arbil ប្រទេសអ៊ីរ៉ាក់ ក៏ដូចជាការវាយប្រហារមីស៊ីលពីសំណាក់ភ្នាក់ងារអ៊ីរ៉ង់ប្រឆាំងនឹងអារ៉ាប៊ីសាអ៊ូឌីត និងអេមីរ៉ាតអារ៉ាប់រួម។
សហរដ្ឋអាមេរិក ចាត់ទុកការអភិវឌ្ឍ និងការរីកសាយភាយនៃមីស៊ីលរបស់ប្រទេសអ៊ីរ៉ង់ថា ជាកំពុងតែបង្កការគំរាមកំហែងយ៉ាងធ្ងន់ធ្ងរដល់សន្តិសុខ ក្នុងតំបន់ និងអន្តរជាតិ៕