.jpg)
លោកប្រធានាធិបតីអាមេរិក ចូ បៃដិន (ស្តាំ) និងលោកនាយករដ្ឋមន្ត្រីវៀតណាម លោក Pham Minh Chinh ក្នុងអំឡុងកិច្ចប្រជុំកំពូលអាស៊ាន-អាមេរិក ជាផ្នែកមួយនៃកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន) លើកទី៤០ និងទី៤១ នៅរាជធានីភ្នំពេញ នៅថ្ងៃទី ១២ ខែវិច្ឆិកា។ AFP
វៀតណាមអាមេរិកសន្យាគ្នាថា ពួកគេផ្តល់អាទិភាពខ្ពស់ចំពោះភាពជាដៃគូគ្រប់ជ្រុងជ្រោយ។ នេះបើតាមសារព័ត៌មានរដ្ឋវៀតណាមដែលបានចេញផ្សាយនូវខ្លឹមសារជំនួបរវាង នាយករដ្ឋមន្ត្រី លោក Pham Minh Chinhនិងប្រធានាធិបតីអាមេរិកលោក Joe Biden នៅខាងក្រៅកិច្ចប្រជុំកំពូលអាស៊ាននារាជធានីភ្នំពេញ ប្រទេសកម្ពុជាកាលពីថ្ងៃទី ១២ វិច្ឆិកា។
ប្រភពដដែលបន្តថា វៀតណាម និងអាមេរិកឯកភាពគ្នារៀបចំជំនួបតាមទូរស័ព្ទរវាងអគ្គលេខាបក្សកុម្មុយនីស្តវៀតណាម លោក Nguyen PhuTrong និងប្រធានាធិបតីអាមេរិក លោក Joe Biden នាពេលខាងមុខព្រមទាំងរៀបចំដំណើរទស្សនកិច្ចផ្លូវការទៅវិញទៅមកទៀតផង។
ភាគីទាំង ២ នឹងបន្តគោរពព្រមទាំងផ្តល់អាទិភាពខ្ពស់ចំពោះភាពជាដៃគូគ្រប់ជ្រុងជ្រោយរវាងប្រទេសទាំង ២ ឯកភាពបង្កើនការផ្លាស់ប្តូរ និងការសន្ទនានៅគ្រប់កម្រិត ជាពិសេសនៅកម្រិតខ្ពស់។
ប្រធានាធិបតីអាមេរិកលោក Joe Biden បានស្នើថា ប្រទេសទាំង ២ បន្តជំរុញកិច្ចសហប្រតិបត្តិការរឹងមាំនាពេលខាងមុខ ប្រើប្រាស់ឱកាសសហប្រតិបត្តិការប្រកបដោយប្រសិទ្ធភាព ដើម្បីនាំទំនាក់ទំនងរវាងប្រទេសទាំង ២ ឱ្យកាន់តែស៊ីជម្រៅ និងមានប្រសិទ្ធភាពលើវិស័យដែលមានផលប្រយោជន៍ទៅវិញទៅមក រួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងក្នុងពិភពលោក។
ប្រទេសវៀតណាម និងសហរដ្ឋអាមេរិកបានចុះកិច្ចព្រមព្រៀងស្តីពីភាពជាដៃគូយុទ្ធសាស្ត្រគ្រប់ជ្រុងជ្រោយ កាលពីឆ្នាំ ២០១៣ ក្នុងអាណត្តិប្រធានាធិបតីបារ៉ាក់អូបាម៉ា។ ចាប់តាំងពីការចុះហត្ថលេខាលើភាពជាដៃគូលើគ្រប់ជ្រុងជ្រោយរវាងសហរដ្ឋអាមេរិក និងវៀតណាមក្នុងឆ្នាំ ២០១៣ ពាណិជ្ជកម្ម និងការវិនិយោគទ្វេភាគីបានរីកចម្រើនយ៉ាងឆាប់រហ័ស។
នៅឆ្នាំ ២០២១ ទំហំពាណិជ្ជកម្មទ្វេភាគីស្ទើរតែឈានដល់ ១១៣ ពាន់លានដុល្លារ។ឆ្នាំនេះសហរដ្ឋអាមេរិកគឺជាដៃគូពាណិជ្ជកម្មធំជាងគេទី៣ របស់វៀតណាម (បន្ទាប់ពីប្រទេសចិន និងកូរ៉េខាងត្បូង) ។ មិនតែប៉ុណ្ណោះអាមេរិកក៏ទីផ្សារនាំចេញធំបំផុតរបស់វៀតណាមផង។កាលពីឆ្នាំ ២០២០ ការវិនិយោគផ្ទាល់ពីបរទេសរបស់អាមេរិកនៅវៀតណាមមានចំនួន ២,៨ ពាន់លានដុល្លារ។
វៀតណាមបានក្លាយជាសមាជិកមួយក្នុងចំណោមសមាជិកទាំង ១៤ នៃក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិកដែលដឹកនាំដោយសហរដ្ឋអាមេរិក ដោយអាមេរិកសន្យាថានឹងបង្កើនទំនាក់ទំនងរបស់ប្រទេសទាំង២ ឱ្យឡើងដល់កម្រិតយុទ្ធសាស្ត្រថែមទៀត។
ទោះជាយ៉ាងណាក្ដីមជ្ឈមណ្ឌលសិក្សាអំពីយុទ្ធសាស្ត្រ និងកិច្ចការអន្តរជាតិ (CSIS) របស់អាមេរិក បានកត់សម្គាល់ថាទំនាក់ទំនងរវាងអាមេរិកនិងវៀតណាមហាក់មិនទាន់ដើរទៅដោយរលូនប៉ុន្មានទេ ខណៈទីក្រុងវ៉ាស៊ីនតោន និងទីក្រុងហាណូយកំពុងបាត់បង់សន្ទុះក្នុងកិច្ចសហប្រតិបត្តិការសន្តិសុខទ្វេភាគីព្រមទាំងមានបញ្ហាប្រឈមមួយចំនួនដែលត្រូវដោះស្រាយជាបន្តបន្ទាប់ទៀតផង។
ទំនាក់ទំនងរវាងវៀតណាមនិងអាមេរិកឆ្លងកាត់ដំណាក់កាលប្រវត្តិសាស្ត្រជាសត្រូវបង្ហូរឈាម រហូតក្លាយជាដៃគូពេលដែលអាមេរិកតម្រង់គោលនយោបាយនៅអាស៊ីដោយប្រជែងពេញមុខជាមួយប្រទេសចិន ដែលជាគូទំនាស់ប្រវត្តិ សាស្ត្រជាមួយវៀតណាមស្រាប់៕
