.jpg)
រដ្ឋមន្ត្រីការបរទេសបារាំងលោកស្រី Catherine Colonna (ឆ្វេង) និងតំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោក Josep Borrell បានជួបពិភាក្សាទ្វេភាគីក្នុងកិច្ចប្រជុំរដ្ឋមន្ត្រីការបរទេស G7 នៅទីក្រុង Muenster ភាគខាងលិចប្រទេសអាល្លឺម៉ង់ កាលពីថ្ងៃទី ៤ ខែវិច្ឆិកា។ AFP
រដ្ឋមន្ដ្រីក្រសួងការបរទេសបារាំង លោកស្រី Catherine Colonna បានថ្លែង កាលពីថ្ងៃសៅរ៍ ទី ១២ ខែវិច្ឆិកាថា មានពលរដ្ឋបារាំង ២ នាក់ទៀត ត្រូវរងការឃុំខ្លួន នៅឯប្រទេសអ៊ីរ៉ង់ ហើយទាមទារជាបន្ទាន់ឱ្យមានការដោះលែងពួកគេទាំង ២ នាក់ ព្រមទាំងពលរដ្ឋបារាំងចំនួន ៥នាក់ផ្សេងទៀត ដែលត្រូវបានអាជ្ញាធរអ៊ីរ៉ង់ចាប់ឃុំខ្លួន នាពេលកន្លងមក។
បើតាមប្រមុខការទូតបារាំង បើរាប់ទាំងករណីចាប់ខ្លួនចុងក្រោយនេះ មានពលរដ្ឋបារាំងសរុបចំនួន ៧ នាក់ហើយ ដែលកំពុងស្ថិតក្រោមការឃុំខ្លួន នៅប្រទេសអ៊ីរ៉ង់។ លោកស្រី Catherine Colonna បាននិយាយថា៖ «យើងព្រួយបារម្ភអំពីជនរួមជាតិទាំង ២ រូប ដែលរងការឃុំខ្លួនចុងក្រោយ ដោយអាជ្ញាធរអ៊ីរ៉ង់។ វាមានសារៈសំខាន់ជាងពេលណាៗទាំងអស់ ក្នុងការរំឭកអ៊ីរ៉ង់ អំពីកាតព្វកិច្ចអន្តរជាតិរបស់ខ្លួន»។
ព័ត៌មាននៃការឃុំខ្លួនពលរដ្ឋបារាំងចំនួន ២ រូបចុងក្រោយនេះ ត្រូវបានដឹង ១ថ្ងៃបន្ទាប់ពីប្រធានាធិបតីបារាំង លោក អេម៉ានុយអ៊ែល ម៉ាក្រុង បានជួបជាមួយសកម្មជនស្ដ្រីអ៊ីរ៉ង់ដ៏លេចធ្លោចំនួន ៤រូប នៅឯវិមានអេលីហ្សេ ក្នុងទីក្រុងប៉ារីស។ លោក ម៉ាក្រុង ធ្លាប់បានលើកឡើង កាលពីខែមុន អំពីជំហរគាំទ្ររបស់បារាំងលើក្រុមបាតុករ នៅអ៊ីរ៉ង់។ លោកថែមទាំងបានសម្ដែងការកោតសរសើរ ចំពោះស្ដ្រី និងយុវជន នៅអ៊ីរ៉ង់ ដែលចេញមុខធ្វើបាតុកម្ម នៅក្នុងប្រទេសនេះ។
ការលើកឡើងរបស់ប្រធានាធិបតីបារាំងដូច្នេះ ត្រូវបានក្រសួងការបរទេសអ៊ីរ៉ង់ចាត់ទុកថា ជាការលូកដៃចូលកិច្ចការផ្ទៃក្នុងអ៊ីរ៉ង់ និងមានខ្លឹមសារលើកទឹកចិត្តដល់អ្នកបង្កហិង្សា និងអ្នកបំពានច្បាប់។
សូមរំឭកថា នៅប្រទេសអ៊ីរ៉ង់ បាតុកម្មទ្រង់ទ្រាយធំនៅទូទាំងប្រទេស បានផ្ទុះឡើងតាំងពីពាក់កណ្ដាលខែកញ្ញា ក្រោយពីមានករណីស្លាប់របស់យុវតី Mahsa Amini នៅក្រោមការឃុំឃាំងរបស់ប៉ូលិស។ យុវតី Mahsa Amni ត្រូវចាប់ខ្លួនយកទៅបង្ខាំងទុក ដោយប៉ូលិសចោទនាងថា បានប្រព្រឹត្តខុសសីលធម៌ ដោយការពាក់ក្រណាត់រុំក្បាលពុំបានត្រឹមត្រូវ។
ជាការកត់សម្គាល់ គិតត្រឹមពេលនេះ បារាំងនៅពុំទាន់អាចកំណត់អត្តសញ្ញាណនៃពលរដ្ឋបារាំងទាំង ២នាក់ ដែលទើបរងការឃុំខ្លួននេះនៅឡើយទេ។ ចំណែកពលរដ្ឋបារាំងចំនួន ៥ នាក់ទៀត ដែលត្រូវអាជ្ញាធរអ៊ីរ៉ង់ចាប់ឃុំខ្លួនកន្លងមក មានជាអាថិ៍ អ្នកស្រាវជ្រាវជនជាតិបារាំង-អ៊ីរ៉ង់ លោកស្រី Fariba Adelkhah ដែលត្រូវបានចាប់ខ្លួន ក្នុងខែមិថុនា ឆ្នាំ ២០១៩ ហើយក្រោយមកត្រូវបានកាត់ទោសឱ្យជាប់ពន្ធនាគាររយៈពេល ៥ ឆ្នាំ ពីបទបំផ្លាញសន្តិសុខជាតិ លោក Benjamin Briere ត្រូវបានចាប់ខ្លួនក្នុងខែឧសភា ឆ្នាំ ២០២០ ហើយក្រោយមកត្រូវបានកាត់ទោសឱ្យជាប់ពន្ធនាគារ ៨ ឆ្នាំ និង ៨ ខែពីបទចារកម្ម, មន្ត្រីសហជីពគ្រូបង្រៀនបារាំង លោកស្រី Cecile Kohler និងដៃគូលោក Jacques Paris ត្រូវបានឃុំខ្លួន ក្នុងខែឧសភា ឆ្នាំ ២០២២ ដោយរងការចោទប្រកាន់ពីបទព្យាយាមបង្កចលាចល ក្នុងអំឡុងពេលកូដកម្មរបស់គ្រូបង្រៀន ព្រមទាំងជនជាតិបារាំងម្នាក់ទៀត ដែលធ្វើដំណើរកាត់តាមទីក្រុងតេអេរ៉ង់។
រដ្ឋាភិបាលបារាំង កាលពីខែមុន បានណែនាំពលរដ្ឋរបស់ខ្លួន ដែលនៅប្រទេសអ៊ីរ៉ង់ ឱ្យចាកចេញពីប្រទេសនេះឱ្យបានឆាប់តាមដែលអាចធ្វើទៅបាន៕
