«តៃវ៉ាន់ គឺជាកម្មសិទ្ធិរបស់ប្រជាជនតៃវ៉ាន់»។ នេះគឺជាការប្រកាសរបស់លោកស្រីប្រធានា ធិបតី Tsai Ing-wen នៅថ្ងៃសៅរ៍ ទី ១២ ខែវិច្ឆិកា ដោយបញ្ជាក់បន្ថែមថា បេសកកម្មនៅក្នុងជីវិតរបស់លោកស្រី គឺការធានាឱ្យកោះនេះ ស្ថិតនៅជាកម្មសិទ្ធិរបស់ប្រជាជនតៃវ៉ាន់បន្តទៀត។ ការថ្លែងរបស់លោកស្រីយ៉ាងដូច្នេះ ធ្វើឡើងតែ ២ សប្ដាហ៍ប៉ុណ្ណោះ មុនពេលដែលតៃវ៉ាន់ត្រូវរៀបចំការបោះឆ្នោត នាថ្ងៃទី ២៦ ខែវិច្ឆិកា ខណៈដែលដែនកោះនេះ កំពុងរងសម្ពាធកាន់តែខ្លាំងពីសំណាក់រដ្ឋាភិបាលទីក្រុងប៉េកាំងរបស់លោក ស៊ី ជីនភីង ដែលចង់ក្ដោបយកតៃវ៉ាន់ឱ្យស្ថិតក្រោមការគ្រប់គ្រងរបស់ខ្លួន។
ថ្លែងទៅកាន់អ្នកគាំទ្ររាប់ពាន់នាក់ នៅក្នុងការប្រមូលផ្ដុំមួយកណ្ដាលទីក្រុងតៃប៉ិ លោកស្រីប្រធានាធិបតី Tsai Ing-wen បានសង្កត់ធ្ងន់ថា លោកស្រីមិនចុះចាញ់ជាដាច់ខាត ចំពោះសំណើរបស់លោកប្រធានាធិបតី ស៊ី ជីនភីង អំពី «ស្វ័យភាពក្រោមអធិបតេយ្យរបស់ចិន»។ បើតាមប្រធានាធិបតីតៃវ៉ាន់រូបនេះ ក្រោមការដឹកនាំរបស់លោកស្រី ប្រទេសកាន់តែច្រើន បានចាត់ទុកលទ្ធិប្រជាធិបតេយ្យ និងសន្តិសុខរបស់កោះតៃវ៉ាន់ ជាគន្លឹះនៃសន្តិភាព។
លោកស្រី Tsai Ing-wen បានថ្លែងថា៖ «អត្ថិភាពនៃកោះតៃវ៉ាន់ និងការចង់បានសេរីភាព និងលទ្ធិប្រជាធិបតេយ្យពីសំណាក់ប្រជាជនតៃវ៉ាន់ មិនមែនជាទង្វើធ្វើឡើង ដើម្បីញុះញង់នរណាម្នាក់នោះឡើយ។ ក្នុងនាមជាប្រធានាធិបតី ការអំពាវនាវរបស់ខ្ញុំ គឺត្រូវខិតខំប្រឹងប្រែងឱ្យអស់ពីសមត្ថភាព ដើម្បីធ្វើយ៉ាងណារក្សាឱ្យតៃវ៉ាន់ នៅតែជាកោះតៃវ៉ាន់របស់ប្រជាជនតៃវ៉ាន់»។
តៃវ៉ាន់បានក្លាយជាចំណុចដ៏រសើប សម្រាប់សន្តិសុខ និងស្ថិរភាព នៅក្នុងតំបន់។ កាលពីខែសីហា ប្រទេសចិនបានសម្ញែងកម្លាំងដាក់តៃវ៉ាន់ បន្ទាប់ពីប្រធានសភាអាមេរិក លោកស្រី Nancy Pelosi បានធ្វើដំណើរទស្សនកិច្ច នៅទីក្រុងតៃប៉ិ ដោយបានធ្វើសមយុទ្ធយោធា និងហោះហើរយន្តហោះចម្បាំងស្ទើរតែរាល់ថ្ងៃ នៅក្បែរច្រកសមុទ្រតៃវ៉ាន់ដ៏តូចចង្អៀត។ លោកប្រធានាធិបតីចិន ស៊ី ជីនភីង និងសមភាគីអាមេរិក លោក ចូ បៃដិន នឹងជជែកពិភាក្សាគ្នាអំពីសំណុំរឿងតៃវ៉ាន់នេះ នៅក្នុងជំនួបទល់មុខគ្នាជាលើកដំបូង នាសប្ដាហ៍ក្រោយផងដែរ។ នេះបើតាមការឱ្យដឹងពីសេតវិមាន៕
វីដេអូ៖