.jpg)
នាវា Majestic Princess ដែលផ្ទុះឆ្លងជំងឺកូវីដ ១៩ ចូលចតនៅកំពង់ផែ Circular Guay នៃទីក្រុងស៊ីដនី ប្រទេសអូស្ត្រាលី កាលពីព្រឹកថ្ងៃសៅរ៍ ទី ១២ ខែវិច្ឆិកា។ AFP
នាវាទេសចរណ៍មួយ ដែលមានផ្ទុះឆ្លងជំងឺកូវីដ ១៩ ជាង ៨០០ ករណី បានចូលចតនៅកំពង់ផែ Circular Guay នៃទីក្រុងស៊ីដនី ប្រទេសអូស្ត្រាលី កាលពីព្រឹកថ្ងៃសៅរ៍ ទី ១២ ខែវិច្ឆិកា ក្រោយពេលត្រឡប់មកពីដំណើរទេសចរណ៍ នៅប្រទេសនូវែលសេឡង់វិញ។ នាវា Majestic Princess ដែលផ្ទុះឆ្លងជំងឺកូវីដ ១៩ នេះ មានផ្ទុកអ្នកដំណើរចំនួនជាង ៤ ០០០ នាក់ ក្នុងនោះអ្នកដំណើរប្រមាណ ៨០០ នាក់ ឆ្លងជំងឺកូវីដ ១៩។
សេចក្ដីថ្លែងការណ៍របស់នាវានេះ ឱ្យដឹងថា ភ្ញៀវជាអ្នកដំណើរ នៅលើកប៉ាល់ទាំងអស់ បានធ្វើតេស្តរហ័សរកជំងឺកូវីដ ១៩ ក្នុងរយៈពេលមិនដល់ ១ ថ្ងៃមុនពេលត្រូវចុះពីនាវា ហើយជាលទ្ធផល អ្នកដំណើរជាង ៨០០ នាក់ វិជ្ជមានជំងឺកូវីដ ១៩។ អ្នកដំណើរដែលមានវិជ្ជមានកូវីដ ១៩ តម្រូវឱ្យចុះពីនាវាតាមច្រកដាច់ដោយឡែក និងមិនអនុញ្ញាតឱ្យប្រើប្រាស់មធ្យោបាយធ្វើដំណើរសាធារណៈឡើយ ក្រោយពេលចុះពីនាវារួច។
ការផ្ទុះឆ្លងជំងឺកូវីដ ១៩ នៅលើនាវាកម្សាន្ត ក្នុងលក្ខណៈទ្រង់ទ្រាយធំដូច្នេះ រំឭកអំពីករណីនាវាកម្សាន្ត Ruby Princess ដែលផ្ទុះឆ្លងជំងឺកូវីដ ១៩ ជាង ៩០០ ករណី កាលពីដើមឆ្នាំ ២០២០។ ទាំងនាវា Ruby Princess និងនាវា Majestic Princess សុទ្ធតែស្ថិតក្រោមការគ្រប់គ្រងរបស់ក្រុមហ៊ុន Carnival Australia។ លោកស្រី Marguerite Fitzgerald ប្រធានក្រុមហ៊ុន Carnival Australia បញ្ជាក់ថា តាំងពីឆ្នាំ ២០២០ មកទល់ពេលនេះ ក្រុមហ៊ុនលោកស្រី និយាយដោយឡែក និងទូទាំងពិភពលោកនិយាយជារួម បានយល់ដឹងច្រើនជាងមុនពីជំងឺកូវីដ១ ៩។
បើតាមប្រធានក្រុមហ៊ុន Carnival Australia ដដែល ករណីកូវីដ១៩ ដែលផ្ទុះឆ្លងនៅលើនាវា Majestic Princess ចុងក្រោយនេះ ត្រូវបានរកឃើញ ចាប់តាំងពីថ្ងៃទី ១២ នៃដំណើរកម្សាន្ត ហើយបុគ្គលិកនៅលើនាវាបានចាត់ចែងដាក់អ្នកឆ្លងជំងឺទាំងអស់ឱ្យនៅដាច់ដោយឡែក តាំងតែពីពេលនោះមក៕
