លោក បៃដិន (ស្ដាំ) ចាប់ដៃជាមួយលោក ស៊ី អំឡុងជំនួបទ្វេភាគី នៅក្រៅកិច្ចប្រជុំ G20 នៅលើកោះបាលី ប្រទេសឥណ្ឌូនេស៊ី នៅថ្ងៃទី ១៤ ខែវិច្ឆិកា ឆ្នាំ ២០២២។ AFP
ប្រធានាធិបតីអាមេរិក លោក ចូ បៃដិន នៅថ្ងៃចន្ទ ទី ១៤ វិច្ឆិកា បាននិយាយថាអាមេរិកមិនចង់មានជម្លោះជាមួយចិនទេនិងបានច្រានចោលក្តីបារម្ភអំពីសង្រ្គាមត្រជាក់ថ្មី។ ការប្រកាសរបស់លោក បៃដិន នេះ ធ្វើឡើងបន្ទាប់ពីលោកបានជួបប្រជុំជាមួយសមភាគីចិនលោក ស៊ី ជីនភីង មុនពេលដែលកិច្ចប្រជុំប្រទេស G20 ចាប់ផ្តើមក្នុងប្រទេសឥណ្ឌូនេស៊ី។
លោក បៃដិន បាននិយាយថា លោកមិនជឿនោះទេថា ប្រទេសចិន មានផែនការឈ្លានពានកោះតៃវ៉ាន់ឆាប់ៗ ហើយលោក បានវាយតម្លៃយ៉ាងវិជ្ជមាននូវកិច្ចពិភាក្សារបស់លោកជាមួយនឹងមេដឹកនាំចិនលោក ស៊ីដែលជាជំនួបទល់មុខគ្នាជាលើកដំបូង ចាប់តាំងពីលោកចូលកាន់តំណែងប្រធានធិបតីអាមេរិកមក។
ប្រមុខសេតវិមានអាមេរិក ក៏បានសង្កត់ធ្ងន់ថាគ្មានការផ្លាស់ប្តូរគោលនយោបាយចិនតែ ១ របស់ទីក្រុងវ៉ាស៊ីនតោនទេហើយបាននិយាយទៀតថា សហរដ្ឋអាមេរិកប្រឆាំងនឹងការផ្លាស់ប្តូរឯកតោភាគីណាមួយចំពោះស្ថានភាពបច្ចុប្បន្ននៅកោះតៃវ៉ាន់។
ទាំងលោក ស៊ី ជីនភីង និងលោក ចូ បៃដិន បានព្យាយាមបន្ថយភាពតានតឹងនឹងគ្នា នៅខណៈដែលមេដឹកនាំទាំង ២ បានជួបពិភាក្សាគ្នាជាង ២ ម៉ោងនៅលើកោះបាលីរបស់ឥណ្ឌូនេស៊ី។ លោកប្រធានាធិបតីទាំង ២ បាននិយាយថាពួកលោកចង់ទប់ស្កាត់ភាពតានតឹងខ្លាំងកុំឱ្យ វាផ្ទុះឡើងជាជម្លោះ។
មិនយូរប៉ុន្មានមុនកិច្ចប្រជុំជាមួយគ្នាមេដឹកនាំប្រទេសមហាអំណាចទាំង ២ បានចាប់ដៃគ្នាយ៉ាងកក់ក្តៅនៅពីមុខជួរទង់ជាតិចិន និងអាមេរិក ក្នុងសាលឯសណ្ឋាគារមូលីយ៉ា ដែលជាសណ្ឋាគារដ៏ប្រណីតស្ថិតនៅលើឆ្នេរសមុទ្រនូសា ឌួ (Nusa Dua) នៃកោះបាលី។
លោក បៃដិន បានប្រាប់លោក ស៊ី ថា៖ «វាជារឿងល្អណាស់ដែលបានជួបអ្នក» ហើយក្នុងពេលថ្លែងទៅកាន់អ្នកសារព័ត៌មាននៅកោះបាលីលោក បៃដិន បាននិយាយថា លោកបានសន្ទនាដោយបើកចំហនិងស្មោះត្រង់ជាមួយសមភាគីចិនស្តីពីគោលបំណង និងអាទិភាពរបស់សហរដ្ឋអាមេរិក។
«ក្នុងនាមជាមេដឹកនាំនៃប្រទេសយើងទាំង ២ យើងចែករំលែកនូវការទទួលខុសត្រូវ។តាមទស្សនៈរបស់ខ្ញុំដើម្បីបង្ហាញថា ប្រទេសចិន និងសហរដ្ឋអាមេរិក អាចគ្រប់គ្រងភាពខុសគ្នារបស់យើងទប់ស្កាត់ការប្រកួតប្រជែង...កុំឱ្យ ឈានក្លាយទៅជាជម្លោះតទល់គ្នា និងស្វែងរកមធ្យោបាយ ដើម្បីធ្វើការរួមគ្នាលើបញ្ហាសកល បន្ទាន់ជាច្រើនដែលទាមទារឱ្យមានកិច្ចសហប្រតិបត្តិការរវាងគ្នាទៅវិញទៅមក»។
ទាក់ទងរឿងនេះដែរ បើតាមសេចក្តីថ្លែងការណ៍ផ្លូវការសង្ខេបមួយរបស់សេតវិមានអាមេរិកលោក បៃដិន បានពន្យល់ថា សហរដ្ឋអាមេរិក នឹងបន្តប្រកួតប្រជែងយ៉ាងខ្លាំងក្លាជាមួយប្រទេសចិន និងបានសង្កត់ធ្ងន់ជាថ្មីឡើងវិញថាការប្រកួតប្រជែងនេះមិនគួរក្លាយទៅជាជម្លោះទេ។
សេចក្តីថ្លែងការណ៍ដដែលនេះបាននិយាយទៀតថា សហរដ្ឋអាមេរិក និងចិន «ត្រូវតែគ្រប់គ្រងការប្រកួតប្រជែងប្រកបដោយការទទួលខុសត្រូវនិងរក្សាបាននូវទំនាក់ទំនងបើកចំហ។ ហើយដើម្បីបញ្ជាក់ពីដំណើរឆ្ពោះទៅមុខនៃទំនាក់ទំនងទ្វេភាគីក្រោយកិច្ចប្រជុំរវាងមេដឹកនាំទាំង ២ សេតវិមាន បានប្រកាសថា ប្រមុខការបរទេសអាមេរិកលោកអង់តូនីប្ល៊ីងកែននឹងធ្វើដំណើរទស្សនកិច្ចទៅកាន់ប្រទេសចិនដែលនេះ គឺជាទស្សនកិច្ចរបស់មន្ត្រីលំដាប់ជាន់ខ្ពស់អាមេរិកនៅចិន ចាប់តាំងពីឆ្នាំ ២០១៨ មក៕
