នាយករដ្ឋមន្ត្រីជប៉ុន លោក ហ្វូមីអូ គីស៊ីដា (ឆ្វេង) ចាប់ដៃជាមួយមេដឹកនាំចិន លោក ស៊ី ជីនពីង នៅប្រទេសថៃ កាលពីថ្ងៃទី ១៧ វិច្ឆិកា។ រូបថត Kyodo
នៅថ្ងៃព្រហស្បតិ៍ ទី ១៧ វិច្ឆិកា នាយករដ្ឋមន្ត្រីជប៉ុនលោក ហ្វូមីអូ គីស៊ីដា បានប្រាប់មេដឹកនាំចិន លោក ស៊ី ជីនពីង ពីក្តីព្រួយបារម្ភរបស់លោកទាក់ទងបញ្ហាសន្តិសុខក្នុងតំបន់ រួមទាំងកូរ៉េខាងជើងផង។ កូរ៉េខាងជើង គឺជាបញ្ហាប្រឈមផ្នែកសន្តិសុខដ៏សំខាន់ ព្រោះថាទីក្រុងព្យុងយ៉ាង បានបាញ់មីស៊ីលជាបន្តបន្ទាប់ រហូតបណ្តាលឱ្យមានការភ័យខ្លាចពីការសាកល្បងនុយក្លេអ៊ែរកើនឡើង។
លោក គីស៊ីដា និយាយថាគាត់បានសម្តែងការព្រួយបារម្ភយ៉ាងខ្លាំង នៅក្នុងកិច្ចពិភាក្សាទ្វេភាគីទល់មុខគ្នាជាលើកដំបូងជាមួយលោក ស៊ី ជីនពីង នៅខាងក្រៅជំនួបរបស់មេដឹកនាំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងបាងកកប្រទេសថៃ។
កូរ៉េខាងជើង បានបាញ់មីស៊ីលបាលីស្ទិករយៈចម្ងាយខ្លី ខណៈដែលលោក ស៊ី និងលោក គីស៊ីដា ត្រៀមជួបជជែកគ្នា។ ក្រុងព្យុងយ៉ាង បានថែមទាំងព្រមានទីក្រុងវ៉ាស៊ីនតោន និងសម្ព័ន្ធមិត្តឱ្យប្រុងប្រយ័ត្នចំពោះការឆ្លើយតបផ្នែកយោធាដ៏កាចសាហាវទៀតផង។
បើតាមយោធាកូរ៉េខាងត្បូង កូរ៉េខាងជើងបានបាញ់មីស៊ីលដែលទំនងជាមីស៊ីលបាលីស្ទិកអន្តរទ្វីបទៀត នាថ្ងៃសុក្រ ទី ១៨ វិច្ឆិកានេះ ហើយវាគឺជាការបាញ់មីស៊ីលជាលើកទី ២ ក្នុងរយៈពេល ២ ថ្ងៃ រហូតធ្វើឱ្យមានការភ័យខ្លាចពីការសាកល្បងនុយក្លេអ៊ែរកើនឡើង។
គួរជ្រាបថា ចិន និងជប៉ុន គឺជាដៃគូពាណិជ្ជកម្មដ៏សំខាន់។ ក៏ប៉ុន្តែ ទំនាក់ទំនងរវាងប្រទេសទាំង ២ បានធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ នៅពេលដែលទីក្រុងប៉េកាំង ពង្រឹងកាន់តែខ្លាំងនូវផ្នែកយោធារបស់ខ្លួន បង្កើនសាច់ដុំក្នុងតំបន់ និងប្រកាន់ខ្ជាប់នូវខ្សែបន្ទាត់ដ៏តឹងតែងលើដែនដីដែលមានជម្លោះជាមួយប្រទេសដទៃ។
នៅក្នុងជំនួបទ្វេភាគីកាលពីថ្ងៃព្រហស្បតិ៍ម្សិលមិញ លោកនាយករដ្ឋមន្ត្រីជប៉ុន គីស៊ីដា និងប្រធានាធិបតីចិនលោក ស៊ី ជីនពីង បានសន្យារឹតចំណងទាក់ទងលើផ្នែកសន្តិសុខ និងបង្កើនកិច្ចពិភាក្សានឹងគ្នាឱ្យបានច្រើន។
លោក ស៊ី បានប្រាប់ លោក គីស៊ីដា ថា ចិន និងជប៉ុន គួរតែបង្កើនការជឿទុកចិត្តគ្នា បង្កើនកិច្ចសហប្រតិបត្តិការ និងសមាហរណកម្មក្នុងតំបន់ ហើយទប់ទល់នឹងជម្លោះ ព្រមទាំងការប្រឈមមុខដាក់គ្នា។ នេះបើតាមការដកស្រង់សម្តីរបស់មេដឹកនាំចិនដោយទូរទស្សន៍រដ្ឋចិន CCTV។
ចំណែក លោក គីស៊ីដា វិញក៏បានប្រាប់អ្នកសារព័ត៌មានដែរថា លោកបានយល់ព្រមជាមួយលោក ស៊ី ក្នុងការបើកបណ្តាញទំនាក់ទំនងការទូតឡើងវិញ ហើយរដ្ឋមន្ត្រីការបរទេសជប៉ុននឹងទៅបំពេញទស្សនកិច្ចនៅប្រទេសចិននាពេលខាងមុខឆាប់ៗនេះ៕
