ក្រសួងការពារជាតិចិនលើកឡើងនៅថ្ងៃអាទិត្យថា ខ្លួនបើកចំហសម្រាប់កិច្ចប្រជុំជាមួយរដ្ឋមន្ត្រីការពារជាតិសហរដ្ឋអាមេរិកនៅខាងក្រៅវេទិកាសន្តិសុខថ្នាក់តំបន់ដែលខេត្តសៀមរាបនៃប្រទេសកម្ពុជាធ្វើជាម្ចាស់ផ្ទះ។ ការប្រកាសបែបនេះ ជាសញ្ញានៃការភ្ជាប់ទំនាក់ទំនងឡើងវិញ បន្ទាប់ពីមេដឹកនាំកំពូលនៃប្រទេសទាំង២ បានជួបគ្នាក្នុងកិច្ចប្រជុំ G20 នៅឥណ្ឌូនេស៊ី កាលពីសប្ដាហ៍មុន។
រដ្ឋមន្ត្រីការពារជាតិចិន លោក Wei Fenghe និងរដ្ឋមន្ត្រីការពារជាតិអាមេរិក លោក Austin Lloyd បានប្រកាសក្នុងលិខិតដាច់ដោយឡែកពីគ្នាថា ពួកគេ នឹងមានវត្តមានចូលរួមកិច្ចប្រជុំរដ្ឋមន្ត្រីការពារជាតិអាស៊ាន ដែលមានកម្ពុជាជាម្ចាស់ផ្ទះហើយរដ្ឋមន្ត្រីការពារជាតិកម្ពុជាប្រធានអង្គប្រជុំ។
ក្រសួងការពារជាតិរបស់ប្រទេសចិន បានចេញសេចក្តីថ្លែងការណ៍មួយដោយស្រង់សម្តី របស់អ្នកនាំពាក្យក្រសួងការ ពារជាតិចិនលោក Tan Kefei ដែលលើកឡើងថា៖ «ប្រទេសចិនបើកចំហសម្រាប់កិច្ចសន្ទនាជាមួយភាគីអាមេរិក»។
ប្រទេសចិនបានបញ្ឈប់ការសន្ទនាជាទៀងទាត់រវាងមេបញ្ជាការយោធាចិនអាមេរិក នៅក្នុងខែសីហា ដើម្បីសងសឹកចំពោះដំណើរទស្សនកិច្ចរបស់ប្រធានសភាអាមេរិក Nancy Pelosi ទៅកាន់កោះតៃវ៉ាន់។ ប្រសិនបើមានជំនួបរវាងភាគីទាំង២ នៅកម្ពុជាមែននោះ ជំនួបនេះជាជំនួបដំបូងបំផុតរបស់មេដឹកនាំយោធាចិនអាមេរិក បន្ទាប់ពីខក ខានអស់រយៈពេលជាង ៣ខែមកនោះ។
ប្រទេសចិន ចាត់ទុកតៃវ៉ាន់ជាខេត្តមួយរបស់ខ្លួន ខណៈដែលអាមេរិកនៅតែបង្ហាញជំហរការពារតៃវ៉ាន់ប្រសិនណាចិនហ៊ានប្រើប្រាស់កម្លាំងទ័ពសង្គ្រប់យកដែនដីកោះមួយនេះ។
នៅខាងក្រៅកិច្ចប្រជុំកំពូលនៃក្រុម ប្រទេសG 20 នា ប្រទេស ឥណ្ឌូនេ ស៊ីកាលពីសប្តាហ៍មុន លោកប្រធានាធិបតី ចិន Xi Jinping និងប្រធានាធិបតីអាមេរិកលោក Joe Biden បានជួបប្រជុំទល់មុខគ្នាជាលើកដំបូង ចាប់តាំងពីចូ បៃដិន ចូលកាន់តំណែងជាប្រធាធិបតីអាមេរិកនៅដើមឆ្នាំ ២០២១ ។
ទំនាក់ទំនងរវាងប្រទេសដែលមានសេដ្ឋកិច្ចធំជាងគេទាំង ២ នេះ បានធ្លាក់ចុះក្នុងប៉ុន្មានឆ្នាំចុងក្រោយ តាមរយៈសង្គ្រាមពាណិជ្ជកម្ម ការរិះគន់ពីបញ្ហាសិទ្ធិមនុស្សនៅចិន និងបញ្ហាដែនដីតៃវ៉ាន់ដែលចិនចាត់ទុកថាជាបន្ទាត់ក្រហមមិនអាចប៉ះបាន៕