ការបោះឆ្នោតថ្នាក់ជាតិនៅប្រទេសហ្គីណេអេក្វាទ័រ បានបើកធ្វើនៅថ្ងៃអាទិត្យ ទី ២០ ខែវិច្ឆិកានេះ ដោយលោកប្រធានា ធិបតី Teodoro Obiang Nguema សង្ឃឹមថា នឹងឈ្នះឆ្នោត ឈានទៅបន្តតំណែង ដែលលោកកាន់កាប់អស់រយៈពេល ៤៣ ឆ្នាំតទៅមុខទៀត។
លោក Teodoro Obiang Nguema វ័យ ៨០ ឆ្នាំ គឺជាប្រធានាធិបតីដែលកាន់តំណែងយូរជាងគេបង្អស់នៅលើពិភពលោក។ នៅក្នុងការបោះឆ្នោតនាឆ្នាំ ២០២២ នេះ លោកត្រូវប្រជែងយកតំណែងប្រធានាធិបតីជាមួយបេក្ខភាពប្រឆាំង ២ នាក់ ក្នុងនោះរួមមានលោក Buenaventura MonsuyAsumu ដែលឈរឈ្មោះក្នុងការបោះឆ្នោតថ្នាក់ជាតិ ៦ អាណត្តិប្រណាំងនឹងលោក Obiang ចំណែកបេក្ខភាពម្នាក់ទៀតគឺលោក Andrés Esono Ondo ដែលទើបឈរឈ្មោះជាលើកដំបូង។
ប្រទេសហ្គីណេអេក្វាទ័រ មានចំនួនប្រជាជនគ្រប់អាយុបោះឆ្នោតចំនួន ៤ សែននាក់ ក្នុងចំណោមប្រជាជនសរុបចំនួន ១លាន ៥សែន នាក់។ប្រជាជនគ្រប់អាយុទាំងជាង ៤សែន នាក់នេះ នឹងត្រូវបោះឆ្នោតជ្រើសរើសសមាជិកសភាជាន់ទាបចំនួន ១០០ នាក់, សមាជិកព្រឹទ្ធសភាចំនួន ៧០ នាក់, និងគណៈអភិបាលនៅក្នុងតំបន់។
បើតាមអ្នកសង្កេតការណ៍ លោក Teodoro Obiang Nguema នឹងឈានទៅឈ្នះការបើឆ្នោតលើកនេះ ដូចការបោះឆ្នោតលើកមុនៗដែរ។ ការស្ទង់មតិរបស់អ្នកសង្កេតការណ៍បង្ហាញថា លោក Teodoro Obiang Nguema នឹងឈ្នះឆ្នោតក្នុងសំឡេងភាគច្រើនលើសលប់រហូតដល់ទៅជាង ៩០ ភាគរយឯណោះ។
នៅក្នុងសេចក្ដីថ្លែងការណ៍ដាច់ដោយឡែកពីគ្នា សហរដ្ឋអាមេរិក និងសហភាពអឺរ៉ុបបានអំពាវនាវឱ្យមានការបោះ ឆ្នោតដោយសេរីនិងយុត្តិធម៌នៅប្រទេសហ្គីណេអេក្វាទ័រ ហើយបានលើកឡើងពីការព្រួយបារម្ភលើរបាយការណ៍នៃការយាយីនិងការបំភិតបំភ័យទៅលើក្រុមប្រឆាំង និងក្រុមសង្គមស៊ីវិល។ រដ្ឋាភិបាលហ្គីណេអេក្វាទ័រ បានច្រានចោលក្ដីព្រួយបារម្ភរបស់អាមេរិក និងសហភាពអឺរ៉ុបនេះនិងចាត់ទុកថា វាជាការជ្រៀតជ្រែកក្នុងដំណើរការបោះឆ្នោតរបស់ខ្លួន។
សូមជម្រាបថា ចាប់តាំងពីទទួលបានឯករាជ្យពេញលេញពីប្រទេសអេស្ប៉ាញនៅឆ្នាំ ១៩៦៨ មក ប្រទេសហ្គីណេអេក្វាទ័រមានប្រធានាធិបតីតែ ២ នាក់គត់ គឺលោក Francisco Macias Nguema និងលោក Teodoro Obiang Nguema។ លោក Francisco Macias Nguema ដែលត្រូវជាពូរបស់លោក Obiang ត្រូវបានលោក Obiang ធ្វើរដ្ឋប្រហារទម្លាក់ចេញពីតំណែងនៅក្នុងឆ្នាំ ១៩៧៩ ៕