.jpg)
ធនាគារកណ្តាលឥណ្ឌូនេស៊ី។ រូបថត AFP
សារព័ត៌មាន CNA ផ្សាយថាទេសាភិបាលធនាគារកណ្តាល (BI) ប្រទេសឥណ្ឌូនេស៊ី បានប្រាប់សភាថា កំណើនសេដ្ឋកិច្ចប្រចាំឆ្នាំរបស់ឥណ្ឌូនេស៊ីអាចនឹងមានប្រមាណ ៤,៣៧% នៅឆ្នាំក្រោយ ខណៈដែលពីពេលមុនមកប្រទេសនេះរំពឹងថា សេដ្ឋកិច្ចរបស់ខ្លួននឹងមានកំណើនចន្លោះពី ៤,៥% ទៅ ៥,៣% ។
ទេសាភិបាលធនាគារកណ្ដាលឥណ្ឌូនេស៊ី លោក Perry Warjiyo បានផ្តល់ ការព្យាករលើកំណើនសេដ្ឋកិច្ចនេះនៅពេលដែលតំណាងធនាគារកណ្ដាលឡើងទៅការពារសេចក្ដីព្រាងថវិការបស់ខ្លួនសម្រាប់ឆ្នាំ ២០២៣ នៅចំពោះមុខការសួរដេញដោលរបស់រដ្ឋសភានៅថ្ងៃទី ២១ ខែវិច្ឆិកា។ លោក Warjiyo បាននិយាយថា៖ «ការព្យាករសូចនាករសេដ្ឋកិច្ចមានភាពលំបាកដោយសារតែសេដ្ឋកិច្ចពិភពលោកប្រែប្រួល»។
ក្នុងជំនួបជាមួយរដ្ឋសភានោះលោកក៏បានផ្តល់ការព្យាករអតិផរណាដែលរកឃើញថាមានប្រមាណ ៦,១១% សម្រាប់ចុងឆ្នាំ២០២២ និង ៣,៦១% នៅឆ្នាំ២០២៣។
កាលពីសប្ដាហ៍មុនធនាគារកណ្ដាលឥណ្ឌូនេស៊ីរំពឹងថាប្រទេសនេះ នឹងមានអត្រាអតិផរណា ៥,៦% នៅចុងឆ្នាំនេះ។ ទោះជាយ៉ាងណាមេធនាគារជាតិរូបនេះ មិនបានពន្យល់ ពីមូលហេតុដែលតួលេខខុសគ្នាទេចំពោះបញ្ហានេះ។
កាលពីសប្តាហ៍មុន ធនាគារកណ្ដាលឥណ្ឌូនេស៊ី បានដាក់ចេញគោលនយោបាយសំខាន់ៗរបស់ខ្លួនក្នុងគោលបំណងកាត់បន្ថយអត្រាអតិផរណាដែលមន្ត្រីជាន់ខ្ពស់ របស់ស្ថាប័ននេះបាននិយាយថា «ខ្ពស់ពេក»។
អត្រាអតិផរណារបស់ប្រទេសឥណ្ឌូនេស៊ី មានចំនួន ៥,៧១ ភាគរយនៅក្នុងខែតុលា ប៉ុន្តែខណៈដែលខែកញ្ញា អតិផរណាមានកម្រិត ៥,៩៥% ដែលឈានដល់កៀកនឹងអត្រាខ្ពស់បំផុតកាលពី ៥ ឆ្នាំមុន។ ធនាគារកណ្ដាលឥណ្ឌូនេស៊ី បានដាក់គោលដៅធ្វើយ៉ាងណា ឱ្យអតិផរណានៅប្រទេសនេះស្ថិតនៅចន្លោះពី ២% ទៅ ៤%៕
