.jpg)
រថយន្តខូចខាតត្រូវបានគេឃើញនៅលើឆ្នេរ Casamicciola នៅថ្ងៃទី ២៧ ខែវិច្ឆិកា ឆ្នាំ ២០២២ បន្ទាប់ពីភ្លៀងធ្លាក់ខ្លាំងបណ្តាលឱ្យបាក់ដីនៅលើកោះ Ischia ភាគខាងត្បូង ប្រទេសអ៊ីតាលី។ AFP
ក្រុមអ្នកជួយសង្គ្រោះអ៊ីតាលី កំពុងស្វែងរកអ្នកបាត់ខ្លួនរាប់សិបនាក់ នៅលើកោះ Ischia ភាគខាងត្បូងបន្ទាប់ពីមានការបាក់ដីដ៏ធំ និងបានសម្លាប់មនុស្សយ៉ាងហោចណាស់ម្នាក់។
រលកភក់ និងកម្ទេចកម្ទី បានបោកបក់ពេញទីក្រុងតូចមួយនៃសហគមន៍ Casamicciola Terme នៅព្រឹកថ្ងៃសៅរ៍ ដោយបានលេបត្របាក់ផ្ទះអស់មួយខ្នង ហើយរថយន្ត ត្រូវបក់បោកចូលទៅក្នុងសមុទ្រ។
យោងតាមទីភ្នាក់ងារព័ត៌មានអ៊ីតាលី AGI នៅថ្ងៃទី ២៧ ខែវិច្ឆិកា បានឱ្យដឹងថា ក្រុមអ្នកជួយសង្គ្រោះ បានរកឃើញសាកសពស្ត្រីអាយុ ៣១ឆ្នាំម្នាក់ ខណៈដែលការផ្សាយតាមប្រព័ន្ធផ្សព្វផ្សាយនានា ក្នុងស្រុក បានរាយការណ៍ថា មនុស្ស ១៣នាក់ បានរងរបួស នៅក្នុងឧបទ្ទវហេតុនេះ។
តាមមន្ត្រីក្នុងស្រុក Claudio Palomba បានឱ្យដឹងថា មនុស្សរាប់សិបនាក់ នៅតែមិនទាន់បានរកឃើញនៅឡើយ នាថ្ងៃអាទិត្យនេះ។ លោកបាននិយាយថា មនុស្សមួយចំនួន ដែលត្រូវបានគេរាយការណ៍ថា បានបាត់ខ្លួនតាំងពីពេលនោះមក ត្រូវបានគេរកឃើញ ដោយសុវត្ថិភាព រួមទាំងគ្រួសារមួយ ដែលមានទារកទើបនឹងកើតផងដែរ។
លោកស្រី GiorgiaMeloni អ្នកនយោបាយអ៊ីតាលី ដែលបានកាន់តំណែងជានាយករដ្ឋមន្ត្រីនៃប្រទេសនេះ បានចូលរួមសោកស្ដាយ និងបង្ហាញក្ដីអាណិតអាសូរ ដោយលោកស្រី បានថ្លែងថា លោកស្រីបានហៅកិច្ចប្រជុំគណៈរដ្ឋមន្ត្រីវិសាមញ្ញមួយ កាលពីថ្ងៃអាទិត្យ ដើម្បីពិភាក្សាអំពីគ្រោះមហន្តរាយនេះ។
លោក Luca Cari អ្នកនាំពាក្យសេវាពន្លត់អគ្គិភ័យ បាននិយាយថា៖ «យើងខ្លាចថា អាចមានជនរងគ្រោះផ្សេងទៀត ប៉ុន្តែរហូតមកដល់ពេលនេះចំនួនអ្នកស្លាប់ គឺមានតែម្នាក់ទេ»។
ប្រភពដដែល បានលើកឡើងថា កិច្ចខិតខំប្រឹងប្រែងជួយសង្គ្រោះ ត្រូវបានរារាំងដោយភ្លៀង និងខ្យល់បក់ខ្លាំង។ វាជាប្រតិបត្តិការសង្គ្រោះដ៏ស្មុគស្មាញ។ ភ្លៀងធ្លាក់ខ្លាំងបានបញ្ចេញភក់ពេញផ្លូវនៃ Casamicciola Terme ដែលជាការតាំងទីលំនៅ ភាគខាងជើងនៃ Ischia ដែលជាកោះខៀវស្រងាត់នៅជិត Capri ដែលសម្បូរទៅដោយអ្នកទេសចរ នៅរដូវក្តៅ។
ភ្នាក់ងារពន្លត់អគ្គិភ័យ បាននិយាយនៅថ្ងៃដដែលនេះថា ផ្ទះមួយខ្នង ត្រូវបានជន់លិចដោយភក់ ហើយមនុស្សពីរនាក់ ត្រូវបានជួយសង្គ្រោះចេញពីរថយន្ត ដែលត្រូវបានហូរចូលក្នុងសមុទ្រ។
ទីភ្នាក់ងារព័ត៌មាន ANSA បានរាយការណ៍ថា នៅក្នុងតំបន់ដែលរងផលប៉ះពាល់ខ្លាំងបំផុតនៃទីក្រុងនេះ យ៉ាងហោចណាស់ ៣០គ្រួសារ បានជាប់នៅក្នុងផ្ទះរបស់ពួកគេទាំងគ្មានទឹក គ្មានអគ្គិសនី ដោយសារមានភក់ និងកម្ទេចកម្ទីផ្សេងៗ បិទផ្លូវជិត៕
