នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ប្រកាសថា ប្រទេសម៉ាឡេស៊ី កំពុងពិនិត្យមើលកម្មវិធីឧបត្ថម្ភធនរបស់រដ្ឋាភិបាលរបស់ខ្លួន ក្នុងគោលបំណងផ្ដល់ប្រាក់ទៅក្រុម ដែលមានចំណូលទាប ដោយលោកបានកំណត់អាទិភាពលើការកើនឡើងនៃថ្លៃចំណាយ សម្រាប់ការរស់នៅប្រចាំថ្ងៃ ខណៈដែលលោកចូលកាន់តំណែង ស្របពេលដែលកំណើនសេដ្ឋកិច្ចមានសភាពយឺតយ៉ាវ។ លោកនិយាយបែបនេះ ក្នុងសន្និសីទសារព័ត៌មាន នៅថ្ងៃអាទិត្យ ទី ២៧ ខែវិច្ឆិកា។
លោកថា មន្ត្រីជំនាញរដ្ឋាភិបាល មានពេល ២ សប្តាហ៍ ដើម្បីពិនិត្យឡើងវិញនូវផលប៉ះពាល់នៃការបង្រួមការឧបត្ថម្ភធន។ ប្រទេសម៉ាឡេស៊ី ផ្តល់ការឧបត្ថម្ភធនដល់ប្រជាពលរដ្ឋទាំងអស់ ដែលប្រេងឥន្ធនៈ និងប្រេងសម្រាប់ចម្អិនអាហារជាភាគរយធំបំផុតនៃការចំណាយ។ ម៉ាឡេស៊ី ក៏ឧបត្ថម្ភធនចំពោះអគ្គិសនី ស្ករ និងម្សៅផងដែរ។
លោក អាន់វ៉ា ដែលឡើងជានាយករដ្ឋមន្ត្រីម៉ាឡេស៊ី បន្ទាប់ពីការបោះឆ្នោតដ៏ប្រកៀក កាលពីសប្តាហ៍មុនបាននិយាយថា៖ «ការឧបត្ថម្ភធនត្រូវតែកំណត់គោលដៅច្បាស់លាស់ បើមិនដូច្នេះទេ ក្រុមអ្នកមានទ្រព្យសម្បត្តិក៏ទទួលផលពីការការឧបត្ថម្ភធនទាំងនោះដែរ មិនមែនត្រឹមតែក្រុមដែលមានប្រាក់ចំណូលទាបប៉ុណ្ណោះទេ»។
លោកបានបន្តថា ការលើកទឹកចិត្តផ្សេងទៀត នឹងត្រូវបានពិចារណា សម្រាប់ឧស្សាហកម្ម ដែលលែងទទួលបានអត្ថប្រយោជន៍ពីការឧបត្ថម្ភធន។ លោក អាន់វ៉ា ចង់ឱ្យមានការពិនិត្យឡើងវិញលើការឧបត្ថម្ភធនអគ្គិសនី ព្រោះអត្ថប្រយោជន៍ដែលអ្នកក្រ និងអ្នកមានទទួលបានគឺស្ទើរតែស្មើគ្នា។ លោកបានមានប្រសាសន៍ថា៖ «តាមទស្សនៈរបស់ខ្ញុំ នេះមិនសមហេតុផលទេ»។
ខណៈពេលដែលលោក អាន់វ៉ា ផ្តល់ការធានាថា ការឧបត្ថម្ភធនអគ្គិសនី នឹងត្រូវបានបន្ត សម្រាប់ក្រុមដែលមានប្រាក់ចំណូលទាប លោកបានបន្ថែមថា ឧស្សាហកម្មធំៗ និងមានថវិកាច្រើន មិនគួរទទួលបានទេ ព្រោះនេះនឹងជាបន្ទុកហិរញ្ញវត្ថុដ៏ធំដល់រដ្ឋាភិបាល។
លោកក៏បានស្នើឱ្យក្រសួងកសិកម្ម និងឧស្សាហកម្មម្ហូបអាហារ តាមរយៈអាជ្ញាធរទីផ្សារកសិកម្មសហព័ន្ធ (FAMA) ចាត់វិធានការ ដើម្បីគ្រប់គ្រងថ្លៃដើមផលិតកម្មស្បៀងទៀតផង។
លោក អាន់វ៉ា កំពុងអនុវត្តតាមគោលជំហររបស់រដ្ឋបាលមុន ដែលកាលពីខែមុន បានស្នើថវិកា ក្នុងចំនួនតិចជាងមុន ដោយកាត់បន្ថយការឧបត្ថម្ភធន ដោយសារការកើនឡើងនៃថ្លៃទំនិញ ហើយដែលជះផលប៉ះពាល់ទៅលើការចំណាយរបស់រដ្ឋាភិបាល។
ប្រទេសម៉ាឡេស៊ីត្រូវបានគេប៉ាន់ប្រមាណថា នឹងត្រូវចំណាយប្រាក់ ៧៧,៧ ពាន់លានរីងហ្គីត (ប្រហែល ១៧,៤ ពាន់លានដុល្លារ) ក្នុងឆ្នាំនេះលើការឧបត្ថម្ភធន។
លោក អាន់វ៉ា បាននិយាយថា លោកនឹងពិភាក្សាអំពីការតែងតាំងគណៈរដ្ឋមន្ត្រីជាមួយដៃគូចម្រុះរបស់លោក នៅប៉ុន្មានថ្ងៃខាងមុខ។ អ្នកនយោបាយវ័យ ៧៥ ឆ្នាំរូបនេះ បានស្បថចូលកាន់តំណែង កាលពីថ្ងៃព្រហស្បតិ៍ ដែលនេះជាចំណុចកំពូលនៃដំណើរនយោបាយរបស់លោករយៈពេល ៣ ទសវត្សរ៍ ដោយចាប់ផ្ដើមចេញពីអ្នកស្នងតំណែងនៃថ្នាក់ដឹកនាំជើងចាស់ លោក Mahathir Mohamad ទៅជាមេដឹកនាំបាតុកម្ម និងទៅជាអ្នកទោស ដែលត្រូវបានកាត់ទោសពីបទសេពសន្ថវៈ និងមេដឹកនាំគណបក្សប្រឆាំង។
វិនិយោគិនបានអបអរសាទរ ចំពោះការតែងតាំងរបស់លោក ដោយសង្ឃឹមថា លោក អាន់វ៉ា នឹងនាំមកនូវស្ថិរភាព បន្ទាប់ពីភាពមិនប្រាកដប្រជាផ្នែកនយោបាយ ដោយសារតែផ្លាស់ប្ដូរនាយករដ្ឋមន្ត្រីដល់ទៅ ៣ នាក់ ក្នុងរយៈពេលជាច្រើនឆ្នាំមកនេះ។ ការផ្តោតសំខាន់គឺនៅលើទិសដៅគោលនយោបាយរបស់រដ្ឋាភិបាលថ្មី និងការតែងតាំងគណៈរដ្ឋមន្ត្រី។ លោក អាន់វ៉ា បាននិយាយ កាលពីថ្ងៃសុក្រថា លោកនឹងមានគណៈរដ្ឋមន្ត្រីតូចជាងរដ្ឋបាលមុន៕