.jpg)
លោកនយាករដ្ឋមន្ត្រីអង់គ្លេស រីស៊ី ស៊ូណាក់។ AFP
នៅពេលដែលរុស្ស៊ីបង្កើនការបាញ់ប្រហារអ៊ុយក្រែនដោយប្រើគ្រាប់មីស៊ីលពីចម្ងាយ និងបំផ្លាញហេដ្ឋារចនាសម្ព័ន្ធថាមពលយ៉ាងដំណំ ប្រទេសអង់គ្លេស ដែលជាដៃគូផ្តល់ជំនួយយោធាដ៏សំខាន់ដល់ប្រទេសអ៊ុយក្រែន និងប្រកាសពីជំហរថាតើខ្លួនត្រូវបង្កើនជំនួយយោធា ឬរក្សាជំនួយនោះនៅដដែលសម្រាប់ឆ្នាំ ២០២៣។
សេចក្តីរាយការណ៍របស់ទីភ្នាក់ងារព័ត៌មានរ៉យទ័របានអះអាងថានាយករដ្ឋមន្ត្រីអង់គ្លេស លោក រីស៊ី ស៊ូណាក់ (Rishi Sunak) គ្រោងនឹងសន្យានៅថ្ងៃចន្ទដើម្បីរក្សា ឬបង្កើនជំនួយយោធាដល់អ៊ុយក្រែននៅឆ្នាំក្រោយ និងដើម្បីប្រឈមមុខនឹងដៃគូប្រកួតប្រជែងអន្តរជាតិ «មិនមែនដោយប្រើវោហាស័ព្ទ ដ៏សម្បើមទេ ប៉ុន្តែជាមួយនឹងការអនុវត្តជាក់ស្តែងដ៏ខ្លាំងតែម្តង»។
ការគាំទ្ររបស់រដ្ឋាភិបាលអង់គ្លេសសម្រាប់អ៊ុយក្រែនមិនមានការប្រែប្រួលឡើយ បើទោះបីជាអង់គ្លេសប្តូរមេដឹកនាំជាញឹកញាប់ក្នុងសម័យសង្គ្រាមនេះ។
សង្គ្រាមនៅប្រទេសអ៊ុយក្រែន បានចាប់ផ្តើមឡើងក្នុងអំឡុងពេលលោក បូរីស ចនសុន (Boris Johnson) កំពុងដឹកនាំប្រទេសអង់គ្លេស ដោយនាយករដ្ឋមន្ត្រីរូបនេះបានផ្តល់ការគាំទ្រយ៉ាងខ្លាំងទាំងសម្ភារយោធា ហិរញ្ញវត្ថុ ការទូត ដល់មេដឹកនាំអ៊ុយក្រែនដឹកនាំដោយប្រធានាធិបតី វ៉ុលឌីមៀ រហ្សេឡេនស្គី។ ដោយសារមានវិបត្តិរដ្ឋាភិបាលអង់គ្លេសបន្ទាប់ពីរដ្ឋមន្ត្រីជាច្រើនលាលែងពីតួនាទីធ្វើឱ្យរដ្ឋាភិបាលរបស់លោក ចនសុន ប្រឈមវិបត្តិនិងត្រូវរុះរើ ហើយអង់ គ្លេសបានរកឃើញនាយករដ្ឋមន្ត្រីថ្មីគឺលោកស្រី Liz Truss ដែលដឹកនាំបានប្រមាណ៦សប្តាហ៍ក៏ត្រូវលាឡេងដែលសារការដាក់ចេញនយោបាយសេដ្ឋកិច្ចមិនសមស្រប។ អំឡុងពេលដឹកនាំប៉ុន្មានសប្តាហ៍នោះ លោកស្រី Liz Truss ក៏បានអះអាងពីភាពមិនប្រែប្រួលលើការគាំទ្រប្រទេសអ៊ុយក្រែនដែរ។
លោក រីស៊ី ស៊ូណាក់ បានឡើងបន្តដឹកនាំបក្សអភិរក្សនិយម និងប្រទេសអង់គ្លេស បន្តពីលោកស្រី Liz Truss ហើយនាយករដ្ឋមន្ត្រីអង់គ្លេសចុងក្រោយនេះ ក៏បានប្តេជ្ញាជួយអ៊ុយក្រែនដោយមិនរាថយផងដែរ។
យោងតាមការចេញផ្សាយរបស់រ៉យទ័រ លើបញ្ហារបស់ប្រទេសអ៊ុយក្រែន លោក ស៊ូណាក់ បានបង្ហាញថា មិនមានការផ្លាស់ប្តូរជាមួយនឹងគោលនយោបាយដែលបន្តដោយអតីតនាយករដ្ឋមន្ត្រី ២នាក់មុននោះទេ។
រ៉យទ័រដកសម្រង់សម្តីរបស់លោក ស៊ូណាក់ ដូចបានថ្លែងថា៖ «យើងនឹងនៅជាមួយអ៊ុយក្រែនឱ្យបានយូរតាមដែលត្រូវការ។ យើងនឹងរក្សា ឬបង្កើនជំនួយយោធារបស់យើងនៅឆ្នាំក្រោយ ហើយយើងនឹងផ្តល់ការគាំទ្រថ្មីសម្រាប់ការការពារអាកាស»។
កាលពីខែកញ្ញា អង់គ្លេស បាននិយាយថា ខ្លួនជាអ្នកផ្តល់ជំនួយយោធាធំជាងគេទី២ ដល់អ៊ុយក្រែនបន្ទាប់ពីសហរដ្ឋអាមេរិក ដោយបានផ្តល់ជំនួយចំនួន ២,៣ ពាន់លានផោននៅឆ្នាំនេះ៕
